Tơ̆ hnam trưng THPT Trần Đại Nghĩa, apŭng sơlam teh Buôn Đôn, Jơnŭm Văn hŏk Ngê̆ thươ̆t Đăk Lăk pơgơ̆r tơdrong jang “Rim hlak săch pơih – Tơdrong sô̆ pơ-ư păr ang”. Tơ̆ ou, đe oh hŏk tro đei hơlen băt dôm tơdrong akŏm, pơdah săch, đŏk săch păng cham pơhiơ̆ gah pơkăp đŏk săch 'lơ̆ng hơ-iă; hrou hăm tơdrong tơroi kiơ̆ đơ̆ng dôm tơdrong pơm tông păng dôm tơdrong joh hơri kăp gĭt.

Ƀơ̆t 'măng ou, Jơnŭm Văn hŏk Ngê̆ thươ̆t Đăk Lăk hlôi pơjao dôm jĭt kơsơ̆p săch văn hŏk ngê̆ thuơ̆t asong ăn hnam trưng THPT Trần Đại Nghĩa păng tơbang kơsơ̆p săch “Tak phâm Văn hŏk Ngê̆ thươ̆t, Ƀăo chĭ hŏk pơhrăm păng pơm kiơ̆ đon bơnôh trong jang 'lơ̆ng Hồ Chí Minh” kơyuơ Jơnŭm jang chih akŏm. Kơsơ̆p săch hơƀơ̆l hloh 300 hlak, akŏm dôm tak phâm đơ̆ng rim bơngai jang joh ayŏ, bơngai jang ƀăo tơ̆ Đăk Lăk lơ̆m lơ tơdrong jang nhen mi thuơ̆t, tơdra hơri, chih văn, chih thơ păng ƀăo chĭ. Rim tak phâm 'noh minh tơdrong tơroi, um rŭp 'lơ̆ng gah tơdrong hơrih, akŏm ƀenh kơ ƀai hŏk kăp gĭt gah tơdrong hŏk pơhrăm păng pơm kiơ̆ đon bơnôh, trong jang 'lơ̆ng  đơ̆ng Kơdră Hồ Chí Minh. Bơngai chih thơ Nguyễn Tiến Sỹ, oei tơ̆ pơlei tơm Buôn Ma Thuột tơroi: “Tơdrong hŏk pơhrăm păng pơm kiơ̆ đon bơnôh 'lơ̆ng đơ̆ng Ƀok jĭ minh tơdrong chih akŏm tih tên. Inh hơnơ̆ng akŏm lơ̆m tơdrong juăt jue so, jơhnơr hơrih păng đon bơnôh kăch mang, mă kăl lơ̆m khei năr teh đak tŏk bŏk yak pơm jang ah chăl sơnăm 'nao. Khei năr ou ki, inh đei minh ƀar tak phâm chih gah tơdrong juăt jue kơ kon pơlei, đei 3 ƀai pơđơ̆k hlôi đei in lơ̆m kơsơ̆p chih akŏm kơ Jơnŭm Văn hŏk Ngê̆ thươ̆t đei tơbang lơ̆m 'măng ou”.

Adoi lơ̆m 'măng ou, tơ̆ Anih răk păng đŏk săch dêh char Đăk Lăk pơgơ̆r tơdrong tơbang săch rŭp “Pơlei jang tơdrong jang so Việt Nam” đơ̆ng Helena Vân. Kơsơ̆p săch akŏm hloh 150 um rŭp gah dôm pơlei jang tơdrong jang so kơ 3 tơring Tu – Tŏk bŏk – Pơbah. Dôm hơnăn chih akŏm đei chih hăm 2 nơ̆r Việt – Anh. Bơngai chŭp um Helena Vân ăn tơbăt, kiơ̆ đơ̆ng kơsơ̆p săch, pơmai 'meh răk 'măn akŏm tơdrong tơroi joh ayŏ kơ rim pơlei jang tơdrong jang so hăm đak kơ-ang păng unh pơchră hơdah: “Đơ̆ng lơ rŭp chŭp kơ dôm pơlei jang tơdrong jang so phara băl, inh akŏm păng rơih đei lơ um rŭp kăp gĭt mă pơlei jang tơdrong jang so tŏk bŏk jê̆ hiơt hiong, oei tŏ sĕt unh hnam păng bơngai vei răk păng pơm jang tơdrong jang so ou. Inh hơpơi 'meh gô đei pơih să kơsơ̆p săch ou păng gơh asong ăn dôm anih đŏk lăng kơ dôm dêh char vă rim bơngai truh tơ̆ noh đŏk hơlen, gơh chă mơ̆ng vă hơmet hơtŏk dơ̆ng pơlei jang tơdrong jang so păng hơpơi 'meh đei lơ bơngai băt truh hloh hăm dôm pơlei jang tơdrong jang so sơ̆ mă tŏk bŏk oei ƀơm hiơt hiong".