Hloh 15 sơnăm dơ̆ng pai gŏ tơ̆ lơ hơnih tĕch mơdro tơmam et sa đe ư hơnhang tơ̆ Quy Nhơn, ‘nhŏng Huỳnh Tấn Dũng, hơnih tĕch tơmam sŏng sa ŭnh hnam “Rừng nướng” tơ̆ phường Quy Nhơn ling lang đei hơiă hăm tơdrong hưch hanh tơmam sa Tây Nguyên. ‘Nhŏng Dũng tơbăt; Tơmoi tơmang lăng truh hăm Quy Nhơn, Gia Lai tôch kơ ‘meh sa dôm tơmam sa kơ tơring groi kông, nhen pơbe, ‘nhĕm rơmo prung dăh mă iĕr găm, nhŭng bronh phang.

“Kơdih kâu ĭnh kŭm ‘meh hơtŏk tơiung tơmam sa ‘lơ̆ng hơiă kơ pơlei kơdih hăm dôm tơmam hơyơ đĭ đei. Ĭnh pai, pơm tơmam sa ‘meh tơroi nơ̆r pơma truh đe mŏ, đe ‘nhŏng, đe mih ma duch nă ‘noh ‘meh hơtŏk tơiung tơmam sa kơ bơ̆n, ‘meh tơmơ̆t hơdai đei dôm tơmam đei kơtă tơ̆ tơring nhôn kŭm nhen tơ̆ Việt Nam bơ̆n vă đe tơmoi tơmang mưh truh tơ̆ Việt Nam kŭm nhen truh tơ̆ Gia Lai, truh tơ̆ kơphô̆ đak dơsĭ nhôn gô đei sa dôm tơmam sa ƀâu phu Việt Nam nhôn ling lang tơpăt ‘lơ̆ng”.

Yă yơn đak dơsĭ hŭl păng rơba yă yơn đak dơsĭ, kơjing ƀuh tơ̆ ngar, lâu Hơdang grên, Ƀrăng đak dơsĭ ƀuh phô mai,... jĭ dôm tơmam ƀĕnhƀâu phu đak dơsĭ, đei bơngai pai gŏ kơ dôm hơnih tĕch tơmam et sa tơ̆ Quy Nhơn tơmơ̆t lơ̆m hơnăn pơvih pơvăn ăn tơmoi sa lơ̆m tơdrong jang kơ Sơnăm Tơmang lăng kơ teh đak - Gia Lai 2026. Truh hăm Quy Nhơn tơmang lăng lơ̆m sơnăm tơmang lăng kơ Teh đak 2026, ‘nhŏng Trần Nhật Đông, tơmoi tơmang lăng tơ̆ pơlei tơm Hồ Chí Minh hơlen lăng:

“Tơmam sa Quy Nhơn tôch kơ lơ, ‘ngoăih tơmam ka hơdang hơdrih ‘noh kơ dih kâu kŭm đei sa 1,2 tơmam sa kơ bri kông Tây Nguyên nhen tơmam ƀuh, phang. Ƀâu phu ‘noh kŭm lăp hăm tơring găh Tu kŭm nhen tơring Pơbăh. Ĭnh ƀôh hiôk nhen sŏng sa tơ̆ hnam’.

Yă Nguyễn Thị Kim Chung, Phŏ Kơdră Anih vei lăng găh Joh ayŏ Tơplŏng kơdâu păng Tơmang lăng dêh char Gia Lai roi tơbăt, lơ̆m khei ‘năr Gia Lai jing hơnih năm truh gĭt kăl lơ̆m tơdrong jang Sơnăm tơmang lăng kơ Teh đak 2026, anih pơvih pơvăn tơmam sa tơring tŏk bŏk đei dôm hơyak tơplih rơđăh. Dôm hơnih tĕch mơdro tơmam et sa hơtŏk ‘lơ̆ng đon hlôh vao lơ̆m tĕch mơdro, yak truh pơjing um rup tơmang lăng rơhâu hiôk, hơgei.

“Lơ̆m giĕng lêh sơnăm tơmang lăng teh đak, rim anih jang găh tơmang lăng lơ̆m tơring kơ dêh char hlôi đei tơdrong kơchăng hơtŏk 'lơ̆ng pơvih pơvăn kŭm nhen anih jang tơmam drăm ki thuơ̆t, khŭl jang vă pơvih pơvăn ăn tơmoi tơmang lăng. Dôm anih jang kŭm lăng kăl pơm lơ tơmam mă loi ‘noh jĭ tơmam sa, dôm tơmam sa ‘lơ̆ng hơdrô̆ kơ tơring. Hơtŏk loi dơ̆ng tơdrong jang tơroi tơbăt, roi tơƀôh ăn sơnăm tơmang lăng kơ teh đak vă roi tơbăt truh tơmoi tơmang lăng găh dôm tơdrong jang lơ̆m sơnăm tơmang lăng kơ teh đak”.