Đơ̆ng rŏng kơ roi tơbăt găh dôm jơnei ‘lơ̆ng kơ teh đak lơ̆m đĭ đăng rim tơdrong jang, Tổng Bí thư Tô Lâm tơbăt, lăp đơ̆ng rŏng Hop akŏm XIV lơ hơnăp jang tơm lơ̆m tơdrong jang pơjing Đảng gô đei tơlĕch jang hrơ̆ch nhen hơmet ming, tơmơ̆t dơ̆ng păng tơlĕch ăn hrơ̆ch dôm trong pơtho, hơgăt găh jang kiơ̆ Tơdrong pơkăp Đảng păng tơdrong jang hơlen lăng, dăr lăng đơ̆ng Đảng; hơnơ̆ng tơplih ‘nao pran kơtang tơdrong jang kang ƀô̆ kiơ̆ trong tơpă ‘lơ̆ng, tơpăt; rơih iŏk ƀlep bơngai, pơjao ƀlep tơdrong, iŏk đei yua tơdrong jang, tơdrong pôk lui đơ̆ng Kon pơlei păng iŏk yua yan âu pơm ‘long rek pơtŏ tơm, dăh mă nhen tơlĕch dôm trong jang hơtŏk loi dơ̆ng tơdrong jang tang găn sa pơgơ̆m pơjĭp, brăh brư, ưh kơ ‘lơ̆ng; tơ jră tơjur găh đon tơchĕng chĭnh trĭ, jơhngơ̆m đon, trong hơrih, dôm tơdrong đei ƀôh kơdih, tơplih kơdih lơ̆m tơdoă.

Pơma hơdăh 1 ‘măng dơ̆ng, Đảng, Teh đak ling lang pơ ‘lơ̆ng dôm tơdrong tơgop tih tên đơ̆ng dôm kơdră chĕp kơ̆l, sơ̆ pơm kơdră chĕp kơ̆l kiơ̆ rim jơhnơr, Tổng Bí thư ‘meh vă hơnơ̆ng iŏk đei dôm nơ̆r tơgop kăp gĭt đơ̆ng dôm bơngai sơ̆ jang lơ̆m Trung ương Đảng vă tơgŭm Anih chĕp kơ̆l pơgơ̆r Trung ương, Anih tơm Chĭnh trĭ, Ban Bí thư jăl XIV hơnơ̆ng hơmet pơ ‘lơ̆ng trong jang tơgŭm păng hơtŏk ‘lơ̆ng hloh dơ̆ng chĕp kơ̆l pơgơ̆r, hơnhăk Teh đak hơtŏk tơiung kơjăp tơ̆ hơnăp kơnh.