Đơ̆ng rŏng 50 sơnăm teh đak jing mĭnh, tơdrong chih pơcheh văn, čhơ̆ um rup tơ̆ Đắk Lắk đei dơ̆ng lơ ƀai chih, rup ‘nao ‘lơ̆ng hơiă, tơƀôh hơdăh jơhngâm đon ‘mêm kơ teh đak păng ƀĕnh tơdrong ‘lơ̆ng, iŏk yoa rim tơdrong juăt, jŏh ayŏ kơ dŏ xoang ‘lơ̆ng đơ̆ng dôm hơdrĕch kon kông. Dêh char chih akŏm đei kơhrĕng Tơdrong hơ ‘mon Rađe păng M’nông, tơdrong tơroi kră sơ̆, rơbâu nơ̆r soi lơ̆m rim tơdrong et soi đơ̆ng kon pơlei. Ƀơk kơhrĕng sơmrŭk chĭng chêng păng hơbăn ao tanh, pơgơ̆r lơ tơdrong lêh soi, tơmât tơdrong chĕp vei hăm tưk tơiung chă tơmang lăng.

Đơ̆ng đei lơ tơdrong jŏh ayŏ kơ dŏ xoang kơ dôm hơdrĕch hơdrung hlôi pơjing ăn Đắk Lắk đei lơ tơdrong chih pơchĕh, čhơ̆ um rup tôch hơiă. Ƀok Nguyễn Văn Cừ, Kơdră Anih roi tơƀôh păng krao hơvơn kon pơlei apŭng Ea Sup akhan, tơdrong chĕp vei păng tưk tơiung dôm kơjă kăp gĭt đơ̆ng jŏh ayŏ kơ dŏ xoang so vă chih pơcheh, phĭn, čhơ̆ um rup athei tơmât hơdai hăm atŏk tơiung chă tơmang lăng păng jang mŭk drăm hai:

“Iŏk tơdrong jŏh ayŏ kơ dŏ xoang vă jang mŭk drăm păng đơ̆ng rŏng kơ ‘nŏh iŏk jŏh ayŏ kơ dŏ xoang rong kơdih sư. Pơjing tơdrong chă tơmang lăng kơ apŭng Ea Sup, chă ngôi jŭm dăr dơnâu Ea Sup thượng, kơthôt Giang Prong, năm ngôi hăm mih ma duch nă 5 pơlei tơ̆ thĭ trơ̆n Ea Sup hăm jơva chĭng chêng, pơvih tơmam xa, joh ayŏ kơ dŏ xoang, et soi, xa tơmam hơdai vă kon pơlei atŏk tơiung mŭk drăm lơm unh hnam, đơ̆ng noh pơjing tơdrong jang klĕp ‘lơ̆ng, ‘nŏh jĭ mŭk drăm, jŏh ayŏ kơ dŏ xoang, chinh trĭ păng tơpôl tŏk pran ‘lơ̆ng păng sơđơ̆ng”.

Ƀok Trần Doãn Tới, Phŏ Kơdră Anih roi tơƀôh păng krao hơvơn kon pơlei dêh char Đắk Lắk ăn tơbăt, pơ ‘yoi dơ̆ng dôm tơdrong jơnei, dêh char hơnơ̆ng pơjing dôm tơdrong jang, trong jang sơđơ̆ng ‘lơ̆ng vă atŏk tơiung tơdrong chih pơđơ̆k, phĭn, čhơ̆ um rup lơ̆m chăl ‘nao: “Anih roi tơƀôh păng krao hơvơn kon pơlei dêh char vă hơnơ̆ng roi tơbăt ăn Anih chĕp kơ̆l Đảng dêh char vă đei nơ̆r pơtho tơtom, kiơ̆ đơ̆ng noh jang ‘lơ̆ng hlŏh dơ̆ng Tơdrong tơchơ̆t kơsô̆ 23 găh chih pơđơ̆k, phĭn, čhơ̆ um rup. Păng mưh bơ̆n yak mât lơ̆m chăl jang tŏk, tơmât hơdai anih jang, groi teh, ưh jor gô đei lơ tơdrong tơplih roi ‘lơ̆ng hơiă ƀiơ̆ găh chih văn, phĭn čhơ̆ um rup păng jŏh ayŏ kơ dŏ xoang, tơlĕch jang păng tưk tơiung jơhngâm pran atŭm đơ̆ng joh ayŏ kơ dŏ xoang kơ tơring groi kông, hơdai hăm tơdrong chih pơcheh, phĭn, čhơ̆ um rup kơ tơring tơter đak dơsĭ găh Pơbăh Tơring Tŏk bŏk mưh bơ̆n tơmât hơdai kơnh”.

Năm truh chăl jang tŏk ‘nao, tơmât hơdai ‘lơ̆ng tơdrong jŏh ayŏ kơ dŏ xoang – chih pơcheh, phĭn, čhơ̆ um rup păng jang mŭk drăm, mă loi jĭ chă tơmang lăng, gô pơih đei lơ tơdrong ‘lơ̆ng tih ăn Đắk Lắk jang tŏk pran kơjăp, vei lăng ‘lơ̆ng tơdrong juăt đơ̆ng kră sơ̆ păng tưk tơiung tơdrong chih pơcheh ‘nao. Đơ̆ng tơdrong juăt chăl adrol sơ̆, jŏh ayŏ kơ dŏ xoang ‘lơ̆ng hơiă păng jơhngâm đon ‘mêm kơ teh đak tôch ai, tơdrong chih văn, phĭn, čhơ̆ um rup Đắk Lắk hrei ‘nâu oei tŏk hơnơ̆ng, păr ang jơ̆p tơring, vang tơgop pơjing 1 tơring Tây Nguyên pơdrŏng, ‘lơ̆ng rŏ.