Tơdrong jang đei man kiơ̆ trong Hnam pơgang rơgei, “hnam pơgang rơgoh”, tơmât yoa kơmăy kơmŏk ‘nao păng kơmăy rơgei mưh khăm hơlen, hơmet jĭ, vei lăng pơgơ̆r jang, năng tông anih pơdơ̆h ngôi, năm truh trong pơjing đei kơmăy kơmŏk pơyoa ăn jang pơgang tơ̆ Anih tơm lơ̆m chăl tơplih hăm kơmăy sô̆. Hăm kơsô̆ jên tơmât jang hlŏh 16.000 ti, tơdrong jang oei jing anih pơtruh lơ ki thuơ̆t jang pơgang rơgei dơ̆ng.

Pơma tơ̆ jơ pơm lêh, Tổng Bí thư Tô Lâm pơma hơdăh: Tơdrong jang ‘nâu tôch lăp păng tơƀôh hơdăh lơ trong jang tih đơ̆ng Đảng, Teh đak găh atŏk tơiung khoa hŏk–kơmăy kơmŏk, atŏk tơiung anih jang mŭk drăm kơdih, hơtŏk tơdrong vei lăng năng tông jơhngâm pran ăn Kon pơlei; atŭm hăm ‘nŏh ăn ƀôh đon pơhnŏng đơ̆ng Anih tơm mưh jang kiơ̆ dôm trong jang, tơdrong tơgŭm hơdrô̆ vă bơ̆ jang dôm tơdrong jang tih, gĭt kăl, đei yoa đunh, ƀơm truh ning mônh kơnh.