Nhen kơtơ̆ng ang hlôi tơroi, kơsơ̆ năr 22/1/2026, Hop akŏm bơngai tang măt jơ̆p teh đak 'măng mă 14 kơ Đảng hlôi pôk Ƀan châ̆p hanh Trung ương Đảng jăl 14 đei 200 'nu jang, lơ̆m noh đei 180 'nu jang dơnơm păng 20 'nu jang hơmŏ.

Pơgê ou năr 23/1, Hop akŏm 'măng mă mônh Ƀan châ̆p hanh Trung ương Đảng jăl 14 pơtơm hop akŏm vă pôk Hơnih tơm Chinh trĭ, pôk Tổng Bí thư, pôk Ƀan Ƀĭ thư; tơmơ̆ng tơroi gah trong pơkăp dôm kơchư̆k kơdră kơpal kơ  Đảng, Teh đak păng tơgop nơ̆r gah kơchư̆k bơngai jang lơ̆m Hơnih juăt jang Ƀan Ƀĭ thư; pôk Hơnih jang Hơlen lăng Trung ương; pôk Kơdră Hơnih jang Hơlen lăng Trung ương.

Ƀan châ̆p hanh Trung ương Đảng jăl 14 hlôi drơ̆ng nơ̆r kơjung hloh pôk ƀok Tô Lâm, Tổng Bí thư Ƀan châ̆p hanh Trung ương Đảng jăl 13 pơtoi jang kơchư̆k Tổng Bí thư Ƀan châ̆p hanh Trung ương Đảng jăl 14.

Tổng Bí thư Tô Lâm răk 'măn lơ tơdrong kăp gĭt lơ̆m tơdrong pơgơ̆r Đảng păng tơlĕch trong jang ăn hơtŏk tơ-iung teh đak jô̆ đơ̆ng rŏng đei Ƀan châ̆p hanh Trung ương Đảng jăl 13 pôk jang kơchư̆k Tổng Bí thư Ƀan châ̆p hanh Trung ương Đảng Cộng sản Việt Nam jăl 13 ah khei 8/2024.

Tơdrong jang kăch mang pơkăp, bot 'lơ̆ng jơnŭm pơgơ̆r kơpal kiơ̆ Tơchơ̆t kơsô̆ 18-NQ/TW đei tơlĕch jang kơtang lơ̆m tŏ sĕt năr, hăm pơkăp tih hloh đơ̆ng sơ̆ truh dang ei păng đei jơnei ƀôh hơdah, ưh hơdrô̆ tơjur kơsô̆ hơnih jang, tơjur ƀiên chê̆ bơngai jang, tơjur jên huach hơnơ̆ng mă kăp gĭt hloh noh hlôi hơtŏk 'lơ̆ng jơnŭm jang, tơjur ƀiơ̆ tơdrong pơm kơdranh ou to, asong tăl pơgơ̆r đei hơtŏk kơtang tơguăt tơjê̆ hăm kon pơlei hloh; pơm jang pơvih ăn kon pơlei tơnăp hloh, akŏm jơhngơ̆m pran vă hơtŏk mŭk drăm – tơpôl ăn jăl jang đơ̆ng rŏng.

Đơ̆ng hơtuch sơnăm 2024 truh dang ei, Hơnih tơm Chinh trĭ hlôi tơbang 9 tơchơ̆t kăp gĭt vă pơm jang lơ̆m tôm tơdrong jang dơnơm kơ teh đak. 'Nou jĭ dôm tơchơ̆t jang tih, drơ̆ng minh, tơƀôh đon tơchĕng tơplih 'nao, sơkơ̆t lăng truh đunh khei năr păng pơkăp chinh trĭ jang khŏm mă đei jơnei đơ̆ng Đảng; jing tơdrong tơm hơ-'nhăk teh đak hơtŏk tơ-iung pơdrŏng păng jơnap hloh lơ̆m anglŏ sơnăm hơtŏk tơ-iung 'nao.

Chih gah tơdrong hơrih ƀok Tô Lâm, Tổng Bí thư Ƀan châ̆p hanh Trung ương Đảng jăl XIV

Năr rơneh:  10/7/1957        Drănglo/drŏkăn: Drănglo         Hơdrung: Kinh.

- Pơlei pơla tơm: Xah Nghĩa Trụ, apŭng Văn Giang, dêh char Hưng Yên.

- Tơdrong hơrih jang xa kơ unh hnam: Kan ƀô̆.

- Tơdrong jang ah đei iŏk jang: Hŏk tro.

- Năr đei tơmơ̆t jang lơ̆m Kŏng an kon pơlei: 10/1974.  

- Năr đei tơmơ̆t Đảng: 22/8/1981.       Năr pơkăp: 22/8/1982

- Tơdrong hŏk pơhrăm:

        + Pơtho pơhrăm phôh thŏng: 10/10.

        + Hŏk gah tơdrong jang: Đăi hŏk An ninh nhân dân.

        + Pơkăp tăl hŏk pơhrăm: Giáo sư, Tiến sĩ.

        + Lĭ luâ̆n chinh trĭ: Cao cấp.

        + Nơ̆r teh đak đe: Anh C

Tổng Bí thư Tô Lâm jĭ Bơngai jang lơ̆m Hơniht ơm Chinh trĭ jăl XII, XIII, XIV; Jang lơ̆m Trung ương Đảng jăl XI, XII, XIII, XIV; Jang tang măt ăn Kuô̆k hô̆i jăl XIV, XV.

Năr 22.1.2026, tơ̆ Hop akŏm bơngai tang măt jơ̆p teh đak 'măng mă 14 kơ Đảng, ƀok đei pôk jĭ Bơngai jang lơ̆m Trung ương Đảng jăl XIV, jăl jang 2026 - 2031.

Pơgê năr 23.1.2026, tơ̆ Hop akŏm 'măng mă mônh Ƀan châ̆p hanh Trung ương Đảng jăl XIV, ƀok đei pôk jang lơ̆m Hơnih tơm Chinh trĭ jăl XIV păng đei pôk jang kơchư̆k Tổng Bí thư khóa XIV.