Tơ̆ jơ pơma đam, dôm bơngai phĭn rup roi tơƀôh lơ um rup ‘lơ̆ng hơiă păng tơdrong jang đơ̆ng kơdih găh chă phĭn iŏk tơdrong joh ayŏ kơdŏ soang kơdôm hơdrĕch kon kông. Lơ nơ̆r pơma akhan, tơdrong ‘lơ̆ng hơiă găh tơdrong hơrih sa, tơdrong joăt păng tơdrong joh ayŏ kơdŏ soang hlôi tưk tơiung đei jơhngơ̆m đon hưch hanh ăn dôm bơngai chă phĭn rup.

Kiơ̆ kơ bơngai phĭn rup Nguyễn Xuân Chính, tơ̆ Hà Nội, vă gơh đei lơ rup ‘lơ̆ng hơiă, bơngai phĭn athei ‘măn jơ năr chă hơlen lăng, hơrih sa hơdai hăm bơngai vă phĭn păng lăng kăl tơdrong joăt ‘lơ̆ng đơ̆ng rim hơdrĕch hơdrŭng, rim tơring.

“‘Nâu jĭ 1 tơdrong chă phĭn tôch kơ pơmat. Hơdrol kơ phĭn ĭnh athei hơlen lăng, đŏk pơnhen vă gơh hlôh vao tơdrong joăt đơ̆ng rim hơdrĕch kon kông, vă đơ̆ng noh chă phĭn đei dôm tơdrong hơiă hloh, chă hơlen lăng, hlôh vao roi lơ ƀiơ̆ găh tơdrong joăt đơ̆ng rim hơdrĕch, đơ̆ng noh vă phĭn đei dôm kơjă kăp gĭt đơ̆ng sơ̆ kơ rim hơdrĕch hơdrŭng”.

Dôm bơngai phĭn oei roi tơƀôh dôm tơdrong pơmat tat mưh năm tơ̆ dôm tơring hơtăih hơtŏ, tơdrong pơmat tat đơ̆ng nơ̆r pơma pha ra băl mưh ‘meh tơƀơ̆p bơngai vă phĭn. Mă lei, kơlih dơ̆ng dôm tơdrong pơmat âu, sư athei bơngai phĭn hơdrin bơ̆jang hơbĕch hơbal, jang mă tơnăp hloh dơ̆ng mưh phĭn rup.

Đơ̆ng tơdrong đei tơpă tơ̆ yan âu mưh phĭn rup, dôm bơngai phĭn chă hơlen lăng jrŭ hloh dơ̆ng găh tơdrong joh ayŏ kơdŏ soang, tơdrong hơrih sa, kiơ̆ đơ̆ng vang tơgop pơm hơtŏk kơjă kăp gĭt lơ̆m tơdrong joăt ‘lơ̆ng đơ̆ng rim hơdrĕch kon kông lơ̆m tơdrong hơrih sa hrei ‘nâu, pơih đei lơ trong jang ‘nao mưh chă phĭn rup.

Bơngai phĭn rup Vũ Duy Thương, tơ̆ phường Tân Lập, dêh char Đắk Lắk tơbăt: “Kiơ̆ đơ̆ng dôm nơ̆r đei tơroi, sư pơih ăn kơ dih bơ̆n lơ tơdrong mưh vă phĭn, pơm thoi yơ vă dă ƀiơ̆ kơ hiong, hoach jên, phĭn đei lơ rup hơiă ƀiơ̆ găh tơdrong joh ayŏ kơdŏ soang đơ̆ng chăl sơ̆, kŭm nhen hrei ‘nâu, nhen thoi dôm nơ̆r đei pơma tơlĕch, bơ̆n lê̆ kơ phĭn pơm hơmet ưh kơ trŏ thoi tơdrong joăt sơ̆ mă athei lăng kăl tơdrong đei tơpă chĕp vei kơjăp sư, ‘noh jĭ tơdrong kăl hloh. ‘Noh jĭ nơ̆r ‘meh roi tơƀôh ăn kơ dôm bơngai đơ̆ng rŏng hơmet ming kơdih kâu roi ‘lơ̆ng ƀiơ̆, jang roi gơh ƀiơ̆ păng tưk tơiung đĭ đăng kơjă kăp gĭt đơ̆ng chă phĭn rup hơtŏk hloh dơ̆ng tơdrong ‘lơ̆ng hơiă đơ̆ng phĭn rup”.