Mă lei, găh rŏng tơdrong ‘lơ̆ng anoh, dôm tơdrong oei tơhlăk, ưh kơlăp đơ̆ng chă tơmang lăng tơ̆ tơring oei đei ‘năi, pơm ăn anih jang mŭk drăm gĭt kăl âu vă huŏng lơ̆m tơdrong ưh kĕ jang tŏk. Tơdrong hơpo Chă tơmang lăng kuăr bri - chro ti pel đak dơsĭ đơ̆ng Đắk Lắk oei jang răh rai yoa trong kơnê̆, pơm ăn tơring jing dêh char “Hơtăih ‘mêm vă - jê̆ ƀlă hơchăng lăng pơhơi”.

Chă tơmang lăng Kơthôt Nhạn dêh char Đắk Lắk tơ jê̆ năr Lêh ai Yă đei tơmoi tôch kơ lơ. Mŏ Tống Thị Hải Yến, tơmoi chă tơmang lăng truh đơ̆ng Phú Thọ tơbăt, ĭnh ‘nao đei năm hơtăih hloh 180km đơ̆ng Buôn Ma Thuột kơna lap dêh. Mĭnh ƀar ‘nu tơmoi lơ̆m khŭl hlôi măh lĕch đơ̆ng tour, ưh kơ kĕ vă năm hơyoh pơgê ‘noh koăr bri, kơsơ̆ ngôi tơ̆ đak dơsĭ; pơgê huch cheh phe Ban Mê, kơsơ̆ lăng san hô Hòn Yến. Mŏ Yến akhan, trong năm đơ̆ng dôm hơnih truh hơtaih băl, trong ưh kơ ‘lơ̆ng kơna jơ năr ‘măn ăn kơ chă nơnăm lơ hloh kơ jơ năr chă tơmang lăng.

“‘Nâu jĭ ‘măng mă blŭng ĭnh truh tơ̆ âu ‘noh ĭnh ƀôh tơrong teh âu tôch kơ ‘lơ̆ng, kon bơngai rơhâu, pơvih pơvăn kŭm ‘lơ̆ng. Mă lei oei tam mă hơiă, tam mă đei tơmơ̆t jên jang ‘lơ̆ng, tam mă đei lơ tơdrong pơvih pơvăn vă gơ̆t jơ̆ng tơmoi. Tơdăh hơtŏk tơiung ‘lơ̆ng ‘noh hơnih âu oei lơ tơmam ‘lơ̆ng hloh”.

Chă tơmang lăng Đắk Lắk oei răh rai, ưh kơ akŏm, kŭm jing hơlen lăng atŭm đơ̆ng lơ anih mơdro sa găh chă tơmang lăng. Dôm jăl trong hơtăih, tơmam ưh kơ ‘lơ̆ng lơ pơm ăn tơdrong hơiă tơ jur. Đơ̆ng anih kơdrơ̆m Buôn Ma Thuột tơ̆ păih Pơmơ̆t truh đak dơsĭ păih Hơlĕch hơtăih hloh 180km. Đơ̆ng Buôn Ma Thuột truh dôm hơnih chă tơmang lăng iĕ hloh, nhen Dơnâu đak Lắk, Buôn Đôn kŭm hơtăih vă dang 50km. Mŏ Phạm Bích Hạnh, tang măt 1 kŏng ti chă tơmang lăng tơ̆ pơlei tơm Hồ Chí Minh tơbăt:

 “Jăl trong chă nơnăm hơtăih dêh, tơmoi gô tôch kơ lăp tơdăh năm chă lăng đơ̆ng Hơlĕch truh tơ̆ Pơmơ̆t kơ Đắk Lắk. Tơdăh hơmet ‘lơ̆ng đei trong nơnăm ‘noh tơmoi năm tơ̆ gô ‘lơ̆ng hloh”.

Ƀok Trần Hữu Phước, anih jang găh tơmang lăng tour apŭng plĕnh teh đơ̆ng Việt – Lào akhan, hơtăih băl dêh, trong nơnăm tam mă ‘lơ̆ng pơm ăn tơdrong pơgơ̆r dôm tour năm đơ̆ng bri păng đak dơsĭ oei lơ pơgăn:

“Hrei ‘nâu dôm trong mă tơƀưh đơ̆ng groi kông păng dôm dêh char tơ ter đak dơsĭ Tơring tŏk bŏk tŏk bŏk oei kơnê̆”

Kŭm hăm tơdrong trong nơnăm, chă tơmang lăng tơ̆ Đắk Lắk kŭm đei akhan ‘noh jĭ oei ưh kơ ‘lơ̆ng tôch kơ lơ. Tơmoi truh tơ̆ dôm hơnih chă lăng ngôi tơ̆ Đắk Lắk, phĭn rup đang bơih tơtĕnh lĕch năm. Dôm tơdrong jang joh ayŏ tơ̆ lơ hơnih oei trăp găh tơdrong pơm tơƀôh, ưh kơ đei chă hơdai băl păng ưh kơ đei dôm tơdrong pơvih pơvăn pơdui đunh jơ năr ƀĭch pơdơh ngôi, kơna Đắk Lắk jing tơring “Hơtăih ‘mêm vă – jê̆ ƀlă hơchăng lăng pơhơi”. Ƀok Dương Quốc Tuấn, bơngai jang chă tơƀôh, tơroi găh tơmang lăng trong Tây Nguyên – tơ ter đak dơsĭ Tơring tŏk bŏk tơbăt, tơdrong lei lăi băl tơ̆ lơ hơnih truh ‘noh jĭ tơdrong kơ kĕ tơ răn hloh kơ Đắk Lắk.

“Mŭk drăm kơmăng ‘noh oei ưh kơ ‘lơ̆ng, ưh kơ găn đei hơnih pơngôi yua đơ̆ng bơ̆n ưh kơ pơm mŭk drăm kơmăng nhen Thái Lan. oei găh cham char bri brăh ‘noh dang ei tơmoi đe sư tă kơ tơgop nơ̆r ‘noh jĭ vă lei lăi băl găh dôm hơnih chă ngôi, yua kơ dôm hơnih vă lei lăi băl ‘noh rok băl đĭ, tam mă ‘lơ̆ng”.

Đơ̆ng rŏng kơ tơmơ̆t hơdai, Đắk Lắk đĭ đei đak dơsĭ, pơih ăn hơmĕng tih tên ăn chă tơmang lăng koăr bri - hum đak dơsĭ. Mă lei, kơsô̆ găh iŏk yua kŭm ăn ƀôh 1 tơdrong yan âu tôch kơ mơmat tat. Lơ̆m năr pơdơh lêh ‘năr 30/4 păng 'năr 1/5 âu ki, iŏk yua đơ̆ng chă tơmang lăng Đắk Lắk đei hloh 520 ti hlak jên, lăp hơtŏ dang 1 puăt Gia Lai, dang 1 hơgăt 3 Lâm Đồng păng lăp dang 1 hơgăt 5 Khánh Hòa.

Tơdrong ưh kơ kĕ tŏk đơ̆ng tơmang lăng Đăk Lắk oei tơƀôh tơ̆ hơnih ƀĭch pơdơh ưh kơ ‘lơ̆ng, ƀơ̆t lăp đei 2 hơnih đei pơkăp ‘lơ̆ng 5 hơ nglŏng; 4 hơnih đei 4 hơnglŏng, 9 hơnih đei 3 hơnglŏng. Dôm hơnih chă tơmang lăng đe ư hơnhang hloh kơ Đắk Lắk, nhen Bản Đôn, Dơnâu đak Lắk, Anih ‘măn răk tơmam drăm so, Dơnâu Ea Kao… tă kơ tơgop tôch kơ tŏ sĕt lơ̆m jang tŏk atŭm kơ dêh char.

Kiơ̆ kơ yă Nguyễn Thị Ngọc Anh, Kơdră Khŭl drŏ kăn mơdro sa dêh char Đắk Lắk, chă tơmang lăng cham char bri brăh - tơpôl ‘noh jĭ tơdrong pran kơ dêh char, mă lei anih mơdro sa lăp pơ̆n tơmơ̆t jên jang pơm iĕ yua kơ teh chă tơmang lăng mă dêh char ăn thuê tŏk bŏk đei iŏk kơjă teh mơdro sa pơvih pơvăn. Tơdăh Đắk Lắk ưh kơ hơmet pơ ‘lơ̆ng dôm tơdrong tơhlăk tơhlĭn âu, chă tơmang lăng tơ̆ dêh char tôch kơ hơnat yak tŏk vă lĕch đơ̆ng tơdrong ưh kơ kĕ tơ răn hrei ‘nâu.

“Đei lơ trong jang tơgŭm găh cham char, teh păng dôm tơdrong hơgăt ƀơm truh tŏk bŏk jing pơgăn hăm bơngai tơmơ̆t jên jang tôch hơdrin. Tơdăh trong jang tơgŭm ưh kơ kĕ hiôk ‘noh tôch kơ hơnat đei dôm tơdỏng jang chă tơmang lăng pơgơ̆r tih mă lăp đei hơtŏk tơiung kơloăi iĕ, le đĕch”.