Lêh akŏm Sâu riêng Đăk Lăk sơnăm 2026 hlôi đei pơgơ̆r đơ̆ng năr 15/8 - 2/9 hăm 18 tơdrong jang tơm păng hloh 40 tơdrong jang pơm kiơ̆. Lơ̆m khei năr ou, dêh char Đăk Lăk sơng pơhlom 750.000 'nu tơmoi truh tơmang, lơ̆m noh hloh 275.000 'nu tơmoi dăng oei, hơkŏp pơyua đơ̆ng tơmang pơhiơ̆ đei jê̆ 1.300 ti hlj.

Ƀok Trần Quốc Toàn, Phŏ Kơdră Hơnih Tĕch mơdro dêh char Đăk Lăk akhan, lêh akŏm hlôi iŏk yua tơdrong tơroh – jang hơdoi kơ dôm hơnih jang ah mă đei 9 hla bar ƀiên ƀan hlôi đei kĭ pơkăp truh hơnih hơngeo răk tơmam, logistics, pơm tơlĕch tơmam drăm păng hơtŏk tơdrong jang, hơkŏp kơjă đei jê̆ 9.000 ti hlj. Mă lei, dêh char kŭm kăl sơkơ̆t hơdah tơdrong tơpă đơ̆ng hla bar ƀiên ƀan jang hơdoi hlôi đei kĭ:  “Dôm ƀiên ƀan tơbăt đei kĭ pơkăp ah Lêh akŏm hlôi pơih lơ trong jang hiôk jang hơdoi, mă lei lơ noh ah pơkăp mă blŭng. Tơdrong jang tơpă 'noh kơsô̆ hla bơ-ar pơkăp jang hơdoi păng dôm tơdrong jang nai kăl athei hơlen lăng dơ̆ng. Adoi le lăi thoi ăi mơ̆n, tơdrong jang chih akŏm lơ̆m kơmăi kơsô̆ mưh hơdrô̆ akŏm lơ̆m dôm khei năr tơm kơ Lêh akŏm 'noh gô pơm tơnap tap ăn tơdrong tĕch răt tơmam drăm. Kơyuơ 'noh, kiơ̆ Hơnih Tĕch mơdro, đơ̆ng rŏng kơ Lêh akŏm kăl tơplih kơtang đơ̆ng ‘hơtŏk jang kiơ̆ lêh akŏm’ jing trong ‘hơtŏk jang tơguăt hăm tơring tĕch răt păng tơdrong pơyua hơdah’”.

Pơma ah pơtôch hop akŏm, ƀok Đào Mỹ, Phŏ Kơdră Hơnih vei lăng kon pơlei dêh char Đăk Lăk, Kơdră Jơnŭm pơgơ̆r lêh akŏm athei hơlen lăng tôm tơdrong oei tơjruh, hơtŏk tơdrong juăt jang păng sơnong jang hơdoi lơ̆m dôm tơdrong pơgơ̆r. Tơdrong hơmet trong vă pơgơ̆r lêh akŏm ăn sơnăm 2028 kăl đei tơlĕch jang hrôih, asong hơdah sơnong jang păng kơchăng akŏm bơngai jang, mă kăl noh lơ̆m tơdrong tơbang tĕch tơlĕch tơmam drăm:  “Hơdrin kơtang pơma dơnuh, tơƀôh tơbăt, tơguăt rim tơmam drăm, mĭnh păh ‘noh tơƀôh tơbăt lơ̆m hơnih tĕch răt điên tư, mă lei oei vei kơjăp tơƀôh tơbăt păng tĕch mơdro tơmam drăm kiơ̆ trong so. Ĭnh athei Khul chep pơgơ̆r, hơnih bơ̆ jang tơgoăp iŏk nơ̆r tơgop, pơma dơnuh păng dôm nơ̆r tơgop đơ̆ng rim hơnih jang păng rim tơring pơm pơkeh hla bơar tơbăt tơdrong jang đơ̆ng noh pơchoh trong ăn Hơnih vei lăng kon pơlei dêh char păng đei nơ̆r apĭnh athei ăn tơdrong jang Pơm lêh sơnăm 2028”