Minh lơ̆m dôm hŏk tro đei jơnei kơjung lơ̆m 'măng pơlong tôt ngĭp THPT sơnăm ou noh oh Bùi Thanh Lâm – hŏk tro Hnam trưng THPT Chuyên Hùng Vương, oei tơ̆ phương Diên Hồng, dêh char Gia Lai. Lâm jĭ minh lơ̆m kơsô̆ hŏk tro  lơ̆m dêh char đei iŏk điểm 10 môn Nơ̆r Anh. Tơroi gah tơdrong đei jơnei ou, Lâm tôch chơt hơ-iă păng ưh kơ mah ê. Gah tơdrong hŏk pơhrăm, Lâm tơroi hơdah gah tơdrong kăp gĭt lơ̆m hŏk nơ̆r akŏm đei đơ̆ng lơ sơnăm kơ ou.

Mă kăl, oh oei kơchăng tơguăt hăm dôm trong pơhrăm nai nhen hŏk pơhrăm đơ̆ng kênh YouTube hăm nơ̆r Anh gah khua hŏk vă hơtŏk tơdrong mơ̆ng păng akŏm nơ̆r pơma. Pơhrăm lơ̆m điê̆n thoăi, Lâm tơroi: “Đê klah asong ăn hŏk tro hơdah, kơlih đei anih ƀônh noh tôch ƀônh, mă anih tơnap noh tôch tơnap. Inh kơchĕng vă đei iŏk điêm 10 noh athei đei akŏm đơ̆ng tơm oei 'lơ̆p truh dang ei, akŏm đei tư vư̆ng nơ̆r pơma; mưh băt gah ngư phap păng tôm tơdrong noh gơh chă pơm ƀai. Inh hơnơ̆ng pơhrăm kiơ̆ kênh YouTube đei lơ tư vư̆ng, đe pơma ƀônh vao nhen Bsport, dah mă Mini Earth păng lơ kênh nai dơ̆ng”.

Oh Bành Gia Huân, hŏk tro Hnam trưng THPT chuyên Lê Quý Đôn (Quy Nhơn) jĭ minh lơ̆m dôm hŏk tro hơgei hloh hăm ƀar điêm 10 môn Nơ̆r  Anh păng Vật lý. Tơdrong đei jơnei ou ưh hơdrô̆ jĭ tơdrong hơ-iă kơdih kơ oh mă oei jing tơdrong sô̆ hơ-iă atŭm kơ hnam trưng păng unh hnam. Vă đei jơnei ou, Bành Gia Huân hlôi akŏm khei năr hŏk pơhrăm kăp gĭt trŏ khua hŏk. Hăm môn Vật lý, tơdrong lăp kơ khua hŏk hlôi tơgŭm Huân tơguăt hăm môn hŏk ou tơnăp hloh. Oh hơnơ̆ng pơm dôm ƀai tơnap, chă hơlen hŏk dôm lĭ thuyêt păng pơm dôm đê pơlong lăng vă akŏm tơdrong vao păng pơm juăt hăm tơdrong tơnap lơ̆m lăm pơlong.

Hăm môn Nơ̆r Anh, mă ưh kơ ê hăm điêm đei iŏk mă lei oh adoi oei lui ngeh hăm tơdrong đei điêm kơjung gah môn hŏk mă kơdih po lăp: “Inh adoi ưh kơ ê kơlih môn Nơ̆r Anh hlôi thu iŏk tôm đê păng hla bar nhap pơm ƀai noh inh ưh gơh kơdih châ̆m hơlen. Tơ̆ trưng inh hŏk lăm chuyên Anh păng oei lơ̆m khul pơlong hŏk tro hơgei kơ teh đak noh đei hnam trưng pơtho pơhrăm lơ hloh. Oei tơ̆ hnam inh lăng dôm video pơdah hăm Nơ̆r Anh vă kơ chơt păng hŏk pơhrăm đei lơ tơdrong”.

Yă Nguyễn Thí Bé, mĕ Bành Gia Huân, ưh kơ mah ôn tơdrong sô̆ hơ-iă păng pơ-ư pơ-ang. Yă Bé tơroi, unh hnam hơnơ̆ng chă hơlêm, pơm trong hiôk hloh ăn kơ Huân chă hŏk pơhrăm. Hăm tơdrong hŏk hlôi đei păng sơkơ̆t hơdah, Huân tŏk bŏk kơchăng ăn tơdrong pơtơm năm hŏk đăi hŏk kiơ̆ tơdrong mă kơdih po hơpơi 'meh: “Inh hơpơi gơh đei năm hŏk Đăi hŏk Bách khoa pơlei tơm Hồ Chí Minh, gah Khua Khua hŏk Kŏng ngê̆ noh unh hnam hơnơ̆ng hơlêm tơgŭm, tơdrong hŏk noh tơnap noh athei mă hơdrin vă gơh kiơ̆ tom tơdrong hŏk pơhrăm”.

Lơ̆m kơsô̆ 327 hŏk tro tơ̆ Gia Lai đei iŏk điêm 10 tơ̆ 'măng pơlong tôt ngĭp THPT 2025 mă lơ noh hăm dôm môn lơ̆m grŭp Khua hŏk xah hô̆i păng Khua hŏk tư̆ nhiên. Tơdrong mă ou ăn ƀôh, tơdrong hơtŏ hơnơ̆ng lơ̆m pơtho hŏk pơhrăm păng tơdrong hŏk pơhrăm kơ đe hŏk tro lơ̆m tôm tơring tơ̆ dêh char.