Tơ̆ groi tơring gah Pơmơ̆t Pơbah kông A Man (lơ̆m xah Tuy An Đông, dâh char Đăk Lăk) đei hơnih pơsat so hăm pơhlom 200 tŏ pơsat, đei ƀŭ rah rai lơ̆m hơnih teh să pơhlom 1,5 hectar. Đơ̆ng hơnih pơsat so ou gơh tơƀang lăng truh minh tơring teh oei xa kơ kon pơlei tơring tơmăn tăp dăr jơ̆ng kông A Man. Bơngai juăt hơlen gah jơhnơr hơrih joh ayŏ Nguyễn Danh Hạnh ăn tơbăt:  "Ah mă hơlen băt tơring ou, nhôn ƀôh ou jĭ tơring gah Pơmơ̆t kơ kông A Man, lăng truh minh tơring teh giơ̆ng 'lơ̆ng păng gah hơnăp noh đei đak krong. Hơnih dơ̆ng ou đơ̆ng kơpal lăng jur tơ̆ hơla guăng 'lơ̆ng. Kiơ̆ khôi kră sơ̆, hơnih ou jing tơring teh kăp gĭt, dah mă đe oei krao tơring đei cham char plenh teh 'lơ\ng rŏ, noh đe pơtơm rơih jing hơnih ƀŭ bơngai lôch"

Hơnih pơsat so tơ̆ kông A Man đei  4 um rup tơm, pơsat rup chơnang aseh, pơsat rup pơkao sen, pơsat rup kơdŭ kop păng pơsat rup bơbŭng hnam. Minh ƀar pơsat oei vei sơđơ̆ng um rup joh ayŏ so mă lei lơ noh hlôi tơkloh kiơ̆ khei năr. Minh hla bar chih răk đơ̆ng bơngai juăt chih hơlen kơ bơngai Phalăng noh Anbert Laborde đei đơ̆ng blŭng hơnglŏ sơnăm  20 akhan, dôm pơsat đei rup chơnang aseh păng dôm pơsat đei rup pơkao sen noh đei tơrĕk hăm tơdrong lui khop Phật. Lơ̆m noh, minh sơdrai pơkao sen jing pơtih ăn bơbŭng hnam Phật. Pơsat rup chơnang aseh noh kăp gĭt pơtih ăn aseh hơnhăk pơhngol bơngai lôch vih tơ̆ tơring "Pơmơ̆t hơ-iă 'lơ̆ng".

Rim bơngai jang hơlen chih akŏm akhan, đei tŏ sĕt hloh noh 5 tơdrong đei tơrĕk gah tơdrong kăp gĭt kơ pơsat so A Man, 'noh jing hơnih cham char plenh teh 'lơ̆ng, um rup kơ dôm pơsat so, tơmam ming man păng bơngai yơ gơh ƀŭ tơ̆ ou, pơdui đunh dôm sơnăm... Phŏ giáo sư, Tiến sĩ  Bùi Văn Liêm, sơ̆ jang Phŏ Kơdră Hơnih jang Hơlen chih akŏm tơdrong hơrih so Việt Nam tơroi kơ dôm hơnih pơsat so thoi ou:  "Hơlen chih akŏm tơdrong hơrih nhôn krao, ou jĭ hơnih pơsat akŏm drơ̆ng minh. Hơnih pơsat thoi hơnơ̆ng đei đơ̆ng hơnglŏ 17 truh hơnglŏ 19. 'Nou jĭ dôm tơdrong kăp gĭt chih tơroi gah khôi ƀŭ bơngai lôch hiong păng kăp gĭt noh tơdrong hơrih mŭk drăm, joh ayŏ, đon bơnôh, lơ̆m noh đei hloi đon lui kơ kon pơlei Việt tơ̆ tơring Tŏk Bŏk Việt Nam."

Hơlen chăl sơnăm oei sa lơ̆m tơring teh đei ƀôh: bro pơbăh đak kroong Sông Cái lơ̆m khei đunh đai jĭ hơnih jang tơm kơ groi teh Phú Yên đơ̆ng blŭng anglŏ 17 truh anglŏ 19. Lơ̆m chăl sơ̆ ki, tơ̆ tơring ou hlôi đei lơ bơngai jang tih lơ̆m tơpôl; bơngai mơdro sa, bơngai thơ̆ pơdrŏng. Rŏ năng đe sư ‘noh jĭ tơ-‘ngla kơ dôm lŏk pơsat kră sơ̆ tơ̆ kông A Man. Phŏ giáo sư, Tiến sĩ  Bùi Văn Liêm  akhan, tơdrong chă tơchĕng hơlen pơsat gô tơƀôh tơbăt ăn chăl sơnăm, tơdrong hơrih sa mŭk drăm oei sa, tơdrong mơ̆t lĕch dih băl tơdrong oei sa lơ̆m tơring. "Mă blŭng, bŏn kăl tơchĕng hơlen mă hơdăh hloh dơ̆ng găh bro lŏk pơsat ou, đơ̆ng tih iĕ, tơmam ming man pơsat dĭng truh chăl sơnăm; đơ̆ng noh pơm hô sơ hơlen rim kâp vă vei lăng năng tông, atŏk kơtang tơdrong gĭt kăl păng iung jang dôm tơdrong đei kơ hơnih gru gra gĭt kăl dăr sơnăm."