Lơ̆m hloh minh khei, 6 lăm hŏk gah chĭng chêng, hơsuang păng pơhrăm gah tơdrong jang tơmang pơhiơ̆ pơlei pơla đei pơgơ̆r tơ̆ dôm pơlei bơngai Ê Đê tơ̆ phương Buôn Ma Thuột, dêh char Đăk Lăk hơvơn đei hloh 130 'nu kiơ̆ hŏk.

Lơ̆m noh, dôm lăm hŏk gah chĭng chêng đei 60 'nu hŏk, bơngai 'lơ̆p hloh noh 8 sơnăm, 'lŏ hloh noh 35 sơnăm. 'Nguaih kơ dôm ƀai chêng tơm, bơngai hŏk oei đei đe ngê̆ nhơ̆n pơtho ăn dôm ƀai chêng kăp gĭt 'măn tôn lơ̆m tơdrong et xa păng tơmang pơhiơ̆. Dôm lăm hŏk gah hơsuang adoi tơguăt tơdrong tơm păng tơdrong kăp gĭt, tơgŭm ăn bơngai hŏk hlôh vao hơdah gah tơdrong pơdah păng hlôh vao kơjăp hloh gah kơjă 'lơ̆ng kơ joh ayŏ juăt jue.

Jĭ minh lơ̆m dôm bơngai akŏm pơhrăm lăm hơsuang, oh H’Na Si Mlô, tơ̆ pơlei Đung, phương Buôn Ma Thuột ăn tơbăt, ưh hơdrô̆ pơhrăm gah tơdra hơsuang, oh oei hlôh vao gah rim tơdra hơsuang, đơ̆ng noh hơtŏk đon lăp păng hơpơi 'meh vei răk tơƀăk mong tơdrong 'lơ̆ng kơ joh ayŏ kon kông po:  “Inh 'meh đei lơ lăm hŏk thoi ou ăn đe hơ-ioh, vă đe hơ-ioh băt truh tơdrong hơsuang, păng tơdrong hơsuang ou ưh kơ layơ ƀơm hiơt hiong”

Atŭm hăm noh, 3 lăm pơhrăm gah jang tơmang pơhiơ̆ pơlei pơla kơyuơ bơngai pơtho tơ̆ Hnam trưng Kao đăng Tơmang pơhiơ̆ Sài Gòn kơtă chă pơtho ăn bơngai hŏk tơ̆ pơlei Akŏ Dhông băt hơdah gah tơdrong pơvih ăn tơmoi, pai xa păng pơjing tơdrong pơhrăm hơlen gah tơmang pơhiơ̆ pơlei pơla.

Yă Phạm Thị Hải Bình, Phŏ Kơdră Hơnih pơvih pơvăn tơdrong jang kơ teh đak phương Buôn Ma Thuột ăn tơbăt, tơdrong jang hơdai pơtho tôn chĭng chêng hăm pơtho tơdrong hlôh vao tơmang pơhiơ̆ lơ̆m tơpôl ‘noh jĭ trong nơnăm ‘nao vă pơjing khŭl jang pơtoi dơ̆ng chĕp răk tơƀăk mong tơdrong joh ayŏ so hai, iŏk jang đei yua kơjă kăp gĭt kơ tơring pơyua ăn hơtŏk tơiung tơmang pơhiơ̆ hai:  “Sơnăm ‘nâu, ‘ngoăih kơ dôm lăm pơtho tôn chĭng chêng, hơxoang, phường hlôi jang hơdai hăm Hnam trưng Kao đăng Tơmang pơhiơ̆ Sài Gòn pơih 3 lăm hơtŏk ‘lơ̆ng tơdrong gơh băt pơvih pơvăn ăn tơmoi tơmang pơhiơ̆, hơtŏk ‘lơ̆ng tơdrong gơh pơvih ăn sŏng sa hăm unh hnam kon pơlei đei pơvih tơmam sa păng pơjing tơdrong jang chă lăng pơhiơ̆ lơ̆m tơpôl. Kiơ̆ đơ̆ng dôm lăm hŏk, bơngai hŏk đei hơmet ăn tơdrong hlôh vao vă ƀrư̆ ƀrư̆ pơjing dôm tơdrong jang tơmang pơhiơ̆ tơ̆ tơring”.

Pơtôch dôm jăl hŏk, lơ bơngai hŏk hlôi gơh tôn chĭng chêng, hơxoang păng gơh băt chă sơng pơma dơnuh, pơvih pơvăn ăn tơmoi tơmang pơhiơ̆. Tơdrong jang âu đei hơmŏ vang tơgop chĕp răk Tơdrong tôn chĭng chêng Tây Nguyên tơklep hăm hơtŏk tơiung tơmang pơhiơ̆ lơ̆m tơpôl, pơjing tơdrong jang sa kơtă hloi tơ̆ rim pơlei pơla.