Tơ̆ cham hnam trương jăl ƀar Nguyễn Văn Cừ, pơlei tơm Buôn Ma Thuột, dêh char Dak Lăk, rim đe oh hŏk tro chơt hơ iă chă pơm ngôi nhen tơdui, hơsoang sạp, chô̆ măt tơchă rôp dih băl. Oh Nguyễn Việt Hùng, hŏk tro lăm 8B, tơbăt, ‘nou ưh khan lăp tơdrong pơchơt mă oei jing tơdrng pơgơ̆r hơlen hlôh vao tơdrong oei sa joăt joe sơ̆ ki kơ hơdrĕch hơdrung, kơ yuơ hnam trương pơgơ̆r ƀlep lơ̆m jơ ‘năr Soi tơbeh ƀok dơnơm Hùng Vương:“Hloh đơ̆ng pơgơ̆r ou oh tôch kơ hôn bơnê tơdrong joăt joe kơ hơdrĕch hơdrung păng jei hlôi tơgŭm ăn kơ oh băt hlôh hloh dơ̆ng găh tơdrong oei sa joăt joe sơ̆ ki. Oh tôch bơnê găh tơdrong tơgop tih tên tơ iung pơjing teh đak đơ̆ng ƀok pơtao Hùng. Jĭ mĭnh ‘nu bơngai hŏk tro kơna oh gô hơdrin hŏk pơhrăm pơnam vă hoei lao đon ƀok thây kô păng mĕ ƀă păng tơgăl hăm hơnăn kôn mon kon sou gơ̆h găt kơ Ƀok Hô”

Găh oh Trần Văn Bảo jei hŏk mĭnh lăm ‘noh tôch hơ iă hăm dôm tơdrong chă pơm tông đơ̆ng bôl boăl lơ̆m lăm găh tơdrong tơroi kră sơ̆ “bánh chưng bánh dày”.“Rim đe boăl chă pơm tông tôch hơ iă păng oh tpôch lăp đon păng ‘meh vă hloh ‘noh chă pơm tông găh tơdrong tơroi kră sơ̆ kơ tơm a la chă bánh chưng, bánh dày. Tơdrong pơm tông ou hlôi tơgŭm ăn kơ bơ̆n băt hlôh ƀôh hơdăh hloh dơ̆ng tơdrong oei sa joăt joe ‘lơ̆ng rŏ sơ̆ ki. Đơ̆ng tơdrong ou oh jei gô hơdrin hŏk pơhrăm hloh dơ̆ng vă đei jing mĭnh ‘nu kon pơlei đei iŏk yua ăn tơpôl.”

Đơ̆ng blŭng khei 3 âm lĭch hloi, ƀok thây kô păng hŏk tro hnam trương jăl ƀar Nguyễn Văn Cừ, hlôi chă pơhrăm tôch tơnăp rim tơdrong pơgơ̆r joh ayŏ kơdŏ soang vă vang năm pơgơ̆r. Hăm hơnăn “ Kôn mon kon sou Lạc Hồng” ‘măng pơgơ̆r ou lăng truh năr Soi tơbeh Ƀok dơnơm Hùng Vương (10/3 âm lịch). Kô pơtho Vũ Thị Thu Hằng, bơngai chĕp kơ̆l Khul pơtho Lịch sử - Địa lý – Giáo dục công dân kơ hnam trương tơbăt: Ưh khan lăp hơdrô̆ tơdrong hŏk pơhrăm đĕch nhôn oei ‘meh vă đe hŏk tro ƀôh hơdăh tơdrong gĭt kăl kơ năr soi tơbeh ƀok dơnơm, vă đe oh băt hlôh lơ lou jơhngơ̆m đon ‘mêm kơ eng teh đak ưh khan lăp nơ̆r pơma mă oei iung jang hloi.“Lơ̆m tơdrong pơgơ̆r Kôn mon kon sou Lạc Hồng, khul hlôi pơtho tơƀôh ăn đe oh băt, đơ̆ng noh tơchă dôm ƀai hơri hơ ‘nguơ̆i kơ yă Âu Cơ, Lạc Long quân păng ăn đe oh pơm pơjing tơdrong chơt hơ iă hloh dơ̆ng ‘noh jĭ tơdrong tơm a la chă bánh chưng, bánh dày kơ chăl ƀok pơtao Hùng, tơroi dơ̆ng tơdrong ƀok pơtao Hùng hlôi pơjao tŏk pơm pơtao ăn kơ Lang Liêu, găh tơdrong tơroi 100 kơtăp cheh đei 100 ‘nu kon hăm tơdrong pơgơ̆r hơsoang kơ đe oh. Đơ̆ng dôm tơdrong pơgơ̆r ou tơgŭm ăn đe oh chă pơgơ̆r pơchơt tơdrong pơchơt kră sơ̆ kơ rim tơring vă pơjing đei jơ ‘năr chơt hơ iă ‘nă hal hloh”. 

Vă tơgŭm ăn hŏk tro băt hlôh chăl sơnăm sơ̆ ki, hnam trương jei pơgơ̆r ‘măng pơlong tơchă băt hlôh găh chăl Hùng Vương, hlôi hơvơn đei lơ đe oh vang pơlong. Đe oh đei klăh asong jing khul vă tơl nơ̆r apĭnh găh chăl sơnăm sơ̆ ki, găh tơdrong oei sa joăt joe sơ̆ ki păng găh tơdrong tơroi đei ƀơm truh rim ƀok pơtao Hùng. Atŭm hăm ‘noh, rim lăm oei hơmet ăn dôm tơdrong chă pơm tông dôm tơdrong tơroi kră sơ̆ đe  ư hơnhang ang hơnhăk nhen: Sơn Tinh – Thủy Tinh; Tơm a la chă bánh chưng, bánh dày… đơ̆ng noh tơgŭm ăn đe oh băt hlôh hloh dơ̆ng tơdrong oei sa sơ̆ ki kơ hơdrĕch hơdrung. Oh Nguyễn Hoàng Nam, hŏk tro lăm 8C, hnam trương jăl ƀar Nguyễn Văn Cừ, chơt hơ iă tơroi:“Ĭnh pơm kon tơdăm ƀok pơtao Đệ Nhị lơ̆m pơm tông găh tơdrong tơroi kră sơ̆ bánh chưng, bánh dày. Hloh đơ̆ng pơgơ̆r ou, ĭnh bôh tơdrong gĭt kăl kơ tơdrong ƀok pơtao Hùng hlôi pơjao tŏk pơm pơtao ăn Lang Liêu kơ yuơ bơngai hơgei, đei jơhngơ̆m đon ‘lơ̆ng adoi hơgei lơ̆m tơdrong jang sa. Đơ̆ng noh jei pơm hơtŏk ăn jơhngơ̆m đon tơchăr lơ̆m tơdrong jang kơ kon pơlei Việt Nam.  Ĭnh jei sa roi hưch hanh hơmanh bơnê kơtang hloh dơ̆ng kơ hơdrĕch hơdrung bơ̆n”.

Kiơ̆ kơ ƀok Nguyễn Văn Lợi, Kơ iĕng Kơdră chĕp pơgơ̆r hnam trương jăl ƀar Nguyễn Văn Cừ, pơlei tơm Buôn Ma Thuột, dêh char Dak Lăk, tơdrong pơtho pơhrăm lĭch sư jei nhen pơtho tơbăt tơdrong joăt joe sơ̆ ki kơ rim hnam trương hrei ou tôch ‘lơ̆ng hơ iă. ‘Ngoăih tơdrong joăt joe ‘noh năm pơm lêh, soh hlôt nhang tơ̆ hơnih soi tơbeh ƀlŏk hơdơ̆r kơ pơtao Hùng, lơ̆m chăl sơnăm hle đei lơ trong tơgŭm ăn đe oh hŏk tro vang pơgơ̆r vă băt hlôh găh tơm a la chă kơ hơdrĕch hơdrung bơ̆n:“Pơtho tơbăt ăn đe oh lăng truh tơm a la chă, băt găh kôn mon kon sou Lạc Hồng păng pơtho tơbăt ăn đe oh băt ‘mêm kơ eng, chu yom mĕ ƀă yă ƀok bơ̆n hlôi tơ iung pơjing păng vei lăng Teh đak vă đe oh ƀôh hơnăp jang kơdih lơ̆m tơdrong tơ iung pơjing teh đak. Tơdrong pơtho pơhrăm ou đei pơgơ̆r hơnơ̆ng, pơjing ăn đe oh lŭ lăp, hưch hanh hloh dơ̆ng mưh đe oh năm hŏk pơhrăm tơ̆ hnam trương”.

‘Moi kiơ̆ rim tơdrong pơgơ̆r ou, hăm trong pơgơ̆r ‘lơ̆ng hơ iă ưh khan lăp tơgŭm ăn hŏk tro Dak Lăk băt hlôh dơ̆ng găh chăl sơnăm sơ̆ ki mă lei oei pơhrăm lơ̆m jang kiơ̆ khul, jơhngơ̆m đon tơgoăt tơgoăl păng băt ‘mêm kơ eng hăm tơm a la chă kơ hơdrĕch hơdrung. ‘Nou jĭ dôm tơdrong git kăl hloh tơgŭm ăn đe oh chĕp răk tơƀăk vei kơjăp jơhngơ̆m đon ‘mêm kơ eng teh đak, kiơ̆ yok rok jơ̆ng joăt joe “Nhă đak cham kơ tu” kơ hơdrĕch hơdrung Việt Nam.