A Riêu Âr Pục ưh kơ drô̆ jing 1 tơdrong lêh kơ bơngai Pa Cô. ‘Nâu oei jing hơnih tơdrong hơtŏ lăp đei pơm kiơ̆ hăm bưng ai đơ̆ng đe kră pơlei, hăm dôm tơdrong pơkăp hlôi mơ̆t hlom lơ̆m tơdrong hơrih tơpôl. Hơdrol kơ khôi luơ̆t Teh đak đei ƀôh tơ̆ tơring groi kông, kơlih dôm khôi luơ̆t ‘noh hlôi tơgop vei lăng sơđơ̆ng, hơmet pơ ‘lơ̆ng tơdrong ưh kơ lăp băl păng tơklep hơdai kon bơngai lơ̆m rim pơlei pơla. Kiơ̆ đon tơchĕng kơ bơngai Pa Cô, dôm tơdrong ƀơm truh pơma ưh kơ lăp băl, tơhil băl pơdui đunh đơ̆ng dôm ŭnh hnam tơdăh ưh kơ gơh chă sek tơlang kơdih gô đei tơlĕch ăn tơ̆ hơnăp khŭl kră pơlei. Ƀơ̆t doh, lêh A Riêu Âr Pục đei pơgơ̆r nhen 1  tơdrong sek tơlang tih kơ tơpôl. Kră pơlei Lê Tuấn Mõ, thôn Kê Ré, xăh A Lưới 3 tơbăt, lêh đei pơgơ̆r vă sek tơlang dôm tơdrong tơhil, pơma ưh kơ lăp băl ƀơm truh tơdrong hơrih sa.

“Pơm lêh Âr Pục ‘măng mă ou ‘noh sek tơlang dôm tơdrong ưh kơlăp đon dih băl đei ƀơm truh tơdrong hơrih sa kơ kon pơlei, mă kăl ‘noh sek tơlang ưh khan lăp găh tơdrong tơhưch dih băl mă lei sek tơlang rim tơdrong tơgar dih băl groi teh, tơgar dih băl hnam oei…. Dôm tơdrong chă tơhil dih băl lơ̆m ŭnh hnam chă sek tơlang dih băl ưh kơ keh đang ‘noh hơvơh kră pơlei lơ̆m pơlei păng hơvơn đĭ đăng rim pơlei anai vă chă pơma dơnuh dih băl păng drơ̆ng mĭnh nơ̆r vă sek tơlang; sek tơlang rim pang chă tơhil dih băl”.

Tơdrong pơm đei tơdrong hơiă hơdrô̆ đơ̆ng A Riêu Âr Pục ‘noh jĭ tơdrong tơpăt ‘lơ̆ng lơ̆m kơplăh sek tơlang. Ưh khan lăp đei kră pơlei đơ̆ng dôm pang bơm truh, lơ kră pơlei đei đe lui yom tơ̆ dôm pơlei nai kŭm đei hơvơn vang akŏm. 1 ‘nu bơngai đei đe lui yom, ưh kơ ƀơm truh tơdrong gô đei rơih iŏk vă pơgơ̆r, vei sơđơ̆ng tơdrong hơtŏ băl ăn đĭ đăng dôm pang.

Lêh pơgơ̆r kiơ̆ tơdrong joăt kơhret. Đơ̆ng tơdrong hơmet ăn tơmam lêh, hơvơn khŭl kră pơlei truh dôm tơdrong tơtơl băl, pơma tơblang păng pơjăh băl. Dôm bơngai vang akŏm đei tơroi đon tơchĕng đơ̆ng kơdih hăm dôm nơ̆r pơma hmă mă lei ƀĕnh tơdrong ‘lơ̆ng trŏ, ƀơ̆t lăp đei tơdra đơ̆ng dôm boa hơri brông joăt joe. Đơ̆ng rŏng răp mơ̆ng tôm nơ̆r tơgop, khŭl kră pơlei gô vang hơdai băl tơlĕch nơ̆r pơkăp hơtuch.

Tơdrong tôch kơ gĭt ‘noh jĭ tơdrong tơm đơ̆ng A Riêu Âr Pục ưh kơ trĕng vă phak mă yak truh tơdrong hơmet pơ ‘lơ̆ng. Lơ̆m nơ̆r pơma tơblang, pơtho tơtă đơ̆ng rim kră pơlei ling lang đei tơdrong hơiă mơmat băl, tơdrong mơ̆ng băl păng hơnăp jang hăm tơpôl. Yua kơ thoi noh, tơdrong mă bơngai Pa Cô ‘meh vă ‘noh jĭ vei lăng tơdrong tơgoăt pôm ƀơ̆r đon lơ̆m pơlei pơla.

Đơ̆ng rŏng dôm pang drơ̆ng lăp hăm pơtôch sek tơlang, tơdrong pơkăp đei pơm kiơ̆. Ƀơ̆t tam mă đei chư chih, bơngai Pa Cô yua bơ̆n đing kram iĕ pơm tơmam tơbăt ăn nơ̆r pơkă đơ̆ng kơdih. Dôm đing kram hmă ‘noh jing tơpih ăn hơnăp jang păng đon lui tơ̆ hơnăp tơpôl.

Hrei ‘nou, kŭm hăm tơdrong hơdrin chĕp vei tơdrong oei sa ‘lơ̆ng hơiă so, lêh A Riêu Âr Pục hlôi đei pơm tơiung păng roi tơƀôh jơ̆p jang. Ngê̆ nhơ̆n Hồ Thị Tư tơbăt, tơdrong tơiung jing lêh ưh khan lăp vă chĕp vei tơdrong oei sa đơ̆ng sơ̆ kơ kon pơlei Pa Cô mă oei tơgŭm tơmoi chă tơmang lăng păng jơhnơr mơlôh hlôh hơdăh hloh găh dôm kơjă kăp gĭt ‘mêm mơnat, jơhngơ̆m đon hơtŏ ‘lơ̆ng păng tơdrong ‘mêm lơ̆m tơpôl đei chĕp vei kiơ̆ lơ jơhnơr.

“Tơdrong pơgơ̆r dơ̆ng pơm lêh Âr Pục kơ hơdrung Pa Cô đvă tơroi tơƀôh dôm tơdrong oei sa joăt joe sơ̆ ki ăn tơmoi adoi nhen rim đe mơlôh tơ̆ tơring băt. ‘Noh đơ̆ng rŏng ƀôh pơm lêh ou đe sư mă băt hơdăh dôm tơdrong gĭt kăl lơ̆m pơm lêh ou”.

Hơdrol sơ̆, đơ̆ng rŏng kơ tơdrong đei sek tơlang pơ ‘lơ̆ng hiôk, bơngai Pa Cô pơgơ̆r et koh sa kơpô vă bơnê kơ yang păng tơƀôh tơdrong jơnei đơ̆ng kơplăh sek tơlang. Hrei ‘nâu, pơm kiơ̆ tơdrong hơrih hơgei, tơdrong pơgơ̆r koh sa kơpô ưh pă pơvei bơih. Lêh chĕp vei dơ̆ng dôm tơdra hơsoang, jơva chĭng, hơgơ̆r re păng dôm boa hơri brông đei re tŏk bŏk tơdrong chơt hơiă tơgoăt pôm ƀơ̆r đon đơ̆ng tơpôl. Ƀok Phan Thanh Hải, Kơdră Anih vei lăng găh Joh ayŏ păng tơplŏng kơdâu pơlei tơm Huế, tơdrong tơchĕng hơlen, pơm tơiung dơ̆ng dôm lêh joăt joe kơ kon pơlei ưh khan lăp tơgop chĕp vei dôm kơjă kăp gĭt joh ayŏ ‘lơ̆ng hơiă mă oei pơih ăn tơdrong hiôk hơtŏk tơiung chă tơmang lăng lơ̆m tơpôl.

“Hơnih vei lăng joh ayŏ dêh char atŭm hăm Hơnih vei lăng tơmang pơhiơ̆ dêh char gô tơgŭm djru rim tơring hăm trong tơƀôh tơbăt rim khul famtrip, chă tơchĕng hơlen hơmet pơ ‘lơ̆ng trong pơgơ̆r pơm lêh trŏ lăp hloh vă pơvih pơvăn ăn tơmoi tơmang pơhiơ̆. Kiơ̆ kơ ĭnh, dôm tơdrong oei sa ‘lơ̆ng hơ iă kơ pơm lêh joăt joe tơdăh đei chă tơchĕng hơlen, vei răk trŏ lăp, ưh kơ jor dôm tơdrong git kăl gô lang să kơtang lơ̆m kon pơlei pơla păng đei jing mĭnh lơ̆m dôm tơdrong pơgơ̆r ăn tơmang pơhiơ̆ ‘lơ̆ng hơ iă hloh."

Mă đơ̆ng tơdrong hơrih sa hrei ‘nâu đĭ tơplih lơ bơih ră, mă lei dôm kơjă kăp gĭt tơm đơ̆ng A Riêu Âr Pục oei đei bơngai Pa Cô chĕp vei. ‘Noh ưh khan lăp jing tơdrong tơroi găh khôi joăt dăh mă dôm ‘măng sek tơlang đơ̆ng tơpôl, mă oei jing tơƀôh tơdrong hơiă ăn jơhngơ̆m đon pơm kiơ̆ tơdrong trŏ lăp, tơdrong tơgoăt pôm ƀơ̆r đon păng jơhngơ̆m ‘mêm mơnat hlôi đei hơtŏk kiơ̆ lơ jơhnơr tŏk bŏk bri kông Trường Sơn.