Pơgê năr 21/1, ƀok Đỗ Tiến Sỹ, Kơdră jang lơ̆m Trung ương Đảng, Kơdră jang lơ̆m Khul kơdră chĕp pơgơ̆r Đang ƀô̆ Khul kơdră chĕp pơgơ̆r teh đak, Ƀĭ thư Đang uỷ, Kơdră chĕp pơgơ̆r Radiô Nơ̆r Pơma Việt Nam hlôi năm dăr lăng, hơlêm jơhngơ̆m đon ăn rim bơngai chih kơtơ̆ng ang, bơngai chih akom, bơngai jang kih thuơ̆t tŏk bŏk bơ̆ jang chih kơtơ̆ng ang lơ̆m hơnih jang kơ VOV tơ̆ Hơnih tơm chih kơtơ̆ng ang Hop akom tih ‘măng mă XIV. Hơlêm rim bơngai chih kơtơ̆ng ang, bơngai chih akŏm, bơngai jang kih thuơ̆t tŏk bŏk chă lăng rim kơdră tang măt pơma dơnuh găh Hla bơar tơchơ̆t kăl kơ Hop akŏm tih tơ̆ hnam hop akŏm lơ̆m pơgê năr 21/1, Kơdră chĕp pơgơ̆r Radiô Nơ̆r Pơma Việt Nam Đỗ Tiến Sỹ athei rim khul jang lăng kơjăp rim tơdrong jang kơ Hop akom tih ‘măng mă 14 kơ Đảng. Lơ̆m ou, Ban Thời sự VOV1 chih tơbăt tĕnh koăng rim ‘măng pơma dơnuh vă rapor dôm tơdrong kăl kơ Hla bơar tơchơ̆t kăl truh hăm kang ƀô̆, đang viên păng kon pơlei. Kơdră chĕp pơgơ̆r VOV athei rim bơgai jang chih kơtơ̆ng ang kăl lăng kơjăp, đei dơ̆ng dôm tơdrong kơtơ̆ng ang tăp dăr ‘măng Hop akom tih vă tơgop sơkơ̆t hơdăh jơhngơ̆m đon lui kơjăp lơ̆m dôm tơdrong kơ Hop akŏm tih, măkăl nơ̆r iung pơma đơ̆ng Tổng Bí thư Tô Lâm păng rim nơ̆r tơgop đơ̆ng rim kơdră tang măt.