Pơgê hrôih, mưh jơ̆ng ‘năr blŭng a pơchrang tơ̆ groi Đồng Bò, ƀok Bùi Xuân Phước, 91 sơnăm, kơdŭ đĭ kŏk, soh hlôt nhang ƀơ̆t hơnih soi tơbeh Ƀok Hô lơ̆m mĭnh tŏ hnam soi tơbeh iĕ. ‘Nhui nhang păr mơ liơk, găh ‘ngoăih ‘noh dơnou đak pơkao sen ‘nao chôh blang, hla kơ ƀrê sơnglŏng dreng păr mơ liơk đơ̆ng kial đak dơsĭ tơhlu.

Hăm khul yân kuân kơ phương Nam Nha Trang, Hơnih ƀok hơdơ̆r Ƀok Hô mă ƀok Bùi Xuân Phước tơ iung pơjing, hlôi jing hơnih joăt joe hloh. Đe ‘nhŏng hơnơ̆ng năm truh chă hơpuih hơmet pơ ‘lơ̆ng, hơtol hla kơ, puih hơmet kơƀang tang dŏ. Jơva hla hơdruih hơpuih hla kro, jơva dui hơtol hla kơ păr lơ liơ tơ̆ jrăng kơjung tŏk bŏk cham, atŭm hăm ƀou phu soh nhang pơjing đei mĭnh cham char gĭt kăl hloh.

Ƀok Trần Minh Cường, yân kuân phương Nam Nha Trang tơbăt:“Yân kuân năm tơgŭm djru Hơnih man tơbăt chă hơpuih hơmet cham, proh hơmet kơƀang tang dŏ, hơtol hla kơ, che pơrŏ. Nhôn oei proh hơmet gre dơ̆ng, gak vei lăng. Rim sơnăm truh năr Lêh nhen 3/2; 30/4 păng 1/5; 19/5; 27/7;2/9…rim khul năm tơ̆ ou tôch kơ lơ”.

Ƀok Bùi Xuân Phước atŭm hăm khul kang ƀô̆ phương Nam Nha Trang hơmet pơ ‘lơ̆ng hơnih tơbăt.

Ƀok Bùi Xuân Phước rơneh sơnăm 1935. Đơ̆ng ‘lơ̆p ƀok hlôi vang mơ̆t lơ̆m khul thiếu sinh quân, đơ̆ng noh hlôi jing ƀô̆ đô̆i iung tơblăh tơ̆ kơdrăn tơblăh Phú Yên. Đơ̆ng rŏng Tơdrong tơchơ̆t Genève sơnăm 1954, ƀok năm oei tơ̆ găh Tu, đei hŏk pơhrăm găh tơdrong jang vei lăng Mŭk drăm. Đơ̆ng rŏng ‘noh ƀok mơ̆t pơm ƀô̆ đô̆i dơ̆ng, vang iung tơblăh tơ̆ kơdrăn tơblăh Lào.

Mưh lĕch pơm ƀô̆ đô̆i, ƀok bơ̆ jang lơ̆m hơnih jang mong răk mŭk drăm păng hơnơ̆ng chă tơchĕng truh tơdrong ƀlŏk hơdơ̆r kơ Ƀok Hô. Ƀok hlôi plang ăn prăt hloh 30 sơnăm, chă răt akŏm teh, mong răk kon jên khei, jên pơkom, đei ‘măng tĕch hloi pơbŭng hnam tŏk bŏk oei lơ̆m pơlei tơm vă đei kon jên ming man. Rim tŏ tablô, rim tơnăr, rim kơnao tơmo mơ̆t lơ̆m Hơnih soi tơbeh să hloh 2.000m² hăm lơ hơnih ming man nhen Rup man Ƀok Hô, hơnih soi tơbeh, hnam hop akŏm joăt joe, dơnou pơkao sen, pơgar ‘long păng rim kơƀang pơdă tơƀôh tơbăt dôm hla bơar chih găh jơhnơr hơrih kơ Ƀok Hô. Rim ‘măng lêh tih truh lơ khul kang ƀô̆, hŏk tro, khul ƀô̆ đô̆i so jei luh năm tơ̆ ou soh hlôt nhang, pơma dơnuh dih băl dôm tơdrong so.

Ƀok Đặng Đình Tuân, ƀô̆ đô̆i so oei lơ̆m Koeng kơphô̆ Phước Thủy, phương Nam Nha Trang, bơngai tơklep kơjăp hăm hơnih ƀlŏk hơdơ̆r đơ̆ng dôm năr blŭng, tơbăt, tơdrong pơjing hơnih ou jĭ tơdrong đei đơ̆ng jơhngơ̆m đon ‘mêm kơ eng kơ Ƀok Hô păng jơhngơ̆m đon kơrŭn đĭ ai đơ̆ng ƀok Phước.“Mih Bùi Xuân Phước ‘noh bơngai kon pơlei đơ̆ng tơring Pơbăh, hăm jơhngơ̆m đon ‘mêm kơ eng kơ Ƀok Hô tôch bach, hăm tơdrong bơ̆ jang hlôh vao lơ̆m vei răk hlôi yak đơ̆ng găh Tu truh Pơbăh năm tơchă mong răk, tơ iung pơjing đei hơnih ou. ‘Măng mă blŭng tôch mơmat tat, gleh hrat mă lei nhôn tôch hôn bơnê, lui kơ mih Phước kơ yuơ hlôi tơchăr, đĭ jơhngơ̆m đon, pơnam tơnăp. Đei lơ tơdrong jang lăp hơdrô̆ mih chă pơm, hăm jơhngơ̆m đon ‘mêm kơ eng lui yom Ƀok Hô hlôi pơjing đei hơnih tơbăt ƀlŏk hơdơ̆r ou”.

Mă đơ̆ng sơnăm đĭ kră, jơhngơm pă gan đei, ƀok Bùi Xuân Phước oei prăt măng năr vei lăng năng tông hăm hơnih tơbăt. Kơdih ƀok chă vei lăng năng tông pơgar ‘long, sut hơmet hơnih soi tơbeh, hơmet ming rim hlak rup, dôm kơƀang chih nơ̆r Ƀok Hô pơtho.Lơ bơngai năm ngôi oei ƀôh ƀok Ƀô̆ đô̆i so oei tơjê̆ dơnou pơkao sen, pơglăn lăng rup man Ƀok Hô, tơbăt jơhngơ̆m ‘meh vă ling lang kiơ̆ yok yok jơ̆ng Ƀok Hô. Ƀok tơroi:“Ba pă đei tơtăm yă kiơ bơih. Ba hlôi 91 sơnăm bơih nei, hơrih hơrăi dang yơ ‘noh ba jei hơdrin chă pơvih pơvăn truh dang noh, mưh kiơ̆ ƀok yă jei phơi jơhngơ̆m mưh kiơ̆ Ƀok Hô. Chih pơkăp ăn Hơnih tơbăt ou ưh kơ gơh chă tĕch, ưh kơ gơh chă plang ăn, ‘meh vă pơsư̆ ăn tơbăt ăn jơhnơr đơ̆ng rŏng”.

Tŏk bŏk sơdrai ‘long jơk ƀlĭk tơ̆ groi Đồng Bò, hơnih man tơbăt Kơdră chĕp pơgơ̆r teh đak Hồ Chí Minh (mă bơ̆n ngăl krao akhan Ƀok Hô) bơngai ƀô̆ đô̆i kră, nhen minh “hơnih răk ƀlŏk hơdơ̆r” kơ jơhngơ̆m đon kon pơlei hăm Ƀok Hô. Păng rim tablô, rim trong yak, oei ƀôh gru kơnăl jơhngơ̆m đon hơpơih ‘meh vă kơ mĭnh jơhnơ̆r prăt chăl sơnăm hŏk pơhrăm, pơm kiơ̆ jơhngơm đon ‘lơ̆ng, plang ăn đĭ jơhnơr đơ̆ng Kơdră chĕp pơgơ̆r Teh đak Hồ Chí Minh.