Tơdrong pơgơ̆r pơtho pơhrăm sơgơ̆r ƀar-chêng pêng-chĭng pơđăm jĭ tơdrong iung jang lơ̆m Tơdrong vă jang tơnô̆ 6 Tơdrong jang tơm teh đak atŏk tơ iung mŭk drăm-tơpôl tơring kon kông păng groi kông găh “Vei răk tơƀăk mong, atŏk kơtang tơdrong kăp gĭt oei sa joăt joe ‘lơ̆ng hơ iă kơ rim hơdrung kon kông tơklep hăm atŏk tơ iung tơmang pơhiơ̆” kơ yuơ Hơnih vei lăng Joh ayŏ kơdŏ soang, Đă ƀŏng lŏng tơplŏng kơdou păng Tơmang pơhiơ̆ dêh char Đắk Lắk iung jang.

Lơ̆m hloh 2 khei hŏk pơhrăm, rim đe oh hŏk tro Hnam truơng teh đak rong ‘me oei sa ‘năr dơ̆ng Đinh Núp, tơring Phú Mỡ păng rim hơdruh tơdăm tơring Xuân Lãnh đei rim ngê̆ nhân chă pơtho trong tôn sơgơ̆r ƀar, chêng pêng, chĭng pơtăm tôch hơ iă; vang chă hơsoang kiơ̆ tôn chĭng chêng. Yă Nguyễn Thụy Phương Hiếu, Kơ iĕng Kơdră chĕp pơgơ̆r Hơnih vei lăng Joh ayŏ kơdŏ soang, Đă ƀŏng lŏng tơplŏng kơdou păng Tơmang pơhiơ̆ dêh char Đắk Lắk tơbăt, hloh khei ‘năr đei rim ngê̆ nhân pơtho tôn hloi sơgơ̆r ƀar, chêng pêng, chĭng pơđăm, rim đe oh tôch hơdrin hŏk pơhrăm păng tôn gơh ƀônh dôm tơdrong tôn chĭng chêng tơklep hăm tơdrong pơgơ̆r kơ̆m kang kơnang giĕng kơ hơdrech hơdrung kơdih. Đơ̆ng rong lăm hok ou, đe oh gơh hŏk pơhrăm dơ̆ng, chă pơhrăm vă đei jing dôm bơngai pơtăl ăn lơ̆m vei răk tơƀăk mong tơdrong oei sa joăt joe ‘lơ̆ng rŏ sơ̆ ki kơ hơdrĕch hơdrung kơdih."Đe mon chă tôn tôch kơ gơh. Gơnơm đơ̆ng rim ngê̆ nhân chă pơtho, đe oh hlôi băt păng gơh chă tôn chĭng chêng, sơgơ̆r păng chă hơsoang. ‘Nou jĭ hơyak blŭng tôch kơ rơvơn. Hơnih hơpơi ‘meh vă hnam trương gô hơnơ̆ng pơjing khul hŏk tro ou jĭng mĭnh khul kăl hloh vă iung jang lơ̆m khei năr kơnh. Đơ̆ng ou, rim đe oh đei rơvơn vang năm pơlong, chă tôn ưh khan lơ̆m pơlei pơla kơdih mă oei tơ̆ rim hnam trương teh đak rong ‘me păng rim hnam trương lơ̆m dêh char vă tơƀơ̆p, hŏk pơhrăm dih băl, tơgop lơ̆m vei răk tơƀăk mong tơdrong oei sa joăt joe ‘lơ̆ng rŏ sơ̆ ki kơ hơdrĕch hơdrung kơdih."

Tơdrong tôn Sơgơ̆r ƀar-Chêng pêng-Chĭng pơđăm ‘noh tơdrong mơ̆t lĕch dôm tơmam chă toñ kơ ƀar tŏ sơgơ̆r-pêng tŏ Chêng-pơđăm tŏ chĭng vă pơjing đei tơdrong chă tôn tôch kơ hiôk, hơ iă. Jơva kơ 2 sơgơ̆r - 3 tŏ chêng-pơđăm hlak chĭng pơjing đei jơva tôch kơ hiôk, hơnhăk đei tơdrong gĭt kăl tôch hơ iă. Jĭ đơ̆ng tơdrong gĭt kăl ‘noh kơna sơnăm 2015, Tơdrong tông Sơgơ̆r ƀar - Chêng pêng-Chĭng pơđăm đei Hơnih tơm vei lăng Joh ayŏ kơdŏ soang, Đă ƀŏng lŏng tơplŏng kơdou păng Tơmang pơhiơ̆ drơ̆ng akhan mŭk drăm oei sa joh ayŏ gĭt kăl dăr sơnăm kâp teh đak. Tơdrong pơgơ̆r pơm lêh kơ̆m kang kơnang giĕng lơ̆m khei năr blŭng pơyan puih mak ưh khan lăp tơdrong pơgơ̆r joh ayŏ kơdŏ soang kơ kon pơlei mă oei jing tơdrong pơgơ̆r tôch gĭt kăl lơ̆m vei răk tơƀăk mong tơdrong oei sa gĭt kăl dăr sơnăm ‘lơ̆ng rŏ sơ̆ ki. Ƀok La Văn Hãng, Kơdră chĕp pơgơ̆r Hơnih bơ̆ jang vei lăng Oei sa joh ayŏ tơring Xuân Lãnh, dêh char Đắk Lắk tơbăt:"Đơ̆ng sơnăm 2016 truh dang ei tơring vei kơjăp tơdrong pơm lêh ou vă vei kơjăp păng atŏk kơtang tơdrong oei sa joăt joe ‘lơ̆ng rŏ sơ̆ ki kơ rim hơdrung kon kông tơ̆ Xí Thoại păng Xuân Lãnh. Nhôn hơdrin đĭ ai mă đơ̆ng lăp đơ̆ng rŏng hơgrop jang kiơ̆ khul kơdră chĕp pơgơ̆r ƀar kâp oei tôch tơnap tap dang yơ ră mă lei nhôn oei vei kơjăp chă pơgơ̆r vă pơjing rơvơn ăn kon pơlei rim hơdrung kon kông tơƀơ̆p dih băl, hŏk pơhrăm dih băl păng hơnơ̆ng vei răk tơƀăk mong, atŏk tơ iung tơdrong oei sa joăt joe ‘lơ̆ng rŏ sơ̆ ki kơ hơdrĕch hơdrung bơ̆n. "

Sơgơ̆r ƀar, chêng pêng, chĭng pơđăm ‘noh tơdrong joăt joe oei sa joh ayŏ gĭt kăl hloh kơ kon pơlei Bahnar păng Chăm, đei vei răk păng pơtho pơhrăm ăn lơ jơhnơr. Đơ̆ng dôm tơdrong pơm lêh kơ̆m kang kơnang giĕng kon pơlei truh lăm hŏk hrei ou, jơva sơgơ̆r, jơva chĭng chêng oei ling lang re hơnơ̆ng, tơgoăt jơhnơr mơlôh hăm tơdrong joăt joe kơ hơdrĕch hơdrung kơdih. Găh tơdrong hơnih bơ̆ jang kơ dêh char Đắk Lắk pơgơ̆r pơtho pơhrăm ăn rim hŏk tro ưh khan lăp tơgop lơ̆m vei răk mĭnh tơmam oei sa joăt joe ‘lơ̆ng rŏ git kăl, mă oei pơjing đei dơ̆ng dôm khul đe hơ ioh tơm dơnơm vă tơdrong oei sa joăt joe ‘lơ̆ng rŏ ‘noh hơnơ̆ng đei vei kơjăp, atŏk tơ iung păng lang să mơ̆t lơ̆m tơdrong hơrih sa hrei ou.