Đơ̆ng rŏng tơmơ̆t hơdai, dêh char Đắk Lắk đei 1 hơnih tơmang lăng gĭt kăl - hơnih bri kông Tây Nguyên tơƀơ̆p hăm đak dơsĭ ‘lơ̆ng rŏ. Lơ̆m noh, bri kông Tây Nguyên jĭ pơtih ăn tơdrong hơrih kơjăp, tơklep ‘lơ̆ng đơ̆ng joh ayŏ joăt joe kơ rim hơdrĕch hơdrŭng, ‘noh tơring tơter đak dơsĭ păih Hơlĕch ‘noh ji tơdrong hơiă đơ̆ng đak dơsĭ. Kăl kơ lăng truh, đơ̆ng bri kông jur tơ̆ tơ ter đak dơsĭ kơ Đắk Lắk tă kơ atŭm groi teh kông ŭnh-bazan ‘lơ̆ng rŏ, mơ̆t hơdai lơ̆m tôn chĭng chêng păng  Bài chòi Nam Trung bộ. Khei ‘năr âu ki, tơ̆ Đắk Lắk hlôi pơgơ̆r lơ tơdrong jang tơmang lăng nhen: pơgơ̆r khŭl famtrip dăr hơlen tơmang lăng kŭm hăm khŭl jang tơmang lăng, bơngai chih kơtơ̆ng ang, bơngai joăt jang gơh hơgei, bơngai răt yua tơm dơnơm (KOLs, KOCs); Hop akŏm hơlen lăng pơtôch tơdrong jang tơmang lăng “Đắk Lắk – Vih hăm tơring mŭk drăm ‘lơ̆ng rŏ so”, pơgơ̆r Hop akŏm kơchơ tĕch mơdro - tơmang lăng, OCOP păng tơmam ‘lơ̆ng kơ tơring; Joh hơri – DJ – pơm tông pơyua ăn tơmoi tơmang lăng....

Ƀok Lê Phúc Long, Phŏ Kơdră Anih vei lăng găh Joh ayŏ, Tơplŏng kơdâu păng Tơmang lăng Đắk Lắk roi tơbăt:

"Tơmoi tơmang lăng mưh truh hăm Đắk Lắk păih Pơmơ̆t ‘noh băt hơdăh gô lăng đe tôn chĭng chêng păng nhôn gô đei dôm tơmam tơmang lăng vă kơbăt nhen hơjơ̆m chĭng, tôn chĭng, lăng hơmet ming chĭng. Oei hăm păih Hơlĕch đei Bài chòi ‘noh bơ̆n gơh pơjing dôm  tour Bài chòi. Thoi noh bơ̆n gô ăn tơmoi lăng, mơ̆ng, gơh hơri, gơh hrŭk hơbăn ao joăt joe, yua dôm tơmam yua, dôm tơmam tôn reh joăt joe kơ kon kông, đơ̆ng noh gô pơm hơiă ăn tơmoi”.

Kơtă lơ̆m giĕng blŭng pơgơ̆r dôm tơdrong jang tơmang lăng dêh char Đắk Lắk sơnăm 2026, kon pơlei păng tơmoi tơmang lăng hlôi đei lăng tơdrong joh ayŏ kơdŏ soang gĭt kăl. Ƀok Cao Hữu Nhạc tơ̆ phường Tuy Hòa, dêh char Đắk Lắk tơƀôh jơhngơ̆m lui ngeh găh hơmĕng hơtŏk tơiung tơmang lăng kơ tơring.

 "Tôch kơ lăp đon găh 1 tơdrong joh ayŏ kơdŏ soang hơnơ̆ng đơ̆ng Tây Nguyên bri kông truh tơring tơ ter đak dơsĭ, tơƀôh ăn 1 tơdrong ƀơ̆t tơmơ̆t hơdai băl ‘noh đei dôm tơdrong hiôk hơdrô̆. ‘Nâu jĭ tơdrong hiôk pơih ăn, tơƀưh đơ̆ng rim tơring bơih mă loi ‘noh jĭ tơƀưh đơ̆ng Tây Nguyên hăm tơring tơ ter đak dơsĭ, gô jing 1 tơdrong hiôk ăn tơdrong hơtŏk tơiung tơmang lăng”.

Kiơ̆ kơ Anih vei lăng găh Joh ayŏ, Tơplŏng kơdâu păng Tơmang lăng dêh char Đắk Lắk, đơ̆ng rŏng pơih să hơnih hơtŏk tơiung, tơmang lăng tơring đei lơ tơdrong hiôk vă pơjing dôm tơmam jang hơdai đơ̆ng tơring bri kông păng tơ ter đak dơsĭ. ‘Nâu jĭ tơdrong gĭt kăl vă pơm lơ tơdrong lăng vă kơbăt, hơtŏk ‘lơ̆ng jơhngơ̆m pơjei đơ̆ng hơnih truh. Sơnăm 2025, Đắk Lắk hlôi sơng hloh 7,3 triệu ‘nu tơmoi, tŏk hloh  31% pơting hăm khei ‘nâu sơnăm hơdrol. Hơdrô̆ jăl khei mă I/2026, lơ̆m dêh char sơng dang 2,3 triệu ‘nu tơmoi, iŏk yua đơ̆ng tơmang lăng đei hloh 4.100 ti hlak jên, hơnơ̆ng pơvei tŏk ‘lơ̆ng.

Dêh char chă trong jang hơnhăk tơmang lăng jing tơdrong jang mŭk drăm tơm, ƀrư̆ ƀrư̆ pơjing hơnăn “Đắk Lắk – Vih hăm tơring mŭk drăm ‘lơ̆ng rŏ so” jing hơnih truh hơiă đơ̆ng tơmoi lơ̆m păng ‘ngoăih teh đak. Đơ̆ng er chĭng re jơva hơnih bri kông truh boa Bài chòi chơt hơiă kơ tơring tơ ter đak dơsĭ, um rup Đắk Lắk đei tơƀôh ƀĕnh tơdrong ‘lơ̆ng hơiă. Kơlih đơ̆ng tơdrong tơmơ̆t hơdai ‘noh tŏk bŏk pơm đei tơdrong hơiă hơdrô̆ đei, krao hơvơn tơmoi truh lăng păng ƀôh hiôk 1 groi teh ƀĕnh tơdrong ‘lơ̆ng hơiă.