Khei 12 mă lei tơ̆ tơring găh Pơmât dêh char Lâm Đồng oei hơnơ̆ng đei ‘mi. Tơ̆ dôm jăl trong gre tơm gĭt kăl kơ dêh char, nhen: Trong gre 20, 27, 27C, 28, 28B… hơnơ̆ng ƀôh đei teh hơlih tŏk bŏk đei pơm hơmet ming. Kŭm hăm ‘nŏh jĭ dôm tơdrong hiong răm yoa đơ̆ng ‘mi tih, đak lơ̆p pơm tơlĕch tơ̆ lơ jăl trong krang đơ̆ng krang Frenn, Mimosa, D’ran truh Đại Ninh, Sông pha, Gia Bắc… Yoa ‘mi tih, đơ̆ng lơ khei ‘nâu, dôm khul jang kơpal kơ dêh char Lâm Đồng trư̆k prăt măng, prăt năr tơ̆ lơ anih đak lơ̆p, teh hơlih krê hơmơt păng hơnơ̆ng đei đon kơchăng pơjing dơ̆ng dôm anih gak vă vei lăng sơđơ̆ng ăn trong gre pơyoa ăn kon pơlei yak vih vât.

‘Nhŏng Nguyễn Duy Hưng, dân quân xăh Hiệp Thạnh, dêh char Lâm Đồng hơnơ̆ng vang trư̆k tơ̆ dôm anih đak lơ̆p tơ̆ trong gre 20 trong tơklăh 3 K’Rèn, tơroi: “Nhôn hơnơ̆ng gak vei sơđơ̆ng trong nơnăm ăn kon pơlei, tơƀôh trong ăn gre kơdâu hlôi dôm anih đak lơ̆p. ‘Nhŏng oh klăih song pơm 2 grŭp tơ̆ păih âu păng păih to anih đak lơ̆p. Inh hơnơ̆ng trư̆k tơ̆ âu vă vei lăng sơđơ̆ng ăn kon pơlei yak vih vât ƀât anih âu gơ̆h sơđơ̆ng ‘lơ̆ng”.

Lơ̆m khei ‘năr đei ‘mi tih đak lơ̆p, khul linh kanh sat vei lăng trong gre Công an dêh char Lâm Đồng bơ̆ jang ưh đei năr pơdơ̆h, ưh jô̆ tơ̆ măng dăh mă tơ̆ ‘năr hơnơ̆ng đei măt tơ̆ trong vă pơtho tơƀôh păng tơgum ăn dôm gre kơdâu vih vât sơđơ̆ng ‘lơ̆ng. Thiếu tá Nguyễn Duy Hùng, Công an xăh Đơn Dương, ăn tơbăt, dôm năr ‘mi tih, đak lơ̆p, kăn ƀô, linh hơnơ̆ng krao akŏm tôm bơngai vang bơ̆ jang: “Công an xăh Đơn Dương ăn khul linh chính quy păng khul linh vei sơđơ̆ng tơ̆ tơring gak prăt măng, prăt năr. Hăm dôm kon pơlei tơƀâp pơmat tat chơ pơdŭ tơmam, chông tơlĕch kon pơlei đơ̆ng tơring krê hơmơt. Tơ̆ dôm jăl trong gre tơm đei khul linh kanh sat vei lăng trong gre jang hơdoi hăm Công an xăh tơƀôh trong ăn gre kơdâu tơ̆ dôm anih gĭt kăl , hơmơt kơđak lơ̆p”.

Lơ̆m ‘măng ‘mi tih đak lơ̆p đơ̆ng ‘năr 16/11 truh ‘năr 5/12 tơ̆ dôm jăl trong gre kơ dêh char Lâm Đồng đei hlŏh 350 anih teh hơlih. Đei jơnăr tơring kơdrâm Đà Lạt dơ̆ng tơ̆ hơnăp tơdrong ưh gơ̆h mât lĕch, mưh krang D’ran, Mimosa, Frenn tơtă đei teh hơlih ngăl, oei 2 tŏ trong krang oei đei dơ̆ng ‘nŏh: Sacom Tuyền Lâm, Tà Nung kŭm tôch krê kơ teh hơlih, chĭt găn trong ‘năi. Vă hơmet pơ ‘lơ̆ng, vei kơjăp trong gre tơm kơdră chĕp kơ̆l dêh char Lâm Đồng kŭm hăm dôm anih jang kơpal kơtă lơ̆m năr ‘mi tih, đak lơ̆p, teh hơlih oei hơnơ̆ng năm truh tơ̆ rim jăl trong, akŏm tôch ai khul bơngai jang, gre kơmăy kơmŏk, vei lăng trong, hơmet ming teh hơlih pơm ‘lơ̆ng ăn gre kơdâu vih vât.

Ƀok Nguyễn Hồng Hải, Phŏ Kơdră vei lăng kon pơlei dêh char Lâm Đồng ƀât oei đei măt tơ̆ anih teh hơlih kŭm nhen lơ̆m dôm ‘măng hop akŏm hăt hot tơ̆ kơmăng hơnơ̆ng tơƀôh hơdăh dôm tơdrong ưh ‘lơ̆ng, dôm tơdrong tơm pơm ăn teh hơlih păng trong hơmet ming: “Trong krang Frenn đei hơmet ming đang bơih mă lei dang ei đơ̆ng rŏng kơ ăn gre kơdâu đei ƀôh lơ tơdrong ưh hơiă. Ưh đei tơnăr găn teh, chuơh hơlih. Răih nang teh dơ̆k chĭt, pơm ăn đak ưh gơ̆h ro, jing blai tơ̆ trong. Đơ̆ng dôm tơdrong thoi noh athei chih tơlĕch trong hơmet mă lăp. Kơchăng klăih song hơnăp jang, vei lăng tơ̆ dôm anih, vei lăng dôm jăl trong hơmơt đei teh hơlih vă kơchăng hơmet pơ ‘lơ̆ng, dăr lăng adrol, lơ̆m păng đơ̆ng rŏng kơ đak lơ̆p”.

Ƀât mă ‘mi tih đak lơ̆p, teh hơlih đei tơ̆ lơ anih, tơ̆ jơ̆p tơring lơ̆m dêh char, tơdrong adrin đơ̆ng khul kơdră  tơring păng khul jang kơpal kơ dêh char Lâm Đồng lơ̆m tơdrong vei sơđơ̆ng tơ̆ trong gre đei kon pơlei tơchĕng ‘lơ̆ng. ‘Nhŏng Trần Văn Hoàng, tơ̆ kueng kơphô̆ Nhà Chung, phường Xuân Hương- Đà Lạt, ăn tơbăt: “Inh ƀôh kanh sat vei lăng tơ̆ trong gre neh, đe linh ƀô đô̆i, khul linh dân quân vang tơgŭm ăn kon pơlei tôch 'lơ̆ng. Khul jang kơpal 'mi pă lăng, prăng pă lê̆ bơ̆ jang tôch đei yoa, tôch 'lơ̆ng”.

Ƀok Hồ Văn Mười, Kơdră vei lăng kon pơlei dêh char Lâm Đồng, pơma hơdăh: “Lơ̆m ‘măng ‘mi tih âu ki tơ̆ dêh char hơnơ̆ng đei lơ tơdrong krê hơmơt ‘nŏh jĭ lơ jăl trong đei tih hơlih. Rim anih jang chinh trĭ vang bơ̆ jang tôch ‘lơ̆ng, mă loi jĭ khul linh ƀô đô̆i păng công an. Lơ jăl trong đei teh hơlih lơ̆m khei ‘năr hrôih hlŏh nhôn hlôi chưk hơmet teh, ăn gre kơdâu dơ̆ng, ưh đei lê̆ gre chĭl hrăt, đom rok trong mât tơ̆ Đà Lạt mă loi ƀât trong krang Mimosa păng Frenn. Kơdră chĕp kơ̆l anih tơm, anih jang kơ pal kơ Trung ương tơchĕng ‘lơ̆ng. Trong krang Mimosa jang tôch hrĕnh, lơ̆m dang 8 năr nhôn hlôi chưk hơmet đang teh hơlih chĭt trong ăn gre kơdâu hơlơ̆k dơ̆ng. Anih tơm vei lăng ming man truh hơlen păng tơchĕng ‘lơ̆ng ki thuơ̆t jang adrol kơ ăn gre kơdâu dơ̆ng”.

Lơ̆m dôm năr ‘mi tih âu ki, tơdrong vang jang tôch pơneh đơ̆ng Khul kơdră pơgơ̆r dêh char Lâm Đồng kŭm hăm đon tơnăp, ưh jô̆ kơmăng dăh mă kơ ‘năr đơ̆ng khul jang kơpal, công an, ƀô đô̆i vang tơgop vei lăng ‘lơ̆ng ăn trong gre tơm kơ dêh char gơ̆h yak vih vât hiôk hian. Akhan tŏ ‘mi kial kơnê̆ âu hui kơ đei, ưh đei băt hơdrol, kŭm hăm đon adrin hơmet pơ ‘lơ̆ng hiong răm vă lăng trong gre gơ̆h yak vih vât hiôk hian, dêh char Lâm Đồng oei chih tơlĕch dơ̆ng lơ trong jang tôch rơđăh vă pơjing ming man dôm jăl trong roi đunh roi kơjăp ‘lơ̆ng, sơđơ̆ng ‘lơ̆ng hơiă ƀiơ̆.