Truh tơ̆ hơnih tĕch Hơbăn ao tanh Mara ah hơtuch giĕng, nhôn ƀôh hơdah tơdrong pơm jang hăt hot kiơ̆ đơ̆ng tơdra re kơmăi sĭt hơbăn ao, nơ̆r re đơ̆ng không tanh ang juăt jue kơ pơlei pơla.  

Ưh đei chă hŏk pơhrăm kiơ̆ lăm hŏk tơdrong jang, pơmai H’Loang Mlô, rơneh sơnăm 1996, pơtơm tơdrong jang kơ po hăm tơdrong pơkăp khŏm mă jang đei. Atŭm hăm tơdrong vei răk tơdrong jang kră sơ̆, pơmai oei tơplih 'nao, pơm 'lơ̆ng hơbăn ao tanh jing dôm hơbăn ao hrŭk et xa, et pơkong, ap khuak dah mă dôm tơmam drăm pơrŏ hăm hơbăn ao hrŭk. Mă um ai đei tơplih, pơmai adoi oei răk đei rim um dok păng đak kơ-ang tơm, vă rim hơbăn ao mă 'nao mă lei oei akŏm ƀenh kơ tơdrong joh ayŏ kon kông po kơdih. Pơmai H’ Loang Mlô tơroi: “Dôm năr blŭng iung pơm jang, inh ƀơm lơ tơnap tap, mă kăl 'noh gah jên hu. Đei 'măng ngêh pă kĕ vă pơtoi jang, mă lei gơnơm akŏm đei tơdrong hlôh vao lơ̆m chă tĕch tơmam drăm online păng tơdrong lui ngeh, tơgŭm đơ̆ng đe duch nă yă yăng, inh akŏm đei jơhngơ̆m vă găn hloh. Brư̆ brư̆ inh pơjing păng hơtŏk tơ-iung. Truh dang ei, hơnih jang inh hlôi đei 7 bơngai jang dơnơm, 60 'nu vang jang, atŭm hăm 8 hơnih chơchoh sĭt hơbăn ao, 8 hơnih tanh brai păng 3 hơnih tanh che. Rim bơngai jang đei xa jên khei sơđơ̆ng đơ̆ng 3,5 truh 10 triu hlj rim khei”

Atŭm hăm tơdrong hơtŏk pơm jang, tĕch pơdro, pơmai H’Loang Mlô oei asong tơdrong jang păng tơgŭm lơ bơngai tơnap tap lơ̆m pơlei pơla, Oh H’Lagi Mlô tŏk bŏk oei hŏk sơnăm mă 2 Đại học Tây Nguyên. Gơnơm đei tơdrong tơgŭm tơnăp đơ̆ng pơmai H’Loang, oh hlôi găn hloh tơnap tap kơ tơdrong hơrih pơti mĕ ƀă vă pơtoi chă hŏk pơhrăm: “Inh bơnê kơ pơmai H’Loang hlôi yak hơdoi păng tơgŭm inh. Đơ̆ng đei pơm jang hăm pơmai, inh băt hơdah gah kơjă kăp gĭt kơ hơbăn ao tanh juăt jue kơ bơngai Êđê inh. Inh adoi hlôh vao hơdah hloh gah um dok kơyuơ đe duch nă tanh đei, tôch 'lơ̆ng păng huach jơ năr. 'Nguaih kơ noh, inh chă đei thim jên 'măn chă hŏk pơhrăm, chă răt đak dou đak xăng ăn gre vih vơ̆t păng hơnih oei, đơ̆ng noh inh sơđơ̆ng jơhngơ̆m hŏk pơhrăm. Inh hơpơi 'meh khei năr đơ̆ng rŏng kơnh, gô đei lơ bơngai băt truh păng lăp kơ dôm tơmam drăm tanh kơ bơngai Êđê lơ hloh dơ̆ng”

Hăm um dok 'lơ̆ng, đak kơ-ang kăp gĭt păng akŏm tôm tơdrong joh ayŏ, che tanh Tây Nguyên roi năr roi hơvơn đei lơ bôl buăl apŭng plenh teh. 'Nhŏng Donovan Fink, truh đơ̆ng teh đak Mi, tơroi gah đon tơchĕng kơ po thoi ou: “Inh lăp kơ đon tơpă. Hơbăn ao hrŭk tôch 'lơ̆ng, um dok noh guăng rŏ. Inh sô̆ hơ-iă ah đei hơlen băt tơ̆ ou. 'Nou jĭ minh hơbăn ao hrŭk 'lơ̆ng păng kăp gĭt. Inh adoi 'meh răt minh ƀar blah vă 'nhăk vih asong ăn unh hnam vă đe sư hlôh vao lơ hloh gah joh ayŏ ou”

Khei năr hơnô̆ hơnăp kơnh, pơmai H’Loang Mlô hơpơi 'meh tơdrong jang tanh brai gô hơtŏk hloh, tơgŭm lơ bơngai lơ̆m pơlei pơla đei tơdrong pơm jang păng đei xa jên khei sơđơ̆ng. Pơmai hơpơi 'meh 'nhăk tơmam drăm pơm đei truh hăm bôl buăl lơ̆m teh đak păng tơ̆ teh đak băt, vă kơjă mŭk drăm joh ayŏ Tây Nguyên đei lơ bơngai băt truh păng tơgĭt: “Inh hơpơi 'meh hơtŏk tơdrong jang tanh brai juăt jue kơ kon pơlei inh, tơroh hăm đe ngê̆ nhơ̆n noh đe duch nă yăng yăng, pơmai oh vă vei răk păng pơlan să kơjă joh ayŏ. Inh tơchơ̆t noh pơm ăn tơdrong jang tanh brai juăt jue jing minh tơdrong jang dơnơm, tơgŭm đe ngê̆ nhơ̆n đei jên khei xa sơđơ̆ng păng atŭm hăm noh hơnhăk tơmam drăm đei ưh hơdrô̆ tĕch lơ̆m teh đak mă oei tĕch ăn bôl buăl teh đak đe hloi”

Lơ̆m tơdrong hơrih 'nao hrei ou, đe sơnăm mơlôh nhen pơmai H’Loang Mlô tŏk bŏk oei vei răk tơdrong jang tanh brai juăt jue kră sơ̆. Hăm tơdrong gơh hơgei, sơ̆n păng hơpơi 'meh pơlan să joh ayŏ, lui ngeh lơ̆m khei năr hơnô̆ hơnăp kơnh, che tanh Êđê gô pơtoi sơkơ̆t hơnih dơ̆ng kơ po, jing gơng tơroh hơnhăk dôm kơjă juăt jue kơjăp sơđơ̆ng hrou atŭm hăm tơdrong hơrih kơ chăl hrei.