Lơ̆m hnam iĕ tơ̆ thôn Bình Tiến, xah Phan Hiệp, apŭng Bắc Bình, Bình Thuận, ngê̆ nhơ̆n Lương Thị Hòa layơ adoi hăt hot hăm lơ tơmam drăm lơ̆n đei đe chih măt răt đơ̆ng jơ̆p tơring lơ̆m teh đak. Pơm jang ưh đei pơdơh pơdơi mă lei layơ yă adoi kơchăng tơroi hăm rim bơngai gah tơdrong jang lơ̆n, kơlih 'noh jĭ tơdrong kuăt tơdrong nhan kơ jơhnơr hơrih yă.

Đei mih yă pơtho ăn tơdrong pơm lơ̆n đơ̆ng sơnăm 1978, truh dang ei hlôi jê̆ 50 sơnăm ngê̆ nhơ̆n Lương Thị Hòa ƀôh sô̆ hơ-iă ah mă tơmam lơ̆n kơ unh hnam yă đei lơ tơmoi lŭ lăp, mă kăl noh tơmoi đơ̆ng hơtaih truh. Tơmam tĕch tơlĕch adoi lơ, gơnơm đơ̆ng noh tơdrong pơyua kơ unh hnam đei ƀôh ƀiơ̆.

Yă Hòa tơroi, đơ̆ng mă tam jang tơmam lơ̆n 'nao, tơmam lơ̆m juăt jue ưh đei yua lơ, mă kăl noh jang chă pơhơi đĕch, lơ ngê̆ nhơ̆n hadoi minh hnưr hăm yă hŭt lê̆ tơdrong jang, oei yă 'noh kơlih kuăt đon hăm tơdrong jang, 'noh chă pơtoi vei truh dang ei: "Sơnăm 2001, đei Phŏ Giáo sư, Tiến sĩ Thành Phần vih tơ̆ ou pơih lăm pơtho gah pơm lơ̆n 'nao. Truh sơnăm 2006, dêh char Bình Thuận pơih lăm pơtho gah pơm tơmam lơ̆n 'nao tơ̆ pơlei, đơ̆ng rŏng kơ noh asong năm pơhrăm tơ̆ pơlei juăt pơm tơmam lơ̆n Bàu Trúc 'nguaih kơ dêh char Ninh Thuận, đơ̆ng rŏng kơ noh inh vih tơ̆ ou pơm jang păng ƀôh jang gơh mơ̆n"

Mă sơnăm hlôi 'lŏ mă lei kơyuơ đon kuăt hăm tơdrong jang, pơjing đei lơ tơmam lơ̆n 'nao kăp gĭt noh ngê̆ nhơ̆n Lương Thị Hòa hơnơ̆ng đei Anih Pơdah tơmam drăm so dêh char Bình Thuận păng dôm anih resort hơvơn truh pơdah gah tơdrong pơm lơ̆n lơ̆m dôm năr lêh tih kơ teh đak vă 'măn ăn tơmoi chă tơmang lăng.

Rim tơmam drăm lơ̆n kơyuơ ngê̆ nhơ̆n Hòa pơm đei adoi 'lơ̆ng, akŏm ƀenh um ai joh ayŏ kơ bơngai Chăm păng đei lơ um rŭp nhen: kop yang, linga yoni, kơthôt đak Bình Thuận, kơthôt Chăm, kơ-'lŏ pơkao, thŏng nan, rŭp ka... Rim tơmam lơ̆n kơ unh hnam yă pơm tơlĕch 'noh tih iĕ phara băl, gơh chă 'măn lơ̆m kơdŭng, dah mă ba-lô, ƀônh ăn tơmoi chă vih vơ̆t…

Tơguăt hăm tơdrong jang lơ̆n vă jê̆ 50 sơnăm, ngê̆ nhơ̆n Lương Thị Hoà jĭ minh lơ̆m dôm bơngai pơm lơ̆n juăt jue đunh sơnăm tơ̆ pơlei jang lơ̆n ou. 'Nou adoi jĭ tơdrong jang pơyua dơnơm ăn unh hnam yă đơ̆ng lơ sơnăm kơ ou.

Yă Lư Thái Tuyên, Phŏ Kơdră Anih Pơdah tơmam so dêh char Bình Thuận ăn tơbăt: Đơ̆ng chăl ƀok pơtao hơdrol ki truh tơdrong hơrih hrei ou, tơmam lơ̆n ưh gơh kơƀah lơ̆m tơdrong hơrih rim năr kơ rim unh hnam păng lơ̆m joh ayŏ đon lui kơ kon pơlei Chăm. Anih Pơdah tơmam so dang ei oei vei răk păng pơdah hloh 1.500 tơmam drăm, lơ̆m noh đei dôm tơmam drăm lơ̆n Chăm kră sơ̆ đei đơ̆ng lơ anglŏ sơnăm kơ ou păng tơmam lơ̆n juăt jue 'măn yua rim năr. 'Nguaih kơ akŏm pơdah tơmam lơ̆n kơ pơlei pơm jang, Anih Pơdah tơmam so oei hơnơ̆ng hơvơn đe ngê̆ nhơ̆n truh pơdah, pơtho gah trong pơm lơ̆n adoi nhen chă chơng tơmoi năm tơmang, hơlen băt păng pơm lơ̆n tơ̆ pơlei jang lơ̆n Bình Đức. Yă Lư Thái Tuyên tơroi gah Ngê̆ nhơ̆n Lương Thị Hoà:  "Ngê̆ nhơ̆n Lương Thị Hoà tơguăt hăm tơdrong jang lơ̆n jê̆ 50 sơnăm kơ ou, 'nguaih kơ tơdrong chă pơm, hơlen băt dôm um rŭp 'nao, yă oei băt chă tơblang dôm tơdrong pơm tơmam lơ̆n ăn tơmoi chă mơ̆ng lăng. Kơyuơ noh, mă anih jang hơnơ̆ng hơvơn yă vang năm pơtho lăm pơhrăm pơm tơmam lơ̆n tơ̆ Anih akŏm pơdah gah joh ayŏ Chăm; pơdah tơdrong pơm tơmam lơ̆n tơ̆ Anih gru gra kơthôt Pô Sah Inư. Tơdrong mă yă pơm jang hlôi tơgop vei răk tơƀăk mong dôm kơjă joh ayŏ juăt jue kơ bơngai Chăm tơ̆ ou"

Mă đei pơtho tơdrong jang lơ̆n đơ̆ng yă ƀok dơnơm mă lei dang ei pơlei jang lơ̆n tŏk bŏk oei ƀơm tơnap tap pơm ăn minh ƀar unh hnam jang lơ̆n pă đei oei lơ. Roi đunh sơnăm đe ngê̆ nhơ̆n hơgei gah pơm tơmam lơ̆n Chăm roi hôi rơrơch.

'Noh adoi jĭ tơdrong pơngơ̆t kơ đon hăm ngê̆ nhơ̆n Lương Thị Hoà. Yă tơroi: Đei sơnăm ưh đei pơih lăm pơhrăm, dah mă đe hơ-ioh hŏk lơ̆m minh ƀar năr đang kơ 'noh pơdơh lê̆, yă hĕl kơ đon. Mă lei yă tơchĕng, hơbŏ tih ƀiơ̆ noh đe sư pơtơm băt hơdah păng lăp kơ tơdrong jang lơ̆n, ƀơ̆t vih hơlơ̆k pơhrăm jang adoi tam mă klui ôh. Mă lei, truh khei năr 'noh hơbŏ yă pă đei oei pran vă chă pơtho ăn. Tơdrong mă yă sô̆ hơ-iă hrei ou noh tơmam drăm lơ̆n kơ unh hnam hlôi đei tơring rơih păng pơkăp jĭ tơmam OCOP 3 sao, 'noh adoi jĭ jơhngơ̆m pran vă yă pơtoi tơguăt hăm tơdrong jang juăt jue: "Inh hơpơi 'meh grăng pran ling lang vă pơm tơlĕch lơ tơmam drăm lơ̆n đei pơkăp sao OCOP vă hăp păr hơtaih hloh dơ̆ng, gơh chă truh tơ̆ teh đak đe hloi"

Ngê̆ nhơ̆n Lương Thị Hòa hlôi păng tŏk bŏk tơgop chă vei răk tơƀăk mong dôm kơjă joh ayŏ păng tơdrong jang lơ̆n juăt jue kơ bơngai Chăm tơ̆ dêh char Bình Thuận, 'nhăk tĕch tơmam lơ̆m tơring teh đak păng teh đak đe hăm tơdrong hơpơi 'meh đei lơ bơngai băt truh tơmam drăm lơ̆n kơ bơngai Chăm Việt Nam hloh dơ̆ng.