Tang măt ăn Đảng, Teh đak, Tổng Bí thư pơtruh nơ̆r apĭnh jet gia păng hmach thơ thou sơnăm ‘nao ăn rim kơdră atŭm hăm ŭnh hnam. Tơblŏk dơ̆ng dôm tơdrong lơ̆m teh đak, Tổng Bí thư pơma hơdăh, lơ̆m tơdrong chơt hơ iă atŭm găh jơnei Hop akom tih mă XIV kơ Đảng, Việt Nam tŏk bŏk dơ̆ng tơ hơnăp jơ rơvơn tih tên vă yak mơ̆t lơ̆m chăl atŏk tơ iung kơ hơdrĕch hơdrung. Tổng Bí thư pơma tơbăt jơhngơ̆m đon chơt hơ iă mưh hơnăp khul so Kŏng ang kon pơlei ‘măng mă blŭng đei choh tơmơt tôch trŏ lăp lơ̆m hla bơar Tơchơ̆t Hop akom tih mă XIV. Tổng Bí thư sơkơ̆t hơdăh, mă đơ̆ng hlôi pơdơ̆h bơ̆ jang, rim kơdră oei đei jơhngơ̆m đon gơh hơgei, tơnăp; athei hơnơ̆ng pơm jŭk yŭk trong hơlou tơ̆ tơring, jing hơnih gơnang chinh trĭ kăl hloh, tơgop kơtang lơ̆m tơ iung pơjing khul Kŏng ang kon pơlei gơh hơgei, nuih mơng.