'Nou jĭ 'măng mă blŭng lêh akŏm đei pơgơ̆r pơkăp kơ dêh char. Lêh akŏm gô vă pơgơ̆r đơ̆ng năr 15/8 truh năr 2/9 tơ̆ phương Buôn Ma Thuột, xah Krông Pắc, phương Tuy Hòa păng dôm xah pơtăm sâu riêng lơ̆m tơring teh kơ dêh char Đăk Lăk. Lêh akŏm đei 17 tơdrong jang joh ayŏ, tĕch mơdro, tơmang pơhiơ̆. Hơnih hơdah hloh noh tơdrong pơtơm ah Cham să năr 10/3; hơnih pơdah tơmam drăm sâu riêng păng tơmam drăm OCOP; lêh akŏm tơmam xa; tour tơmang lăng pơgar sâu riêng; pơma đam vă pơm tơlĕch, tĕch răt sâu riêng.

Mă kăl, pơhlom 500 tong gre ƀan tải gô kơdou đơ̆ng xah Krông Pắc vih truh hơnih tơm phương Buôn Ma Thuột vă tơbang sâu riêng, khŏm mă đei jơnei nhen pơkăp Guinness păng 'măn ăn tơmoi chă hơlen lăng sâu riêng. Atŭm hăm noh, show tơmang lăng “Đon băt hnam kơjung” iŏk yua trong pơkăp  3D mapping gô đei pơdah ah kơmăng 'năr pơđam, 'năr tơdrou păng 'năr tơpơh rim giĕng tơ̆ Hơnih pơdă tơmam drăm Đăk Lăk lơ̆m khei năr pơgơ̆r lêh akŏm.