Hăm hơnăn "Tơguăt tơpôl – Pơlan să um ai joh ayŏ", ou jĭ năr akŏm mă blŭng đei pơgơ̆r đơ̆ng rŏng kơ xah Phú Túc đei tơ-iung pơjing, vă tơgop vei răk tơƀăk mong um ai joh ayŏ kơ kon pơlei kon kông tơguăt hăm chă tơbang tơmam choh pơtăm, tơmam drăm OCOP kơ tơring. Năr akŏm đei truh 14 khŭl đơ̆ng rim thôn, pơlei lơ̆m xah atŭm hăm 3 khŭl truh akŏm đơ̆ng dôm xah Ia Rsai, Ia Dreh păng Uar.

Jĭ minh lơ̆m dôm khŭl đei lơ bơngai jang, pơlei Chư Ung hơvơn đei hloh 60 ngê̆ nhơ̆n, bơngai vang jang hăt hot hơmet ăn năr akŏm. Hơnih hơdah 'lơ̆ng kơ khŭl lơ̆m năr akŏm noh hơmet dơ̆ng khôi et tơdrô 3 – minh khôi juăt 'lơ̆ng hơ-iă kơ bơngai Jarai. Ƀok Nay Noar – Ngê̆ nhơ̆n kơ pơlei Chư Ung tơroi: "Pơlei nhôn vang truh hăm năr akŏm Joh ayŏ kon kông ou noh pơm hnam 'măn et tơdrô 3, pơtơm ăn kôn mon kon sou băt gah khôi et tơdrô 3 kră sơ̆ kơ bơngai Jarai 'noh thoi yơ. Pơlei nhôn tơƀôh hơdah gah khôi et tơdrô 3".

Ưh hơdrô̆ rơ-ông rơ-ang ƀenh kơ um ai 'lơ̆ng kơ Năr akŏm Joh ayŏ - Tơplŏng kơdou kơ kon pơlei kon kông xah Phú Túc ưh hơdrô̆ akŏm tơ̆ cham să Phú Túc mă oei rơ-ông rơ-ang kiơ̆ trong kơphô̆. Dôm tơdrong pơdah yak pơrŏ kiơ̆ trong kơphô̆, tôn pơdah chĭng chêng, hơsuang pơjing đei tơdrong chơt hơ-iă hloh. Dôm tơdrong tơplŏng kơdou kră sơ̆ nhen peh ƀa hăm hơpuăl đôi, dui tơlei, tơplŏng ƀao ƀô̆, hao sing sơng atŭm hăm hrŭk hơdah hơbăn ao tanh kră sơ̆ hơvơn lơ kon pơlei tơ̆ tơring păng tơmoi truh lăng. Um rup 'lơ̆ng hloh noh dôm tơdrong hrŭk pơdah hơbăn ao tanh kon kông, tơgop vei răk tơƀăk mong tơdrong kăp gĭt kơ hơbăn ao tanh juăt jue păng tơroi hơdah gah um ai joh ayŏ kơ kon pơlei Jarai. Pơmai Nay H'Dơ truh đơ̆ng thôn Lâm Viên ăn tơbăt: "Khŭl nhôn hrŭk pơdah hơbăn ao tanh đei 7 'nu. Đei 2 'nu hrŭk hơbăn ao tanh rok trong so sơ̆. Oei 2 'nu drăkăn nai noh hrŭk hơbăn ao tanh rok kiơ̆ trong 'nao hrei ou. Kiơ̆ đơ̆ng noh, vă rim bơngai băt hơdah, mă tơdrong hơrih sơ̆ ki dah mă 'nao hrei ou, hơbăn ao hrŭk phara dih băl, mă lei adoi oei đei tơdrong 'lơ̆ng kơ kon pơlei tơ̆ tơring nhôn”

Atŭm hăm dôm tơdrong akŏm joh ayŏ - tơplŏng kơdou, Tơdrong akŏm kơchơ Tơmam drăm OCOP xah Phú Túc đei 24 hơnih tơmam kơ 14 khŭl truh đơ̆ng dôm thôn, pơlei, pơdah lơ tơmam drăm juăt jue kăp gĭt nhen: rơmo sơ̆k minh năr tŏ, iĕr pơhang por prung, 'nhot we ('nhot xa juăt jue), tơdrô ge, pro tăng, hla ƀlang, pro tăng pai hăm hơkar rơmo, ka kok đak krong Pa ƀuh pơhang... đei lơ tơmoi păng kon pơlei tơ̆ tơring truh tơmang lăng păng chă xa.  

Ƀok Ngô Đức Mạo - Kơdră chĕp pơgơ̆r Hơnih tơm Joh ayŏ kơdŏ soang, Kơtơ̆ng ang păng Đă ƀŏng lŏng tơlŏng kơdou tơring Phú Túc, dêh char Gia Lai sơkơ̆t hơdăh, năr lêh Joh ayŏ kơdŏ soang - Tơplŏng kơdou rim hơdrung kon kông păng Jơnŭm kơchơ tơmam drăm choh jang sa, tơƀôh tơbăt tơmam drăm OCOP tơring Phú Túc 'măng mă I sơnăm 2026 pơtruh ăn lơ tơdrong pơgơ̆r ‘lơ̆ng hơ iă. Lơ̆m pơgơ̆r, rim nghê̆ nhân pơgơ̆r dơ̆ng dôm tơdrong oei sa yan ou kơ kon pơlei, pơgơ̆r hơmet chĭng chêng, jĭt tanh, pơlong peh ƀa, dui brai vai tanh khăn, jrăh mul meo păng pơdă tơmam choh jang sa, tơmam tôn reh sơ̆ ki. Đơ̆ng ou tơgop vei răk tơƀăk mong tơdrong oei sa joăt joe sơ̆ ki kơ rim hơdrung, tơƀôh tơbăt pơlei pơla, kon bơngai păng dôm tơmam drăm kăl kơ tơring Phú Túc, Gia Lai:  "Đơ̆ng iung jang trong jang khul kơdră chĕp pơgơ̆r tơring ƀar kâp truh dang ei, tơdrong jang joh ayŏ kơdŏ soang, đă ƀŏng long tơplŏng kơdou tơ̆ tơring nhen lĕ pă gan kơtang. Kơ yuơ lơ loh, sơnăm ou nhôn pơchoh trong ăn Hơnih vei lăng kon pơlei tơring pơgơ̆r Năr lêh Joh ayŏ kơdŏ soang - Tơplŏng kơdou rim hơdrng kon kông vă vei răk tơƀăk mong atŏk tơ iung tơdrong oei sa joăt joe ‘lơng rŏ sơ̆ ki kơ bơngai Jarai lơ̆m tơring. Mă đơ̆ng kon jên oei kơƀăh kơƀôch, tơdrong pơgơ̆r lăp tơ̆ tơring, mă lei truh dang ei rim pơlei pơla tôch hưch hanh vang năm, hơdrin pơhrăm, proh hơmet pơ ‘lơ̆ng. năr lêh pơjing đei hơyak kăl, jing hơyak blŭng tơgop lơ̆m vei răk tơƀăk mong, vei kơjăp tơdrong oei sa joăt jue ‘lơ̆ng rŏ sơ̆ ki kơ kon pơlei bơngai Jarai."

Năr lêh Joh ayŏ kơdŏ soang - Tơplŏng kơdou rim hơdrung kon kông păng Jơnŭm kơchơ tơmam drăm choh jang sa, tơƀôh tơbăt tơmam drăm OCOP tơring Phú Túc ‘măng mă I sơnăm 2026 hlôi tơgop pơm ‘lơ̆ng hơ iă hloh dơ̆ng lơ̆m tơdrong hơrih kơ rim hơdrung hơdrĕch. Tơdrong vang iung jang hơdoi ƀar păh vei răk tơƀăk mong tơdrong oei sa joăt joe sơ̆ ki hăm tơƀôh tơbăt tơmam drăm choh jang sa, tơmam drăm kăl hlôi tơgop kơhret kơjăp tơgoăt tơgoăl dih băl kon pơlei pơla kơ rim hơdrung hơdrĕch, adoi pơjing hơyak atŏk tơ iung tơmang pơhiơ̆ kơjăp ‘lơ̆ng ăn tơring.