Đơ̆ng pơgê hrôih, Tơnŏk duk Phan Thiết đei ƀĕnh bơngai. Lơ ƀato yâu ka, thŏng nan vă pơm lêh đei hơmet pơrŏ tôch hơiă, đe tôn chĭng, teh hơgơ̆r; Đe bơngai kră jang ka hrŭk hơbăn ao tai, văn che kơ̆t kơn kơpal kơ̆l truh hăm lêh sơng pơhngol yang ka. Ƀlep ƀât 7 jơ, lơ ƀato lĕch đơ̆ng tơnŏk duk năm tơ̆ Hòn Lao pơgơ̆r soi kiơ̆ tơdrong juăt đơ̆ng sơ̆, đang kơ ‘nŏh vih tơ̆ Cồn Chà. Đơ̆ng âu, kơhrĕng ‘nu bơngai hơnơ̆ng sơng Khul yak klĕch lơ trong tơter đak krong Cà Ty, adrol kơ vih tơ̆ Anih soi Dinh Vạn Thủy Tú vă soi pơkĕh.

Lêh sơng pơhngol Ông Sanh tơklep kơjăp hăm tơdrong soi kơ yang Nam Hải, dăh mă ka Ông, đơ̆ng kon pơlei oei xa tơter đak dơsĭ. Kiơ̆ đơ̆ng tơdrong dơ̆ng soi, kon pơlei jang ka hơpơi ‘mĕh yang tơjur ăn teh đak rơngei, kon pơlei hiôk hian, đak dơsĭ huei pŏh yă, ‘năr rŏ tŏ hơlăng, ƀato năm yâu ka hiôk sơđơ̆ng, rôp đei lơ ka hơdang. Ƀok Phạm Triều, bơngai jang ka, đei hlŏh 45 sơnăm yâu ka tơ̆ đak dơsĭ tơroi:

“Lêh ‘nâu tôch gĭt kăl hăm kon pơlei jang ka nhôn, jĭ tơdrong juăt đơ̆ng sơ̆ khơ̆ dang ei. Truh năr lêh Soi kơ Yang ka, mih ma duch nă soi apinh ăn teh đak rơngei, kon pơlei hiôk hian, jang xa đei, năm tơ̆ đak dơsĭ huei đei tơdrong kiơ, đei ƀĕnh pŭn ai”.

Kŭm hăm lêh sơng, tơdrong soi tơ̆ Dinh Vạn Thủy Tú kŭm đei pơgơ̆r tôch hơiă, tôch sĭt vă soi kơ yang ka păng hơtat unh đeng pơkao tơ̆ đak krong Cà Ty. Găh tơdrong ngôi pơchơt ‘nŏh đei hơri bả trạo, hơri bội, hơri ƀai chòi, hơxoang prao, ngôi pơchơt, hơri hơxoang tơ̆ trong glung, truh hăm kơchơ tĕch mơdro păng anih et xa ‘lơ̆ng kơ Phan Thiết. Kiơ̆ đơ̆ng noh, kon pơlei păng tơmoi chă  tơmang lăng đei dơ̆ng tơdrong ‘lơ̆ng vă chă hơlen năng tơdrong arih xa, tơdrong lui kơ yang pơ ‘nhang hơdrĕ păng tơdrong juăt đơ̆ng sơ̆ kơ kon pơlei tơ̆ tơring đak dơsĭ. Ƀok Đào Quang Thanh, Phŏ Kơdră vei lăng kon pơlei phường Phan Thiết, akhan, vă chĕp vei lêh âu athei iŏk tơpôl kon pơlei jang ka ming ƀât anih tŏk bŏk hlŏh, păng tơmât hơdai hăm tơdrong chă tơmang lăng hai:

“Tơdrong kăl hlŏh jĭ lêh athei pơgơ̆r ‘moi kiơ̆ trong năng kăl tơdrong juăt so, tơdrong soi tơbeh đơ̆ng sơ̆ păng athei lê̆ kon pơlei jang ka pơm tơm pơgơ̆r tơdrong lêh ‘nâu. Tơdrong tơmât lêh lơ̆m tơdrong chă tơmang lăng athei chă rơih mă lăp ‘năi, vă pơm ‘lơ̆ng gơ̆h roi tơƀôh đei tơdrong juăt ‘lơ̆ng đơ̆ng tơring đak dơsĭ Phan Thiết hai, vă huei pơm tơhiong lê̆ tơdrong sĭt păng kơjă kăp gĭt đơ̆ng tơdrong soi hai”.

Ƀât tŏk bŏk tơdrong jang tŏk tơ̆ tơring kơdrâm, bơ̆ jang pơvih pơvăn păng chă tơmang lăng tơ̆ đak dơsĭ kơ dêh char Lâm Đồng, dôm pơlei jang ka, Dinh Vạn Thủy Tú, jơva ƀơ̆r hơri bả trạo păng khul sơng pơhngol yang tơ̆ đak krong Cà Ty nhen vă tơƀlŏk dơ̆ng truh tơdrong juăt, jŏh ayŏ kơ dŏ xoang đơ̆ng sơ̆ kơ Phan Thiết. Lêh soi kơ Yang ka yoa thoi noh ưh lăp vei kơjăp đon lui đơ̆ng kon pơlei jang ka adrol kơ rim ‘măng lĕch tơ̆ đak dơsĭ năm rôp yâu ka hơdang đĕch, mă oei vei kơjăp tơdrong juăt ‘lơ̆ng đơ̆ng 1 tơring tơter đak dơsĭ, vă dôm kơjă kăp gĭt ‘nŏh đei chĕp vei hơnơ̆ng, păr ang jơ̆p tơring păng vang tơgop pơm pơ ‘lơ̆ng hlŏh dơ̆ng tơdrong juăt, jŏh ayŏ kơ dŏ xoang đơ̆ng Lâm Đồng lơ̆m chăl jang tŏk ‘nao.