Kiơ̆ hla ar chih tơdrong jang, Đắk Lắk tơlĕch trong atŏk tơiung chă tơmang lăng kiơ̆ trong rơgŏh ‘lơ̆ng, pran kơjăp, tơklep hăm vei kơjăp dôm tơdrong joh ayŏ kơ dŏ xoang tơ̆ tơring, tơmam drăm cham char bri brăh păng pơjing tơmam chă tơmang lăng đei hơdrô̆ tơ̆ tơring Tây Nguyên. Dôm tơmam tơm đei chih hơdăh ‘nŏh chă tơmang lăng tơ̆ bri brăh, pơdơ̆h ngôi, truh lăng tơdrong joh ayŏ kơ dŏ xoang tơpôl, tơmăng lăng tơdrong choh jang xa, tơmang lăng cheh phe, tơmang lăng hăm rôih păng tơmang lăng kiơ̆ tơdrong juăt tôn chĭng chêng Tây Nguyên.

Tơ̆ hop akŏm, lơ bơngai tang măt akhan Đắk Lắk đei lơ tơdrong ‘lơ̆ng vă atŏk tơiung chă tơmang lăng gơnơm đơ̆ng cham char bri brăh, chơkơi đak, dơnâu đak kŭm hăm tơdrong joh ayŏ kơ dŏ xoang tôch ‘lơ̆ng đơ̆ng Tây Nguyên. Mă lei, dêh char athei hơlen năng mă tôm rim tơdrong kiơ kăl vă atŏk tơiung; pơ ‘nhŏ ăn dôm tơmam ‘lơ̆ng hơiă pha ƀiơ̆. 

Ƀok Phan Bửu Toàn, Phŏ Kơdră vei ălng Khul jang găh chă tơmang lăng plt HCM pơma hơdăh: “Inh tơchĕng blŭng a ‘nŏh Đắk Lắk athei hơlen năng dơ̆ng dôm tơmam kiơ đĭ đei bơih păng hlôi đei iŏk yoa truh dang yơ, adrin pơjing păng hơmet pơ ‘lơ̆ng, pơm hơtŏk tơmam ‘noh vă bơ̆n gơ̆h vei kơjăp anih dơ̆ng ‘nŏh. Pơtih gia, pơma truh cheh phe ‘nŏh đe bou truh hloi kơ Đắk Lắk, tơmam đơ̆ng cheh phe ưh kơ đei pơm ƀônh kiơ ôh, thoi noh jĭ 1 tơdrong arih kiơ̆ đơ̆ng cheh phe, ‘nŏh jĭ 1 tơdrong truh hơlen năng găh tơdrong arih hăm cheh phe, kơplăh dŏh kơnh sư jing tơmam ‘lơ̆ng hlŏh dơ̆ng. Tơdăh bơ̆n ưh đei tơmam kiơ đei hơdrô̆ ‘nŏh athei chă đei trong jang pha ƀiơ̆ kơ đe”.

Mĭnh kơsô̆ nơ̆r pơma akhan, chă tơmang lăng Đắk Lắk oei đei lơ tơdrong tơhlăk nhen trong yak ưh tam ‘lơ̆ng, ưh đei lơ tơmam, tơdrong pơvih pơvăn tơ̆ kơmăng tam mă pran păng tam mă đei anih tơmât jên jang đei trong jang rơgei 'lơ̆ng. Kiơ̆ ƀok Đặng Xuân Vũ, Kơdră chĕp kơ̆l Công ty Chă tơmang lăng Đắk Việt, tơdrong pơjing jang xa răh rai đơ̆ng dôm anih chă tơmang lăng lơ̆m dêh char oei pơm pơmat tat ăn tơdrong pơjing dôm tour chă tơmang lăng kơjăp 'lơ̆ng vă gơ̆h gơ̆t jơ̆ng tơmoi.

“Đơ̆ng Hơlĕch păng Pơmât kơ dêh char bơ̆ jang hơdoi tam mă ‘lơ̆ng, dang ei oei jang răh rai pha ra băl, vă akhan dôm tơmam âu tam mă đei tơmât hơdai ‘lơ̆ng hăm băl, păng đơ̆ng tơring âu truh tơring to oei hơtăih băl. Kơna vă tơdrong jang ‘nâu gơ̆h tơmât hơdai kơjăp ‘lơ̆ng jing 1 tour ‘nŏh oei tôch mơmat, tơdăh jơnăr yak đơ̆ng tơmoi truh tơ̆ 2 anih kơđeh ƀiơ̆, jê̆ ƀiơ̆, ‘nŏh ưh jor đơ̆ng rŏng kơnh tơdrong chă tơmang lăng âu gô tơklep kơjăp hăm băl”.

Ƀok Lê Phúc Long, Phŏ Kơdră Anih vei lăng joh ayŏ kơ dŏ xoang, Tơplŏng kơdâu păng chă tơmang lăng kơ dêh char Đắk Lắk ăn tơbăt, dêh char tơlĕch trong atŏk tơiung chă tơmang lăng kiơ̆ đơ̆ng truh hơlen tơ̆ yăn âu, pơdui jơnăr tep pơdơ̆h păng hơtŏk jên răt yoa tơmam đơ̆ng tơmoi tơplih ăn lăp akŏm jơhngâm sơng lơ tơmoi. Kŭm hăm ‘nŏh, dêh char năng kăl truh tơdrong jang hơdoi hăm dôm tơring tơter đak dơsĭ Nam Trung Bộ vă pơjing dôm trong chă tơmang lăng tơguăt kơjăp đak dơsĭ hăm bri kông.

“Kơlih đơ̆ng dôm tơdrong tơhlăk găn trong ‘nŏh kơna chă tơmang lăng Đắk Lắk oei năm đơ̆ng rŏng pơting hăm dôm tơring nai jŭm dăr nhen Gia Lai, Khánh Hòa dăh mă Lâm Đồng. Anih nhôn hlôi jang hơdoi hăm dôm anih jang vă chih tơroi ăn Anih vei lăng kon pơlei dêh char, mĭnh lơ̆m dôm tơdrong ƀơm truh Khul kơdră teh đak, dôm anih tơm, anih jang kơpal ‘nŏh athei gô dôm anih jang kơpal đei nơ̆r pơma ‘mơ̆i. Vă atŏk tơiung chă tơmang lăng ‘nŏh Anih nhôn vă roi tơƀôh, chih pơjing tơdrong Tơchơ̆t tơgŭm atŏk tơiung chă tơmang lăng lơ̆m tơpôl tơ̆ dêh char kŭm nhen dôm tơdrong jang găh tơmang lăng, đơ̆ng noh đei trong tơgŭm lăp ‘lơ̆ng vă dôm tơring kŭm nhen anih jang gơ̆h tơlĕch jang tơ̆ hơnăp kơnh”.