Kơsơ̆ năr 24/9, tơ̆ Hà Nội, Tổng Bí thư Tô Lâm, Bí thư Quân uỷ Trung ương hlôi vang năm păng iung pơma tơ̆ Hop akom tih Pơting dih băl jang nuih mơng pran kơtang lơ̆m khul ƀô̆ đô̆i ‘măng mă XI jăl jang 2020-2025. Tổng Bí thư Tô Lâm hmach chơt hơ iă dôm tơdrong iŏk đei jơnei tih tên kơ rim hơnih jang păng khul jang hlôi iŏk đei jơnei lơ̆m ‘măng pơgơ̆r pơting dih băl bơ̆ jang nuih mơng pran kơtang khei năr ou ki; adoi akhan, tơdrong lang să tơdrong jang pơting dih băl bơ̆ jang nuih mơng pran kơtang ưh khan lăp lơ̆m kơđông, hơnih bơ̆ jang khul ƀô̆ đô̆i mă oei pơm hơtŏk lang să năm truh rim hơnih bơ̆ jang tơm, hơnih jang, tơring tơrang, hơnih mơdro sa păng kon pơlei pơla, tơgop pơjing đei tơdrong joăt pơting dih băl ‘mêm kơ eng Teh đak jơ̆p lơ̆m teh đak lơ̆m tơ iung pơjing păng vei lăng Teh đak. Vă hơnơ̆ng iung jang kiơ̆ ‘lơ̆ng dôm tơdrong hlôi iŏk đei jơnei, Tổng Bí thư pơma hơdăh găh dôm tơdrong lơ̆m apŭng plĕnh teh, lơ̆m tơring khei năr kơnh hơnơ̆ng đei ƀôh tơdrong ưh sơđơ̆ng, tơjră dih băl hăm kmăi kmŏk hơgei roi kơtang; kơ yuơ lơ loh tơdrong tơ iung pơjing păng vei lăng Teh đak lơ̆m chăl hle pơ koĕl khul ƀô̆ đô̆i bơ̆n kăl nuih mơng, pran kơtang, gơ̆h hơgei tôm tong truh hloi bơ̆ jang hăm kmăi kmŏk. Lơ̆m khei năr ou, pơting dih băl bơ̆ jang nuih mơng pran kơtang kăl tơƀôh hơdăh: Khul tơblăh iok trong tơlĕch jang pơtho pơhrăm tơblăh trŏ lăp yan ou, ƀlep bơngai, ƀlep tơring, ƀlep ƀrơ̆m phao kơtoang, lăng tơdrong gơ̆h iŏk yoa ƀrơ̆m phao kơtang gơ̆h jơgei jĭ tơdrong kăl hloh, lăng bơ̆ jang ‘lơ̆ng, sơđơ̆ng ‘noh jing trong tơm. Jơ ‘năr ou, Khul kơdră chĕp pơgơ̆r Ƀô̆ đô̆i hlôi pôk ăn Hla kơ pơting dih băl ăn 84 khul; pôk ăn Hla bơar pôk bơnê ăn rim khul păng rim bơngai hlôi bơ̆ jang ‘lơ̆ng lơ̆m tơdrong jang pơting dih băl bơ̆ jang nuih mơng pran kơtang gơh hơgei lơ̆m khul ƀô̆ đô̆i ‘măng mă 11.