Năr 8/10, tơdrong hơmet ăn Năr akŏm Joh ayŏ kon pơlei  Mông 'măng mă 4 sơnăm 2026 pơgơ̆r hăt hot tơ̆ Điện Biên. Dôm khul ngê̆ nhơ̆n, bơngai joh hơri, tơplŏng kơdou đơ̆ng 11 dêh char tŏk bŏk akŏm pơtơ̆p pơhrăm, keh đang dôm tơdrong hơrih hơsuang, atŭm hăm noh hơmet dôm hơnih pơdah tơmam drăm kăp gĭt, kơchăng tơroi kơ dôm tơdrong kăp gĭt gah joh ayŏ păng tơmam drăm kơ kon pơlei Mông truh hăm kon pơlei păng tơmoi.  Năr akŏm Joh ayŏ kon kông Mông 'măng mă 4 pơgơ̆r đơ̆ng năr 9 - 11/10, hăm jê̆ 800 ngê̆ nhơ̆n, bơngai joh hơri, tơplŏng kơdou truh đơ̆ng 11 dêh char đei: Điện Biên, Tuyên Quang, Phú Thọ, Thái Nguyên, Sơn La, Cao Bằng, Lai Châu, Lào Cai, Thanh Hóa, Nghệ An păng Đăk Lăk.

Gah Điện Biên đei 101 ngê̆ nhơ̆n, bơngai joh hơri, tơplŏng kơdou vang akŏm lơ̆m dôm tơdrong joh ayŏ păng 62 bơngai tơplŏng kơdou vang pơlong  6 môn hăm 35 tơdrong tơm. Rim tơring pơtruh dôm tơmam drăm tơguăt hăm tơdrong hơri păng joh ayŏ Mông đơ̆ng dôm tơring, đơ̆ng hơbăn ao tanh, tơmam juăt jue truh tơmam choh pơtăm, tơmam xa kăp gĭt păng dôm tơmam drăm 'măn ăn tơdrong hơrih. 'Nou ưh hơdrô̆ jĭ hơnih vă tơroi tơmam drăm, mă oei tơgŭm ăn kon pơlei băt hơdah hloh gah tơdrong joh ayŏ đơ̆ng rŏng kơ rim tơmam drăm đei pơm tơlĕch.