Yă Phúc Bình Niê Kdăm rơneh rơneh ‘năr 8/9/1983, bơngai Ê Đê, pơlei pơla tơ̆ xăh Ea Pốk, apŭng Cư M’gar, dêh char Đắk Lắk (dang ei ‘noh xăh Quảng Phú, dêh char Đắk Lắk); hŏk đang cử nhân luật, cử nhân mŭk drăm, cao cấp lý luận chính trị. Hơdrol kơ đei pôk pơm Phŏ Kơdră Jơnŭm pơgơ̆r kon pơlei dêh char, yă ‘noh jĭ bơngai tang lơ̆m Anih jang Đảng dêh char, Phŏ Kơdră Khŭl Tơ roi tơbăt păng Krao hơvơn kon pơlei Anih jang Đảng dêh char Đắk Lắk.

Pơtôch pôk rơih tơ̆ ‘măng hop akŏm tơdrong jang ‘măng mă 5 đei Jơnŭm pơgơ̆r kon pơlei dêh char Đắk Lắk pơdrơ̆ng kiơ̆ ƀlep tơdrong hơgăt. Jơnŭm pơgơ̆r kon pơlei dêh char pơjao ăn kơdră chĕp kơ̆l Jơnŭm pơgơ̆r kon pơlei dêh char chih pơkeh dôm hla ar ƀơm truh vă pơtruh ăn Anih chĕp kơ̆l pơgơ̆r Quốc hội kĭ ăn kiơ̆ tơdrong hơgăt đơ̆ng khôi luơ̆t.