Hăm hơnăn “Păr ang tơdra bri kông”, tơdrong pơtơm pơih blŭng hăm tơdrong pơrok đơ̆ng đe ngê̆ nhơ̆n, pơdah dơ̆ng tơdrong hơrih kon pơlei kon kông atŭm vih akŏm “pơlei hơtŭm” – anih hrơ hrou um ai joh ayŏ, tơroh đon lui, atŭm hơyak truh tơchơ̆t pơjing Gia Lai pơdrŏng 'lơ̆ng rŏ, tơguăt tơguăl păng hơtŏk tơ-iung kơjăp. Pơtoi kơ noh tơdrong joh hơri hăm dôm tơdrong pơdah tôm chĭng chêng tơƀôh gah tơdrong hơrih joh ayŏ juăt jue, tơdrong hơpơi hơtŏk tơ-iung kơ kon pơlei kon kông.

Lơ̆m noh, lơ khul ngê̆ nhơ̆n truh đơ̆ng 17 apŭng, thĭ xah, pơlei tơm lơ̆m dêh char hlôi hơmet dơ̆ng lơ khôi kră sơ̆ kăp gĭt nhen: et soi Sơng đak vih tơ̆ pơlei pơla, Et xa kơpô, et Pôk bơnê, et Sơmah Kơcham, pơdah joh hơri hơsuang, reh brŏ kon kông, chrah mul meo, tanh brong jak, tanh brai.