Tơdrong dăr lăng đei pơgơ̆r đơ̆ng ‘năr 1 - 4/4, hăm tơdrong vang akŏm đơ̆ng dôm anih jang chă tơmang lăng, anih roi tơbăt, anih chih hla ar tơroi păng dôm bơngai juăt jang, bơngai đei ư hơnhang ang hơnhăk, bơngai gơ̆h tơƀôh trong chong glung chơng hơnhăk tơpôl găh tơdrong chă tơmang lăng lơ̆m păng ‘ngoăih kơ teh đak vang akŏm. Khul jur hơlen năng tơ̆ lơ anih chă tơmang lăng ‘lơ̆ng, tơklep hăm joh ayŏ kơ dŏ xoang, cham char bri brăh păng tơmam jŏh ayŏ kăp gĭt đơ̆ng kră sơ̆ kơ dêh char Đắk Lắk, kiơ̆ đơ̆ng chă hơlen năng tơdrong pơvih pơvăn, anih jang, trong nơnăm păng tơdrong iŏk yoa tour chă tơmang lăng. 

Lơ nơ̆r akhan, vă jang đei yoa ‘lơ̆ng, Đắk Lắk athei hơnơ̆ng hơmet pơ ‘lơ̆ng anih jang, trong nơnăm, hơtŏk tơdrong pơvih pơvăn, tưk tơiung dôm tơmam ‘lơ̆ng tơ̆ tơring, atŭm hăm ‘nŏh hơtŏk tơdrong tơplih hăm kơmăy sô̆ mưh roi tơbăt, vei lăng tơdrong chă tơmang lăng. 

Ƀok Trần Hữu Phước, Kơdră chĕp kơ̆l công ty THP Travel Tour & Caravan Center, tơ̆ Quảng Trị akhan: “Hrei ‘nâu dôm trong yak tơm, tơƀưh groi kông hăm dôm dêh char tơter đak dơsĭ tơring Tŏk bŏk oei tôch kơnê̆. Inh tơchĕng athei proh hơmet păng atŏk tơiung trong gre mă pran. Tơdăh pơjing đei trong gre âu, inh lui dôm khul caravan tơƀưh Đắk Lắk, dôm dêh char groi kông păng dôm dêh char tơter đak dơsĭ tơ̆ tơring tŏk bŏk, jô̆ hloi lĕch tơ̆ Đà Nẵng păng Quảng Trị gô pơjing đei tơmam ‘lơ̆ng hơiă pơyoa ăn chă tơmang lăng Caravan”.

Lơ bơngai tang măt kŭm akhan, Đắk Lắk athei iŏk yoa dôm tơdrong ‘lơ̆ng hlôi đei vă pơjing tơmam chă tơmang lăng ‘nao, mă loi jĭ dôm tơmam đei hơdrô̆, tơmam pơchơt tơ̆ kơmăng vă hơtŏk tơdrong truh hơlen năng, tep pơdơ̆h tơ̆ tơring. Hơdai hăm ‘nŏh, Đắk Lắk athei hơtŏk tơdrong jang hơdoi roi tơbăt păng tơlĕch trong chă tơmang lăng lơ̆m păng ‘ngoăih kơ teh đak, pơjing tơdrong ‘lơ̆ng vă sơng tơmoi đơ̆ng teh đak đe truh hăm tơring. 

Kiơ̆ Anih vei lăng joh ayŏ kơ dŏ xoang, tơplŏng kơdâu păng chă tơmang lăng dêh char Đắk Lắk, đơ̆ng rŏng kơ pơih xă anih jang tŏk, tơdrong chă tơmang lăng tơ̆ tơring đei lơ tơdrong 'lơ̆ng vă pơjing dôm tơmam hơdai, tơguăt bri kông hăm tơring tơter đak dơsĭ. Hơdrô̆ jăl khei mă I/2026, lơ̆m dêh char sơng đei dang 2,3 triu 'nu tơmoi, đei iŏk yoa hlŏh 4.100 ti hlak jên, hơnơ̆ng vei kơjăp tơdrong jang tŏk pran 'lơ̆ng.

Ƀok Lê Phúc Long, Phŏ Kơdră Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng dêh char Đắk Lắk ăn tơbăt, dêh char tơlĕch trong hơnhăk chă tơmang lăng jing tơdrong jang mŭk drăm tơm, dar deh pơjing hơnăn “Đắk Lắk – Vih hăm groi teh kră sơ̆” jing anih truh 'lơ̆ng rŏ vă sơng tơmoi lơ̆m păng 'ngoăih kơ teh đak truh.

“Hop akŏm ‘măng mă âu gô tơgŭm ăn anih jŏh ayŏ kơ dŏ xoang, tơplŏng kơdâu păng chă tơmang lăng lơ tơdrong, đơ̆ng trong pơgơ̆r jang, tơdrong tơgŭm, jang atŏk tơiung tơmam chă tơmang lăng, trong roi tơbăt, tơlĕch trong jang xa păng mă loi 'nŏh jĭ pơm thoi yơ vă sơng đei tơmoi truh hăm Đắk Lắk, tơgĕch iŏk tơdrong ‘lơ̆ng đơ̆ng tơmam drăm, cham char păng rim tơdrong đei tơ̆ yăn âu hrei 'nâu tơ̆ Đắk Lắk vă jang tŏk”.