Tơbăt 80 sơnăm Năr Kach mang khei 8 jơnei păng Quốc khánh 02/9; 80 sơnăm Năr joăt joe khŭl Lĭnh Kŏng an kon pơlei Việt Nam păng 20 sơnăm Năr Đĭ đăng kon pơlei vei lăng sơđơ̆ng Teh đak, Pơgê 14/8 tơ̆ xăh Tân Trào, Tuyên Quang pơgơ̆r Năr Đĭ đăng kon pơlei vei lăng sơđơ̆ng Teh đak sơnăm 2025 păng et hơtŏk Rup man “Ƀok Hồ tơ̆ Tân Trào”. Pơma tơ̆ năr akŏm, Tổng Bí thư Tô Lâm tơroi rơđăh, Năr akŏm ‘noh jĭ ‘măng vă tơroi dơ̆ng jơhnơr hơrih, ƀlŏk hơdơ̆r păng tơƀôh hơdăh hơnăp jang gĭt kăl, tơdrong vang tơgop tih tên đơ̆ng kon pơlei lơ̆m tơdrong jang vei lăng sơđơ̆ng teh đak, vei sơđơ̆ng tơpôl, hơnơ̆ng hơtŏk pran kơtang tơdrong joăt joe kăp gĭt ‘noh lơ̆m chăl ‘nao, chăl pơdrŏng pran, mơ̆t jang hơdai păng hơtŏk tơiung.

Vă hơnơ̆ng hơtŏk jơhngơ̆m pran đơ̆ng tơpôl kon pơlei, hơnăp jang tơm đơ̆ng khŭl lĭnh kŏng an kon pơlei lơ̆m vei lăng sơđơ̆ng tơpôl, Tổng Bí thư athei dêh char Tuyên Quang, xăh Tân Trào hơnơ̆ng vei kơjăp, bơ̆jang kiơ̆ tơpăt dôm trong jang đơ̆ng Đảng, Teh đak găh pơjing tơdrong jang đĭ đăng kon pơlei vei lăng sơđơ̆ng Teh đak; băt hơdăh đon tơchĕng iŏk kon pơlei pơm tơm, kon pơlei ‘noh tơm păng tơ ‘ngla kơ tơdrong jang vei lăng sơđơ̆ng teh đak, kach mang ‘noh jĭ tơdrong jang đơ̆ng kon pơlei, yua đơ̆ng kon pơlei, yua kơ kon pơlei.