Dêh char Kon Tum pơprŏ tơring pơtăm sâm Ngọc Linh vă jê̆ 32.000ha tơ̆ ƀar apŭng Đak Glei hăm Tu Mrông (dang 17.000ha tơring pơtăm tơm păng 15.000ha tơring jih). Ƀok Hồ Công Vũ, Kơ iĕng Kơdră Hơnih jang vei lăng iŏk yua păng Atŏk tơ iung bri găh Hơnih vei lăng Bri dêh char Kon Tum tơbăt, sơ̆, tơdrong atŏk tơ iung tơring pơtăm sâm Ngọc Linh tơƀơ̆p tôch tơnap tap, tơhlăk tơhlĭn. Tơdrong tơm ‘noh kơ yuơ hloh 50% hơgăt teh pơdrŏ vă atŏk tơ iung sâm Sâm Ngọc Linh lơ̆m tơring vei lăng kơhret kơ bri ‘long gĭt kăl, ưh kơ ăn asong năm jang tơ̆ ou kiơ̆ rim tơdrong tơchơ̆t khôi luơ̆t đei ƀơm truh groi teh, bri ‘long. Kiơ̆ đơ̆ng ƀok Hồ Công Vũ, tơhlăk tơhlĭn ou hlôi đei Khôi luơ̆t Groi teh 2024 hơmet pơ ‘lơ̆ng, pơjing trong ‘lơ̆ng vă kon pơlei, hơnih mơdro sa, khul kơdră tơring atŏk tơ iung tơring pơtăm sâm Ngọc Linh.“Dêh char Kon Tum hlôi lơ ‘măng chă apinh Trung ương ‘noh ou ki, Apăng 248 Khôi luơ̆t Groi teh 2024 hlôi ăn asong pơtăm ‘long pơgang lơ̆m bri kơdrơ̆ng. Khul kơdră teh đak jei tŏk bŏk vă pơjing Tơdrong tơchơ̆t găh atŏk tơ iung ‘long pơgang lơ̆m bri kơdrơ̆ng, Tơdrong tơchơ̆t ou hlôi hơmet ming, iŏk nơ̆r tơgop ‘măng mă 3. Tơdrong tơchơ̆t trŏ lăp vă kon pơlei pơtăm sâm Ngọc Linh lơ̆m bri kơdrơ̆ng pơma atŭm, bri gĭt kăl pơma hơdrô̆ gơh iung jang.”   

     Tơ̆ dêh char Dak Nông, ƀok Hồ Văn Mười, Kơdră chĕp pơgơ̆r Hơnih vei lăng kon pơlei dêh char sơkơ̆t hơdăh, Khôi luơ̆t Groi teh 2024 hlôi pơjing đei trong pơkăp ‘lơ̆ng, pơih trong rơvơn vă dêh char atŏk tơ iung mŭk drăm lơ̆m hơgăt teh să 254.000ha bri ‘long, tơmơ̆t vă jê̆ 40% akŏp hơgăt groi teh lơ̆m dêh char. Dôm tơdrong tơchơ̆t ‘nao găh sơkơ̆t hơdăh kơjă păng ăn mơng bri gô tơgŭm ăn vei lăng ‘lơ̆ng hơ iă ăn cham char bri brăh, mă kăl ‘noh bri ‘long păng bri vat vei lăng mưh atŏk tơ iung jang sa lơ̆m bri kơdrơ̆ng. Dêh char Dak Nông tŏk bŏk pơrô̆ athei rim hơnih bơ̆ jang, kơdră tơring rim apŭng tơlĕch iung jang kơtang rim tơdrong jang vă hrôi tơmơ̆t Khôi luơ̆t Groi teh 2024 mơ̆t lơ̆m hơdrong hơrih sa yan ou, sek tơlang kĕ dôm tơdrong kăl adoi nhen đunh đai tai sơnăm kơ tơring. “Khôi luơt Groi teh ‘noh jing tơdrong hơpơi ‘meh vă kơ kon pơlei lơ̆m teh đak, lơ̆m ou đei Dak Nông. Khôi luơ̆t đei trong hơmet ming tôch hơ iă, trŏ lăp hăm tơdrong hơrih sa yan ou. ‘Nou jĭ tơdrong rơvơn vă dêh char Dak Nông, Tây Nguyên, kon pơlei atŏk tơ iung mŭk drăm mă kăl đei ƀơm truh groi teh choh jang sa bri ‘long.”.

         Tơring Tây Nguyên đei vă jê̆ 2 triu 600.000ha bri, lơ̆m ou đei dang 2 triu 200.000ha ‘noh bri ‘long chăt kơ dih. Khôi luơt Groi teh 2024 đei kon pơlei, hơnih mơdro sa păng kơdră chĕp pơgơ̆r rim tơring hôn bơnê lơ̆m pơjing đei tơdrong tơchơ̆t trŏ lăp vă xek tơlang dôm tơdrong tơnap tap, tơhlăk tơhlĭn lơ̆m atŏk tơ iung mŭk drăm lơ̆m hơgăt teh bri jang sa, mă kăl atŏk tơ iung mŭk drăm lơ̆m bri kơdrơ̆ng, bri ‘long gĭt kăl. Kơ triu hektar đei asong iung jang gô pơjing đei mŭk drăm tih tên hloh vă tơring Tây Nguyên atŏk tơ iung.