Ah pơgê hơtuch giĕng, lơ̆m hnam akŏm hŏk hôp kơ pơlei Puăn, xah Ea Phê, dêh char Đăk Lăk, jơva chĭng chêng re ang hrau atŭm hăm nơ̆r pơtho đơ̆ng đe ngê̆ nhơ̆n. Minh pah kơ hnam akŏm noh đe hơ-ioh 'măng mă blŭng chĕp tơnŭl tôn chĭng. Pah nai noh đe ngê̆ nhơ̆n lơ̆m pơlei tŏk bŏk oei pơhrăm lăng dơ̆ng dôm ƀai chêng mă hlôi hiơt hiong vă tôn mă trŏ, tôm tong hloh.

Minh pah noh jơva chĭng chêng re đơ̆ng tơpang ti tam mă kloh klĕch, phơ phŏ noh ưh kơ trŏ tơdra. Pah nai dơ̆ng noh, đe ngê̆ nhơ̆n lơ sơnăm tơguăt hăm chĭng chêng adoi oei pơtơm tôn dôm ƀai chêng juăt jue. Ƀok Y Cư Ayun, 'nguaih kơ 50 sơnăm, oei tơ̆ pơlei Puăn tơroi:  “Hơdrol ki inh kŭm băt, kŭm tôn chĭng chêng mă lei tam mă trŏ ôh, đơ̆ng kơdih chă pơhrăm hăm bôl buăl đĕch. 'Năr ou inh pơhrăm dơ̆ng, vă mă trŏ, vă mă vao tôm hloh, kơnh xah kăl noh ba năm akŏm pơdah gah chĭng chêng, hơsuang. 'Noh jĭ khôi juăt kơ bơngai ÊĐê ba kơdih, 'noh ba athei vei răk vă ning nai kơnh ưh đei hiơt hiong”

Bơngai pơtho 'noh Ngê̆ sih ưu tŭ Y Phôn Ksơr. Hnam oei tơ̆ phương Buôn Ma Thuột, mă lei ah đei hơnih jang joh ayŏ hơvơn, ƀok ưh kơ pơngơ̆t gah trong hơtaih hloh 40km truh tơ̆ hnam akŏm tơpôl kơ pơlei Puăn, xah Ea Phê lơ̆m năr hơtuch giĕng, vă pơtho dôm tơdrong mă kơdih hlôi akŏm đei vă vei răk tơdrong kăp gĭt yă ƀok pơsư̆ ăn. Ngê̆ sih ưu tŭ Y Phôn Ksơr tơroi, tơdrong mă ƀok pơngơ̆t kơ đon hloh noh tơdrong ưh kơ trŏ lơ̆m vei răk ah mă tơdra chĭng chêng ưh đei pơtho pơhrăm ưh kơ trŏ trong:  “Ou jĭ trong hiôk vă bơ̆n pơtho pơhrăm tôm tơdrong hlôi băt, kơlih rim tơring 'noh đei kơdih trong tôn chĭng chêng phara băl, mă lei inh hơpơi 'meh tơdrong tơm 'noh rim bơngai adoi băt. Ah pơtho tôn chĭng chêng ăn kơ đe sơnăm mơlôh noh athei đei tôm hơmrŭk, jô̆ hloi hơmrŭch chĭng Knah, sơgơ̆r, hơmrŭk chĭng Č’har vă tôm đe hơ-ioh, đe ngê̆ nhơ̆na doi băt truh”

Lăm pơhrăm tơ̆ pơlei Puăn đei pơhlom 30 'nu hŏk jĭ đe hơ-ioh păng ngê̆ nhơ̆n bơngai Ê Đê. Lơ̆m 25 năr, 'nguaih kơ pơhrăm tôn chĭng chêng, bơngai hŏk oei đei chih akŏm, kuay video, chih tơmơ̆t lơ̆m kơmăi kơsô̆ dôm ƀai chêng kră sơ̆. 'Nou jĭ minh lơ̆m 3 lăm pơhrăm gah chĭng chêng đei Hơnih Joh ayŏ, Tơplŏng kơdou păng Tơmang pơhiơ̆ Đăk Lăk pơih lơ̆m khei pơdơh hŏk sơnăm ou, vă tơmơ̆t vei răk tơƀăk mong lơ̆m pơlei pơla; adoi jing trong vă hơnih jang joh ayŏ tơ̆ tơring pơm jang tơnăp hloh dôm sơnong jang kiơ̆ Tơchơ̆t 80 hăm dôm tơdrong jang vei răk tơƀăk mong đơ̆ng tơring hloi.

Kiơ̆ kơ ƀok Trần Hồng Tiến, Kơdră Hơnih Joh ayŏ, Tơplŏng kơdou păng Tơmang pơhiơ̆ dêh char Đăk Lăk, đơ̆ng rŏng kơ dêh char tơbang Tơchơ̆t 03 gah tơgŭm vei răk tơƀăk mong tơdrong kăp gĭt gah chĭng chêng, hơnih jang joh ayŏ tŏk bŏk oei pơtho ăn rim tơring kơchăng tơlĕch jang, asong bơngai jang vă iŏk jang kiơ̆ tơchơ̆t tơgŭm ou mă tơnăp hloh: “Hơnih jang adoi pơtruh nơ̆r hăm Hơnih jang vei lăng kon pơlei dêh char gah Pơkăp pơm kiơ̆ tơchơ̆t tơlĕch, đei hla bơ-ar pơtho ăn rim tơring pơm kiơ̆ dôm tơdrong tơlĕch jang, dôm tơchơ̆t tơgŭm đei chih lơ̆m tơchơ̆t athei chih măt tơtom vă đei trong chă tơgŭm păng asong jên jang lơ̆m sơnăm 2027. Atŭm hăm noh adoi chih măt vă pơtơm jang kiơ̆ Tơchơ̆t vei răk tơƀăk mong tơdrong kăp gĭt joh ayŏ Bài chòi. 'Nou jĭ 2 mŭk drăm kăp gĭt kơ teh đak đei pơm jang lơ̆m Tơchơ̆t jang kơsô̆ 14 kơ dêh char”.

Đơ̆ng tơdrong tơgŭm pơtho pơhrăm chĭng chêng, pơtơm vei răk tơƀăk mong joh ayŏ Bài chòi truh chih hô sơ dôm mŭk drăm 'nao, Đăk Lăk tŏk bŏk brư̆ brư̆ tơmơ̆t dôm tơdrong jang vei răk tơƀăk mong joh ayŏ juăt jue chôt vih hăm tơpôl. Tơchơ̆t jang ưh đei pơdơh ah vei răk mŭk drăm, mă pơm trong hiôk ăn dôm tơdrong kăp gĭt gah joh ayŏ pơtoi đei pơdjoi lơ̆m tơdrong hơrih.

Mă lei, vei răk tơƀăk mong joh ayŏ juăt jue ưh đei gô lơ̆m minh ƀar lăm pơtho pơhrăm dah mă dôm tơdrong tơlĕch jang kơđeh khei năr. 'Nou jĭ tơdrong jang đunh sơnăm, athei đei tơdrong vang jang đơ̆ng tôm hơnih jang chĭnh trĭ, đơ̆ng keh đang tơchơ̆t tơlĕch jang truh asong bơngai jang, jên jang păng pơgơ̆r pơm jang. Ƀok Y Nhuân Byă, Phŏ Kơdră Hơnih jang vei lăng kon pơlei dêh char Đăk Lăk akhan, Tơchơ̆t 80 đơ̆ng Trung ương jĭ tơdrong kăp gĭt vă tơring chih akŏm trong pơm jang păng asong bơngai jang jên jang ăn tơdrong vei răk tơƀăk mong joh ayŏ đơ̆ng tơring: “Tơchơ̆t 80 'noh Tơchơ̆t dơnơm, hơdah hloh vă bơ̆n pơm jang tơdrong vei răk tơƀăk mong mŭk drăm joh ayŏ nhen chĭng chêng păng minh ƀar tơdrong nai. Tơdrong mă ou adoi jô̆ hơlen mă hơdah, đei trong jang mă hơdah, asong jên jang ăn rim tơring iŏk jang”.

Tơchơ̆t 80 hlôi pơm trong ăn rim tơring chih akŏm trong tơlĕch jang trŏ hăm tơdrong hơrih. Hăm Đăk Lăk, jang hơdah kiơ̆ Tơchơ̆t 80 ưh hơdrô̆ jing tơlĕch jang kiơ̆ dôm sơnong jang vei răk, mă oei pơm trong hiôk vă ăn rim pơlei pơla, rim ngê̆ nhơ̆n păng đe sơnăm mơlôh hơdoi jing tơm tơ-'ngla kơ tơdrong jang vei răk tơƀăk mong joh ayŏ, pơm trong hiôk vă mŭk drăm joh ayŏ đei vei răk kơtă tơ̆ pơlei pơla.