VOV4.Bahnar - Lơ\m hop ako\m trực tuyến ja#p teh đak găh vei xơđơ\ng lơ\m tơpôl đei pơgơ\r ăh ‘năr brei (15/5), Thủ tướng Nguyễn Xuân Phúc ră hơdăh, bôl boăl apu\ng plenh teh bơnê kơ tơdrong hơto\k mu\k drăm – tơpôl kơ Việt Nam, tơmoi truh tơmang păng anih axong jang truh Việt Nam bơ\ jang roi năr roi kơdra#m noh yuơ đơ\ng xơđơ\ng lơ\m tơpôl đei vei kơjăp. Mă lei, minh [ar tơdrong kăl đei [ôh tơ\ minh [ar tơring, atu\m hăm dôm tơdrong pơhlu\ đơ\ng ayăt phă pơrăm Đảng, teh đak oei pơm pơngơ\t kơ đon lơ\m tơpôl. Atu\m hăm noh tơdrong pơm yoch kơtang hơto\k lơ, tơdrong pơm yoch kiơ\ kơmăi kơmo\k ‘nao, tơdrong koh phă bri, tơdrong kôch chuơh kư\ kă, te\ch tơmam drăm đa ka#p duh oei pơrăm truh tơdrong erih xơđơ\ng kơ kon pơlei. Thủ tướng pơkăl rim tơring athei hơlen, xek tơlang pơkeh dôm tơdrong tơgar, tơkêng [ơ\t ‘nao đei [ôh, vă vei xơđơ\ng tơdrong pơyua ăn teh đak, anih axong jang păng kon pơlei, ưh kơ đei le# khul kơne# pơchu\t, tơdui, pơhlu\ phă pơrăm. Khul kơpal jang atu\m kơjăp hăm rim tơring lơ\m tơdrong vei xơđơ\ng tơpôl, atu\m hăm noh jang tơnăp tơdrong hơvơn pơtho kon pơlei.

Lan chih păng rapor