Hop akŏm đei vang năm đơ̆ng rim hơnih bơ̆ jang, tơring, khul joăt jang, hơnih mơdro sa păng hơnih bơ̆ jang lơ̆m tơdrong tơmang pơhiơ̆. Kiơ̆ tơdrong vă jang, Dak Lăk tơlĕch tơdrong jang atok tơ iung tơmang pơhiơ̆ kiơ̆ trong rơgoh ‘lơ̆ng, kơjăp ‘lơ̆ng, tơklep hăm vei răk tơdrong oei sa joăt joe ‘lơng rŏ sơ̆ ki, cham char păng tơ iung pơjing tơmam drăm tơmang pơhiơ̆ kơ tơring Tây Nguyên. Dôm tơmam drăm tơm đei sơkơ̆t hơdăh ‘noh tơmang pơhiơ̆ cham char, pơdơh pơdei, chă tơmang lăng tơdrong oei sa joăt joe kon pơlei, tơmang pơhiơ̆ choh jang sa, tơmang pơhiơ̆ chehphe, tơmang pơhiơ̆ rôih păng tơmang pơhiơ̆ tơklep hăm tôn chĭng chêng Tây Nguyên. Tơ̆ Hop akŏm, rim bơngai tang măt akhan Dak Lăk đei lơ tơdrong hơ iă vă atŏk tơ iung tơmang pơhiơ̆ gơnơm bri kông, chơ kơi, dơnou đak atŭm hăm tơdrong oei sa ‘lơ̆ng rŏ joăt joe kơ Tây Nguyên. Mă lei, tơmang pơhiơ̆ Dak Lăk oei đei lơ tơdrong tơhlăk tơhlĭn nhen trong nơnăm tim mă tơƀưh dih băl ‘lơ̆ng hơ iă, ưh kơ gan đei tơmam drăm ‘lơ̆ng, pơvih pơvăn tơ̆ gơmăng oei tim mă trŏ lăp păng tim mă đei lơ hơnih mơdro sa pơm jŭk pơjing đei atŏk kơtang lang să. Dêh char kăl hơmet pơ ‘lơ̆ng trong nơnăm, dăr lăng hơlen dôm tơdrong yă kiơ tŏk bŏk đei vă atŏk tơ iung tơgăl; lăng kơjăp dôm tơdrong đei kơdih ‘lơ̆ng hơ iă.