VOV4.Bahnar - Tây Nguyên đei lơ tơ drong ‘lơ\ng găh cho\h jang xa, mă lei tơ drong ‘lơ\ng âu tam đei io\k yoa đ^ yoa tơ mam jang đei chă te\ch hơ yoh lơ lo\h hloi đe\ch. Tơ drong hơ nhăk te\ch dôm tơ mam đei ot, pơm hơ met ‘lơ\ng tơ\ ‘ngoăih ku\m tơ [âp lơ tơ drong mơ mat tat ‘năi, yoa [ơm truh lơ tơ drong, lơ\m no\h đei kơ [i, tơ pu tăh, kơ mak, anăn tơ mam drăm… tơ tă jing dôm tơ drong mă kon pơ lei păng an^h te\ch mơ dro tơ\ Tây Nguyên tam năng kăl. Yoa thoi no\h, lơ tơ mam drăm đơ\ng Tây Nguyên đei đe tơ gar io\k anăn, tơ [âp mơ mat tat mưh chă te\ch mơ dro tơ\ ‘ngoăih. Mă tơ pă, tơ drong ‘nâu kơ lih yoa dôm an^h te\ch mơ dro tam mă bơ be\ng truh Luât io\k yoa tơ drong pơ che\h rơ gei.

Tơ\ Gia Lai dang ei đei hlo\h 3.000 an^h te\ch mơ dro, mă lei ‘nao đei 165 an^h te\ch mơ dro đei hla ar vei lăng kơ mak tơ mam; 10 an^h jang k^ măt ăn tơ mam đơ\ng kơ măy pơm, hui bơ ngai, khul gru\p pơm hla ar vei lăng tơ mam pơ che\h/trong jang đei yoa.

{ok Trần Đông Lâm-Kơ dră An^h vei lăng tơ drong juăt jang, găh An^h vei lăng jang khoa ho\k păng kơ măy kơ mo\k dêh char akhan, dôm an^h te\ch mơ dro lăp năng kăl truh tơ drong vei lăng kơ mak tơ mam ‘no\h yoa tam mă băt hơ dăh găh Luât io\k yoa tơ drong pơ che\h rơ gei hăm jơ hngâm đon ơm, hăm dôm kơ so# jên thu, jên athei nôp mưh pơm hla ar. M^nh [ar an^h jang oei lăng pơ hơi tơ drong ‘nâu yoa tam mă băt truh tơ drong mơ mat tat mă an^h jang kơ dih kâu tơ [âp lơ\m tơ drong te\ch mơ dro mưh ưh đei pơm hla ar chih tơ băt tơ mam pơ che\h rơ gei, ku\m nhen tam mă băt dôm tơ drong đei yoa mă an^h te\ch mơ dro kơ dih đei xa yoa mưh kơ mak tơ mam đei pơm hla ar tơ băt. Lơ an^h te\ch mơ dro đa gô truh tơ mam kơ dih kâu đei đe pơm ya, đe te\ch pơ gâm tơ\ ‘ngoăih ‘no\h pơ tơm năm pơm hla ar vei lăng, mă lei kơ plăh âu, an^h te\ch mơ dro đ^ pu\ lơ hiong răm bơih.

Ưh lăp kơ dih kâu, an^h te\ch mơ dro ưh gan băt, ưh gan tơ rek truh tơ drong pơm hla ar tơ băt anăn tơ mam kơ dih đe\ch, mă jo# hloi tơ ring tơ rang ku\m hut hơ chăng le# dôm tơ mam ‘lơ\ng đei kơ tă lơ\m tơ ring hai. Gia Lai j^ tơ ring đei lơ tơ mam drăm đơ\ng cho\h jang xa ‘lơ\ng, nhen : Tiu Chư Sê, che\h phe Gia Lai, đak sut Gia Lai, [um yoăn Lệ Cần, hât hla Krông Pa… mă lei truh dang ei tơ drong chih kơ mak, pơ jing anăn ăn dôm tơ mam âu oei tôch tơ hlăk tăk. Hrei ‘nâu lơ\m dêh char ‘nao đei hơ dro# “Tiu Chư Sê” đei chih tơ băt anăn tơ pôl, oei hât hla Krông Pa ‘nao vă pơm hla ar chih tơ băt đe\ch. Mă đơ\ng hlôi đei lơ [ai ho\k kăl găh tơ drong hiong anăn tơ mam, kơ lih yoa ưh jăh pơm hla ar vei lăng tơ\ m^nh [ar dêh char nhen: anăn che\h phe Buôn Ma Thuột đei đe io\k pơm anăn tơ mam tơ\ Trung Quốc, Pơ gang Ama Kông đei đe tơ gar io\k anăn, pơm tơ le\ch te\ch mơ dro kư\ kă tơ\ ‘ngoăih.

Mă tơ pă, tơ drong pơm hla ar vei lăng anăn, kơ mak tơ mam ưh lăp tơ gu\m ăn an^h te\ch mơ dro sơ đơ\ng jơ hngâm jang xa, hơ to\k io\k yoa đơ\ng tơ mam drăm đe\ch mă oei tơ gu\m ăn bơ ngai răt sơ đơ\ng jơ hngâm [iơ\ mưh chă rơih, răt tơ mam, huei kơ hli răt [ơm tơ mam ya, tơ mam ưh ‘lơ\ng. Vă tơ gop pơm hơ to\k tơ drong tơ roi tơ băt, tơ [ôh trong găh tơ drong pơm hla ar vei lăng tơ mam pơ che\h rơ gei hăm dôm tơ mam kơ măy kơ mo\k, atu\m hăm ‘no\h tơ gu\m dôm an^h te\ch mơ dro, rim bơ ngai băt hơ dăh [iơ\ găh dôm hla ar kăl vă pơm hla ar vei lăng tơ mam đơ\ng kơ dih pơ che\h đei, An^h vei lăng jang khoa ho\k păng kơ măy kơ mo\k Gia Lai hlôi chih tơ le\ch lơ hla ar pơ tho găh tơ drong k^ măt pơm hla ar tơ băt anăn, kơ mak, um rup tơ mam kơ măy kơ mo\k, tơ drong pơ che\h rơ gei/trong jang đei yoa. Găh no\h dơ\ng, An^h âu oei chih hla ar tơ roi tơ [ôh ăn Dơ no\ an^h vei lăng kon pơ lei dêh char tơ le\ch tơ drong tơ chơ\t tơ gu\m ăn dôm an^h jang, khul gru\p, rim bơ ngai pơm hla ar vei lăng anăn tơ mam drăm đơ\ng 50-100% jên nôp mưh năm pơm hla ar blu\ng a.

Dơ\ng: Tơ blơ\