Hơnih soi ƀlŏk kơ pơlei Tuyết Diêm, xah Xuân Cảnh, rơ-ông rơ-ang hăm tơdrong et soi Tế thu păng soi tơbeh kơ yă ƀok dơnơm jang ƀoh. Kon pơlei vih akŏm tơ̆ hơnih soi ƀlŏk kơ pơlei pơla vă pơvih ăn tơdrong soi tơbeh... Đe drŏnglo noh hơmŏ gah plei 'long tơmam drăm soi plang; đe drăkăn noh hơmet kơmang tơmam drăm vă soi plang ăn kơ ƀok dơnơm jang ƀoh. Ah rim tơdrong hlôi keh đang jing jơnăr pơtơm ăn tơdrong soi tơbeh kiơ̆ khôi kră sơ̆.

Kiơ̆ kơ rim sơnăm mă đe kră lơ̆m pơlei rơih khei năr soi tơbeh mă trŏ ƀlep, mă lei hơnơ̆ng noh đei pơgơ̆r lơ̆m 10 năr ah hơnê̆ khei 8 âm lĭch. 'Nou jĭ khei năr vă kon soi tơƀôh jơhngơ̆m đon kŭp yom hăm đe ƀok dơnơm hlôi pơjing pơlei pơla, pơtơm kơ tơdrong jang ƀoh. Ƀok Diệp Thế Sơn, Jơnŭm Vei lăng hơnih soi ƀlŏk kơ pơlei Tuyết Diêm ăn tơbăt, khôi kră sơ̆ đei lơ jơhnơr kon sou lơ̆m pơlei pơtoi vei răk:  "Khôi soi tơbeh tơpă noh kon pơlei kơdih chă pơgơ̆r, hơmŏ tơmam soi plang, hlôt nhang, plei 'long vă soi plang ăn kơ yang Thành hoàng Bổn xứ - bơngai akŏm jơhngơ̆m pơjing pơlei pơla, pring vei ăn kon pơlei"

  Vă gơh đei năr Soi tơbeh kơ ƀok dơnơm, Jơnŭm vei lăng hơnih soi ƀlŏk hơmŏ tôm tơdrong soi plang. Kon pơlei jang ƀoh kơdih chă tơgop jơnăr, tơmam drăm. Lơ̆m năr mă ou, bu bu kŭm năm truh hơnih soi ƀlŏk kơ pơlei pơla vă soh hlôt nhang soi ƀlŏk kơ đe ƀok dơnơm hlôi pơjing tơdrong jang ƀoh hăm đon bơnôh kŭp yom. Et soi tế thu păng soi tơbeh kơ ƀok dơnơm jang ƀoh đei pơgơ̆r lơ̆m khei năr pơtơm ah pơyan 'mi, pơyan jang ƀoh jê̆ pơtôch. Kơyuơ noh, kon pơlei jang ƀoh truh akŏm ah hơnih soi ƀlŏk kơ pơlei tôm măt păng lăng ou jĭ năr et soi tơm dơnơm kăp gĭt kơ pơlei jang ƀoh. Minh 'nu bơngai oei tơ̆ pơlei Tuyết Diêm tơroi: "Yă ƀok sơ̆ akhan 'xa plei athei băt kơ bơngai pơtăm dơnơm'. Dôm bơngai hlôi pơjing đei pơgar ƀoh, pơjing păng pơtho ăn kơ bơ̆n đei tơdrong jang xa"

 Lơ̆m tơdrong hơrih kon pơlei jang ƀoh Tuyết Diêm, tơdrong jang ƀoh ưh hơdrô̆ jĭ trong chă hơrih xa mă oei pơjing tơdrong ƀlŏk hơdơ̆r păng tơdrong tơguăt pơlei pơla. Kiơ̆ hla bar chih răk đơ̆ng sơ̆, pơlei jang ƀoh đei tơ-iung pơjing đơ̆ng sơnăm 1832. Đơ̆ng thong đak ƀăt ah dơnou Cù Mông, kon pơlei pơjing tơdrong jang ƀoh, pơtho ăn trong pơm ƀoh kiơ̆ lơ chăl bơngai.

Vă jê̆ 2 hơnglŏ sơnăm hloh, tơdrong jang ƀoh atŭm hăm dôm tơdrong tơroi gah tơring Cù Mông adoi oei đei pơdjoi, lơ̆m noh đei nơ̆r pơma “Ƀoh Cù Mông 30 hlak minh găr”. Dôm tơdrong ƀlŏk hơdơ̆r 'noh pơjing đei tơdrong kăp gĭt kơ pơlei pơm jang, pơih trong hơtŏk đơ̆ng minh tơmam choh jang xa jing tơmam drăm joh ayŏ, 'măn ăn tơmang pơhiơ̆. Kiơ̆ kơ noh, tơmoi truh tơmang ưh hơdrô̆ hơlen băt gah tơdrong pơm ƀoh mă oei chă hơlen băt gah chăl hơrih kơ pơlei jang ƀoh, hơnih soi ƀlŏk kơ pơlei păng Et soi Tế thu – soi tơbeh kơ ƀok dơnơm jang ƀoh. 'Nou adoi jĭ trong sơkơ̆t đei Tơdrong jang hơtŏk pơ-'lơ̆ng tơmam drăm ƀoh Tuyết Diêm, kơyuơ Hơnih jang Hơtŏk tơ-iung kơ Liên hơp kuô̆k UNDP Việt Nam tơgŭm, chih hơlen pơtơm jang.

Yă Trần Thị Lan, juăt jang kơ hơnih jang UNDP Việt Nam ăn tơbăt:  "Dang ei, nhôn tŏk bŏk oei jang atŭm hăm jơnŭm pơgơ̆r tơring vă pơdah păng tơbang tơmam drăm ăn kon pơlei. Nhôn gô hơdrin hơnhăk pơhlom 15 tơmam drăm đei pơm đơ̆ng ƀoh. Dôm tơdrong kiơ tơguăt hăm ƀok dơnơm jang ƀoh, nhôn gô pơtruh vă pơdah. 'Nguaih kơ 'noh, nhôn gô pơgơ̆r dôm tour tơmang pơhiơ̆, tơmam drăm kăp gĭt dah mă truh dôm hơnih kăp gĭt ăn tơmoi chă tơmang lăng tơ̆ tơring ou. Nhôn gô pơjing minh hơnih tơroi tơbăt gah tơmang pơhiơ̆ blŭng a kơ pơlei. Ah mă tơmoi năm truh, nhôn gô tơroi tơ̆ ou đei dôm tour tơmang lăng 'lơ̆ng thoi yơ, năm truh tơ̆ yơ, et xa thoi yơ"

Đơ̆ng minh pơlei pơm jang juăt jue, Tuyết Diêm tŏk bŏk đei trong hiôk vă tơroi gah teh, đak, tŏ 'mi, găr ƀoh păng dôm bơngai hlôi tơguăt hăm tơdrong jang ƀoh kiơ̆ lơ̆m 2 hơnglŏ sơnăm kơ ou. Ah mă mŭk drăm tơdrong jang ƀoh đei tơmơ̆t lơ̆m dôm tour tơmang pơhiơ̆, kon pơlei roi băt hơdah athei vei lăng tơdrong jang ƀoh, jơhnơr hơrih so sơ̆ kơ pơlei pơla păng dôm tơdrong joh ayŏ hlôi đei pơdjoi.

Et soi Tế thu păng soi tơbeh kơ Ƀok dơnơm jang ƀoh yuơ noh ưh hơdrô̆ jĭ 'măng vă soi ƀlŏk kơ yă ƀok dơnơm, mă oei tơgŭm ăn kon pơlei băt hơdah dôm tơdrong kăp gĭt tŏk bŏk oei đei vei răk tơƀăk mong ăn kôn mon kon sou. Ah mă bơngai jang ƀoh jing tơm tơ-'ngla kơ tơdrong tơroi kơ po, mŭk drăm pơtơm gơh đei vei răk tơƀăk mong, jing hloi jơhngơ̆m pran ăn tơdrong jang xa hrei ou.