Đơ̆ng năr 11 truh năr 13/4/2026 kơnh tơ̆ Quảng Ninh gô đei pơgơ̆r ‘Măng pơlong Tơdrong rapor lơ̆m teh đak ‘măng mă 17 - Quảng Ninh 2026 hăm hơnăn “Tơdrong rapor kơ yuơ Việt Nam nuih mơng pran kơtang, pơdrŏng hơnuk hơnoa". ‘Nou kơtơ̆ng ang đei pơma tơlĕch tơ̆ jơ hop akoưm tơroi tơbăt găh ‘Măng pơlong rapor lơ̆m teh đak ‘măng mă 17 kơ yuơ Radiô Nơ̆r Pơma Việt Nam (VOV) jang hơdoi hăm Hơnih vei lăng kon pơlei dêh char Quảng Ninh pơgơ̆r kơsơ̆ năr 30/3 tơ̆ Hơnih tơm Rapor Teh đak 58 Quán Sứ Hà Nội. Kiơ̆ đơ̆ng Kơ iĕng Kơdră chĕp pơgơ̆r Radiô Nơ̆r Pơma Việt Nam Phạm Mạnh Hùng, tơdrong kăl kơ ‘Măng pơlong sơnăm ou ‘noh ‘măng mă blŭng pơgơ̆r hop akŏm apŭng plĕnh teh găh podcast, akŏm đei 35 ‘nu bơngai joăt jang păng lơ khul joăt jang teh đak đe. Mă kăl, ‘Măng pơlong jei ‘măng mă blŭng hơvơh bơngai teh đak đe pơm kơdranh chơm ‘măng pơlong găh podcast. Tơdrong mă ou tơƀôh hơdăh hloh dơ̆ng dôm ƀai chih Podcast, tơbăt hơdăh trong jang hle kơ tơdrong jang kơtơ̆ng ang pơre nơ̆r lơ̆m chăl jang kơtơ̆ng ang lơ tơdrong. Lơ̆m ‘măng pơgơ̆r Pơlong Rapor lơ̆m teh đak ‘măng mă XVII đei pơgơ̆r lơ tơdrong nhen: Hop akŏm apŭng plĕnh teh: "Podcast - Trong tơchăr hơ iă ăn tơdrong rapor lơ̆m chăl kơsô̆"; Hop akŏm găh tơdrong jang: "Rapor kơtă lơ̆m chăl hle - Trong hơvơn đei lơ bơngai ‘meh mơ̆ng"; Pơm lêh pơtôch păng pôk tơmam hơpăh ‘Măng pơlong Rapor lơ̆m teh đak ‘măng mă XVII.