Atŭm hăm tơdrong pơkăp pơm chơnang dơnơm tơ̆ Cham pơhiơ̆ 10/3 vă pơgơ̆r lêh pơtơm păng pơtôch, tơ̆ pơlei tơm Buôn Ma Thuột păng minh ƀar tơring kơ dêh char Đăk Lăk oei đei lơ tơdrong jang nai. Tơ̆ trong Phan Đình Giót, dôm anih jang mŭk drăm kaphê kơ pơlei tơm Buôn Ma Thuột hlôi pơtơm pơjing anih tĕch kaphê 'lơ̆ng, lơ̆m minh akŏm hơlen kaphê ưh kơ huach jên kơ Lêh akŏm kaphê Buôn Ma Thuột. Anih pơm jang păng tĕch pơdro Vương Thành Công ăn tơbăt, anih jang ou gô asong hoh pơhlom 40 rơbâu kơchŏk kaphê ăn tơmoi chă tơmang păng tơbang dôm tơdrong kăl atŭm kơ Lêh akŏm.

Tơ̆ apŭng Buôn Đôn, anih pơgơ̆r lơ tơdrong kăp gĭt nhen: Pơlong rôih Buôn Đôn; chă hơlen băt um ai joh ayŏ kăp gĭt kơ kon pơlei Lào, Êđê, M’Nông adoi keh đang tơdrong hơmet. Hăm 17 tơdrong akŏm tơm păng lơ tơdrong akŏm hiôk chơt nai, Lêh akŏm kaphê Buôn Ma Thuột (đei pơgơ̆r đơ̆ng năr 9 truh năr 13/3) gô hơ-'nhăk tơdrong hơlen băt kăp gĭt hloh.