Jĭ tơring hơnơ̆ng pŭ ƀơm ưh kơ ‘lơ̆ng đơ̆ng ‘mi kial, đak tih, păih Hơlĕch dêh char Gia Lai (dêh char Bình Định so) ‘nao yak hloh ‘mi kial hơbŭt kơsô̆ 13 păng ‘măng ‘mi tih đak lơ̆p tôch kơ tih hơtuch sơnăm 2025, pơm ăn hiong răm kơtang ăn tơdrong hơrih sa păng jang sa kơ kon pơlei. Kơhrĕng tŏ hnam đei păk pơchăh, rơbâu tŏ hnam đei đak lơ̆p, rơbăn met bơnơ̆ thong đak krong đei teh hơlih pơm teh dơ̆k, đak lơ̆p teh choh pơtăm. Hơdrol kơ hop akŏm XIV kơ Đảng, yă Huỳnh Khánh Ly, plei Luật Lễ, xăh Tuy Phước Đông, dêh char Gia Lai apĭnh:

“Hop akŏm Đảng ‘măng mă âu kon pơlei jang chŭn mir tơ̆ tơring 'meh vă đei Teh đak hơnơ̆ng bơngơ̆t truh tơring thŭng, tơring đak lơ̆p. Jum dăr ‘noh 4 păih đak krong pơvang đĭ. Kon pơlei kŭm ‘meh hơbong thong đak đei ‘lơ̆ng hloh, trong nơnăm, gơng roi ‘năr roi hiôk vă kon pơlei jang sa hơtŏk tơiung hloh”.

Vang hơdai ‘meh vă ‘noh, ƀok Nguyễn Thanh Dũng, Kơdră vei lăng Hơp tak xăh Choh jang sa Phước Thuận, Gia Lai akhan, ƀai toán anih jang kăl oei jing tơdrong tơm hăm tơring đak lơ̆p.

“Tơring đak lơ̆p kơna jing tơdrong pơchoh đak lơ̆p ‘noh kŭm tơƀơ̆p ưh kơ ‘lơ̆ng lơ. ‘Noh tơdrong găh anih jang kăl ‘noh kŭm ‘meh Teh đak bơngơ̆t truh: mă mônh ‘noh tơmơ̆t jên jang pơm trong nơnăm, mă 2 ‘noh tơdrong dơnâu mong đak, pơchoh đak lŏk”.

Yak truh Hop akŏm XIV kơ Đảng, yă Tô Thị Thu Hường, Phŏ Bí thư Đảng ủy phường Quy Nhơn, tơƀôh đon lui akhan tơdrong jang tơplih rơgoh mă Đảng tŏk bŏk chĕp kơ̆l pơgơ̆r, gô pơm lăp đei hơmĕng tih đơ̆ng kon pơlei, găh 1 tơdrong hơtŏk tơiung kơjăp tơ̆ hơnăp tŏ ‘mi kial tơplih. Hơdai hăm ‘noh, dôm trong jang hrơ̆ch đơ̆ng Hop akŏm, gô hơnhăk teh đak hơtŏk tơiung hrĕnh lơ̆m jăl jang ‘nao. Găh păih Đảng bộ phường, ling lang hơdrin pơjei jang iŏk jơnei kơkuh chơt hơiă hop akŏm:

“Đơ̆ng rŏng ƀơm ưh kơ ‘lơ̆ng đơ̆ng ‘mi kial hơbŭt ‘mi tih đak lơ̆p, Quy Nhơn hlôi ƀrư̆ ƀrư̆ tơiung ming yak truh Hop akŏm Đảng ‘măng mă XIV. Lơ̆m jơ ‘năr ƀrŭng ƀrăng hla kơ hơdai hăm ƀĕnh kơmâu cham char bri brăh hlôi pơm jing tơdrong ‘lơ̆ng hlôi kơchăng hơmet ăn tôch kơ hơlen vă bơ̆jang kiơ̆ ‘lơ̆ng dôm hơnăp jang đei pơjao. Kon pơlei phường Quy Nhơn tŏk bŏk lăng găh Hop akŏm hăm đon lui păng hơmĕng gĭt kăl lơ̆m dôm trong vă jang gĭt kăl đơ̆ng Đảng”.

Gơh ƀôh, đơ̆ng yan âu mơmat tat đơ̆ng tơring đak lơ̆p păh hơlĕch Gia Lai, dôm nơ̆r apĭnh, ‘meh vă đơ̆ng kon pơlei păng tơring tă kơ akŏm lơ̆m ‘meh vă kăl trong nơnăm, dơnâu đak kơ jăp ‘lơ̆ng, pơm lăp hăm tŏ ‘mi kial tơplih. Yak truh Hop akŏm bơngai tang măt lơ̆m teh đak ‘măng mă XIV kơ Đảng, đon lui păng hơmĕng đơ̆ng Kon pơlei đei pơtruh lơ̆m dôm tơdrong jang gĭt kăl, đunh đai, iŏk kon bơngai pơm tơm, iŏk tơdrong sơđơ̆ng, tơdrong jang sa păng hơtŏk tơiung kơjăp pơm trong jang đunh đai tai sơnăm.