Lơ̆m cham să 'lơ̆ng kơ Cham akŏm Đại đoàn kết, phương Pleiku, dêh char Gia Lai, tơdra chĭng chêng rơ-ông rơ-ang, hơvơn lơ kon pơlei tơ̆ tơring atŭm hăm tơmoi krôp ti dih băl hơsuang buang buoy. 'Nou jĭ tơdrong pơdah tôn chĭng chêng “Soi tơbeh kơ kơpô” yuơ khŭl ngê̆ nhơ̆n Jarai truh đơ̆ng pơlei Mlăh, xah Phú Túc, dêh char Gia Lai tôn pơdah. Atŭm hăm dôm ƀai chêng so, khŭl ngê̆ nhơ̆n mơlôh oei tôn pơdah chĭng chêng ming 'nao hăm tơdra hiôk kăp gĭt, akŏm đei tơdrong chơt hơ-iă 'nă hal, răk tơdrong 'lơ̆ng ăn tơmoi năm truh Gia Lai: “Inh hơpơi 'meh tơdrong akŏm thoi ou gô đei pơgơ̆r hơnơ̆ng, vă inh gơh năm truh Gia Lai vang akŏm tơdrong pơdah ou”

 Oh Ksor H’Huế jĭ bơngai vang jang lơ̆m khŭl chĭng chêng kơ khŭl chĭng chêng mơlôh truh đơ̆ng pơlei Mlăh, xah Phú Túc tơroi: Rim 'măng đei hrŭk hơbăn ao tanh juăt jue, atŭm hăm khŭl chĭng chêng – hơsuang kơ pơlei năm pơdah ăn tơmoi lăng, inh ƀôh pơ-ư pơ-ang lơ̆m đon bơnôh kơlih joh ayŏ kon pơlei Jarai inh adoi oei đei răk vei păng lăp kơ đon: “Inh hơpơi 'meh, tơdrong joh ayŏ juăt jue kon kông inh pơtoi đei pơtruh hăm tơmoi đơ̆ng teh đak đe păng tơmoi lơ̆m teh đak Việt Nam bơ̆n”.

Hăm tơdrong akŏm “Chĭng chêng hơtuch giĕng - xa dôm tơmam xa 'lơ̆ng păng hơlen băt” 'măng mă ou tơ̆ Pleiku, khŭl ngê̆ nhơ̆n pơlei Mlăh, xah Phú Túc oei ming pơdah tơdrong “Et soi pôk bơnê” – minh joh ayŏ 'lơ̆ng kră sơ̆ kơ bơngai Jarai. Lơ̆m tơdra chĭng chêng re ang tơ̆ tơring bri kông, pơjou soi kơ yang pơgơ̆r soi kiơ̆ dôm khôi juăt apinh đei jơhngơ̆m jăn grăng pran, pơyan jang xa đei yua, pơlei pơla sơđơ̆ng, kôn kon kon soi tơguăt tơguăl păng tơdrong hơrih phĭ tơtŏ dơnŏ 'lơ̆ng. Bơngai pơgơ̆r soi tơbeh noh Kră pơlei Ralan Klil tŏ pơlei Mlah, xah Phú Túc, dêh char Gia Lai ăn tơbăt, khôi juăt kăp gĭt gah đon lui, tơƀôh đon bơnôh hmach bơnê đơ̆ng kon bơngai hăm plenh teh, yang hơpang: “ 'Năr ou nhôn pơgơ̆r et soi kơ Yang, apinh Yang vei lăng sơđơ̆ng 'lơ̆ng ăn unh hnam. Apinh ăn mĕ ƀă yă ƀok arih sot, kon sou đei xa yua. Nhôn kŭp jom plang ăn kơ Yang minh pôm nhŭng kreo, 7 tơm tơdrô, hơpơi Yang sơng iŏk, asong ăn tơdrong pŭn ai, sơnêp sơnoi. Apinh ăn pơyan jang xa gơh giơ̆ng 'lơ̆ng, ƀa hơƀo đei yua lơ, đei mŭk tơmam răk 'măn, tơdrong arih phĭ tơtŏ dơnŏ 'lơ̆ng”.

Pơmai Kpă H’Nhung (bơngai Jarai) jĭ minh 'nu bơngai jang chơng tơmoi chă tơmang tơ̆ “Pơlei tơmang pơhiơ̆ tơpôl tơ̆ Plei Chuet”, phương An Phú, dêh char Gia Lai ăn tơbăt, khei hơdrol ki khŭl ngê̆ nhơ̆n chĭng chêng kơ pơlei adoi năm akŏm tơdrong pơdah “Chĭng chêng hơtuch giĕng - xa dôm tơmam xa 'lơ̆ng păng hơlen băt”.  Sơnăm hŏk ou ki, Pơlei tơmang pơhiơ̆ tơpôl Plei Chuet hlôi sơng 8 hnam trưng mâm non, jăl kơđeh, THCS păng THPT atŭm hăm lơ tơmoi lơ̆m păng 'nguaih kơ teh đak truh tơmang lăng. Đe oh hăt hot chă pơhrăm hao sing sơng, peh ƀa, pơhrăm tanh hơkă, tanh brai, đang kơ noh hrŭk hơbăn ao tanh kon kông ƀenh kơ đak kơ-ang 'lơ̆ng vă chŭp um tơƀlŏk. Pơmai Kpă H’Nhung ăn tơbăt: “Lơ̆m unh hnam, đei ƀă, đe pơmai oh adoi jang tơmang pơhiơ̆ tơpôl, hăt hot vang jang dôm tơdrong akŏm joh ayŏ mă yă ƀok pơsư̆ ăn. Khŭl chĭng chêng Plei Chuet nhôn, đei lơ jơhnơr hơdruh tơdăm, păng ngê̆ nhơ̆n sơnăm mơlôh vang akŏm chơt hơ-iă vă tôn pơdah chĭng chêng păng hơsuang juăt jue kơ bơngai Jarai. Nhôn akŏm tôn pơdah chĭng chêng 'măn ăn tơmoi đơ̆ng jơ̆p tơring truh lăng. Nhôn hơ-iă lơ̆m đon bơnôh păng sơng drơ̆ng tơmoi truh tơmang tơ̆ pơlei pơla”.

Ƀok Bùi Trọng Hiền – bơngai jang hơlen chih akŏm tơdra hơri brông păng joh ayŏ kră sơ̆ Việt Nam (lơ̆m Hŏk viê̆n Tơdra hơri teh đak Việt Nam) đei lơ sơnăm tơguăt hăm joh ayŏ kon kông tơ̆ Gia Lai tơroi: “Chĭng chêng ah hơtuch giĕng jĭ cham pơhiơ̆ 'nao, pơm trong ƀônh ăn dôm hơmrŭk chĭng chêng so gơh re ang tơ̆ bri kông. Kiơ̆ kơ inh, bơ̆n 'meh vei răk chĭng chêng noh athei đei dôm khŭl chĭng chêng păng dôm hơmrŭk chĭng chêng so păng athei gơh năm tôn pơdah. Inh ƀôh tơdrong jang tơmang pơhiơ̆ tơpôl hơnhăk chĭng chêng jing tơmam drăm pơm jang, 'noh jĭ minh trong jang mă bơ̆n athei pơm kiơ̆”.

Tơ̆ tơring kơdrơ̆m bri kông Pleiku, Gia Lai, re ang tơdra chĭng chêng, tơdrong hơsuang hrou atŭm hăm cham char joh ayŏ Jarai hlôi răk 'măn tơdrong vơch ưh kơ hiơt lơ̆m đon bơnôh tơmoi. Ưh hơdrô̆ jĭ minh tơdrong hơlen băt, “Chĭng chêng hơtuch giĕng - xa dôm tơmam xa 'lơ̆ng păng hơlen băt” oei tơgop tơ̆k hơdah tơdrong hơrih kơjăp sơđơ̆ng ăn kơ tơdrong joh ayŏ chĭng chêng Tây Nguyên.