Đơ̆ng rŏng 7 khei tơlĕch jang, dêh char Đắk Lắk hlôi jang đang 4 lơ̆m akŏm 10 tơdrong hơgăt păng 14/32 hơnăp jang kơ sơnăm 2026; dôm tơdrong hơgăt, hơnăp jang uơ oei dơ̆ng tŏk bŏk bơ̆jang kiơ̆ ƀlep tơdrong. Tơring hlôi tơlĕch ăn lơ trong jang, tơdrong tơgŭm gĭt kăl, mă hơdăh ‘noh jĭ Tơdrong tơchơ̆t 03 găh tơgŭm vei lăng păng hơtŏk tơiung kơjă kăp gĭt joh ayŏ tôn chĭng chêng jăl jang 2026-2030; tơlĕch jang pơjing anih chih răk tơmam drăm so, pơm hla ar hô sơ khoa hŏk hăm 1,2 tơmam drăm so, anih gru groa jơhnơr hơrih; hơdai hăm hơmet ăn dôm tơdrong joh ayŏ, tơmang lăng tih nhen Lêh Sầu riêng Đắk Lắk sơnăm 2026 păng Lêh Cheh phe Buôn Ma Thuột ‘măng mă 10 sơnăm 2027.

Pơma dơnuh tơ̆ ‘măng hop akŏm, dôm bơngai tang măt athei tơgŭm hơdrol pơm hơmet ming anih gru groa, pơjing tơmam joh ayŏ - tơmang lăng ‘lơ̆ng hơdrô̆, tŭn pran tơmơ̆t lơ̆m kơmăy kơsô̆ anih gru groa, vei răk nơ̆r pơma, chư chih kơ bơngai M'nông, Jarai păng hơtŏk jên jang ăn tơdrong jang joh ayŏ kơdŏ soang vă iŏk jang đei yua dôm kơjă kăp gĭt ‘lơ̆ng hơiă pơyua ăn hơtŏk tơiung tơmang lăng.

Pơtôch ‘măng hop akŏm, yă Huỳnh Thị Chiến Hòa, Phŏ Bí thư Anih jang Đảng dêh char, Phŏ Kơdră Anih pơgơ̆r jang găh hơtŏk tơiung joh ayŏ kơdŏ soang dêh char Đắk Lắk pơma hơdăh, pơtôch yak blŭng ‘nao pơm tơdrong ‘lơ̆ng, tơdrong gĭt kăl ‘noh jĭ athei tơplih dôm trong jang jing dôm tơmam joh ayŏ đei kơjă kăp gĭt, pơjing dôm anih jang kơmăy kơmŏk păng pơvih pơvăn joh ayŏ kĕ tơgop lơ̆m jang tŏk kơ tơring.

Yă Huỳnh Thị Chiến Hòa athei rim anih jang, tơring akŏm jang đang dôm tơdrong hơgăt uơ oei dơ̆ng, mă loi ‘noh jĭ hơnăp jang chih tơmơ̆t lơ̆m kơmăy kơsô̆ tơmam joh ayŏ, pơjing hơnăn tơmam joh ayŏ păng joh ayŏ kơsô̆ tơklep hăm đei yua hơdrô̆ kơ Đắk Lắk.

“Akŏm bơ̆jang kiơ̆ keh đang dôm tơdrong hơgăt uơ oei dơ̆ng păng tơdrong hơgăt ƀơm truh tơdrong chih tơmơ̆t lơ̆m kơmăy kơsô̆ dôm anih gru groa kơ teh đak păng anih gru groa gĭt kăl kơ teh đak. 10 hơnăp jang uơ oei dơ̆ng kơ sơnăm 2026 hơnơ̆ng hơlen lăng pơtho tơtom hơmet pơ ‘lơ̆ng mơmat tat, tơhlăk tơhlĭn, mă loi ‘noh jĭ hăm dôm tơdrong tơhlăk đei ƀôh đơ̆ng tơring. Pơjing hơnăn dôm tơmam kơmăy kơmŏk, pơvih pơvăn joh ayŏ pơma atŭm păng joh ayŏ kơsô̆ pơma hơdrô̆ ‘lơ̆ng hơiă, trŏ lăp hăm tơdrong păng jên jang kơ tơring.”