VOV4.Bahnar - An^h vei lăng kon pơ lei de#h char Lâm Đồng ‘nao đei hla ar athei hơ to\k loi dơ\ng tơ drong jang vei lăng bri, dăr hơ len, pơm hơ dăh păng sek phak kơ hret rim pơm glăi kiơ\ athei đơ\ng Pho\ thủ tướng te\h đak. Khei ‘năr tơ je# âu, tơ\ Lâm Đồng hơ nơ\ng đei [o#h lơ an^h tơ to\ phă bri, lơ\m no\h đei ‘măng pơ răm, ot io\k glăi bri hơ ngo găh xăh Phi Liêng, apu\ng Đam Rông; ‘măng ot io\k glăi lơ ‘long hơ ngo t^h vă tơ gar io\k te\h jang sa păng pơm hnam oei tơ\ thị trấn Nam Ban, apu\ng Lâm Hà.

Kiơ\ kơ an^h vei lăng kon pơ lei de#h char Lâm Đồng, khei ‘năr âu ki mă đơ\ng de#h char hlôi đei lơ hla ar athei hơ to\k loi dơ\ng rim trong jang kơ hret vă jang kiơ\ tơ drong jang vei lăng bri mă lei tơ drong pơm glăi oei đei [o#h krê hơ mơt. Tơ\ hơ năp tơ drong ‘nâu, de#h char Lâm Đồng hơ nơ\ng athei Ko\ng an de#h char păng rim an^h jang [ơm tru\h hơ to\k loi dơ\ng tơ drong jang dăr hơ len, sek phak kơ hret rim bơ ngai pơm glăi.  

Thuem: Tơ blơ\