Đơ̆ng rŏng kơ tơmơ̆ng nơ̆r pơtruh, sơkơ̆t pơtôch jơ pơm jang, Tổng Bí thư, Kơdră teh đak bơ̆n Tô Lâm ră hơdah, tơdrong jang tang găn păng tơjră tŏ 'mi kial pơrăm đơ̆ng dang ei truh đĭ sơnăm 2026 ưh hơdrô̆ jing sơnong jang tơjră đĕch ôh, mă jing tơdrong hơlen lăng tơdrong hơgei lơ̆m pơgơ̆r jang kơ tôm hơnih jang chinh trĭ; jing tơdrong kăp gĭt vă vei sơđơ̆ng tơdrong hơrih kon pơlei, vei lăng tơdrong jang đei lơ̆m hơtŏk tơ-iung kơ dôm tơring. Tổng Bí thư, Kơdră teh đak bơ̆n ră hơdah 5 tơchơ̆t pơgơ̆r jang tih, lơ̆m noh athei vei lăng sơđơ̆ng tơdrong hơrih kon pơlei jing tơdrong kăl hloh, jing sơnong jang tơm hloh. Kơlih mŭk drăm 'noh gơh chă pơm tơlĕch dơ̆ng, tơdrong jang gơh chă ming hơmet, pơyan jang xa gơh pơm jang dơ̆ng, mă lei tơdrong hơrih kon bơngai noh ưh đei kiơ gơh tơvih.

Rim trong jang, rim tơchơ̆t pơgơ̆r, rim khul jang athei akŏm lơ̆m vei lăng tơdrong hơrih ăn kon pơlei noh mă tơm, mă kăl noh bơngai kră, đe hơ-ioh, đe drăkăn oei hơnăp, bơngai hơven hơvo, kon pơlei tơ̆ tơring hli hlơt; atŭm hăm noh, tơdrong jang tang găn athei yak minh jăl. Ƀok pơtruh nơ̆r: rim hơnih jang tơm, rim tơring athei băt hơdah trong jang vă tơjră hăm El Nilno, tŏ pơđang, đak ƀăt hram, ưh kơ mah đak, unh xa bri; atŭm hăm noh dôm trong jang tang găn păng tơjră 'mi kial đak hơbông, teh hơlih, đak lơ̆p tơ̆ tơring kơdrơ̆m, hơmet dơnou mong pơnơ̆ đak. Trong tơlĕch jang athei tơguăt hăm rim tơring, rim thong hơbong đak, rim tơdrong ming man, rim kueng kon pơlei oei xa. Ƀơ̆t 'măng ou, Tổng Bí thư, Kơdră teh đak bơ̆n Tô Lâm adoi pơgơ̆r, hơtŏk 'lơ̆ng tơdrong tơroi tơbăt truh hăm kon pơlei; mă kăl kơhret kơjăp pơkăp, pơjing, hơmet 'lơ̆ng mŭk drăm cham char.