Tơdrong pơdah tơbang hăm bơngai lăng 4 tơdrong kăp gĭt gah Tơdrong tơblah Hồ Chí Minh nuih mơng, păng pơdah dơ̆ng um rŭp, hla bar chih kơ Ƀok Kơdră Hồ Chí Minh hăm tơdrong tơblah pơrơngei tơring pơbah, rơngei teh đak, atŭm hăm dôm tơdrong jang đei jơnei ang hơdah kơ pơlei tơm HCM lơ̆m dôm sơnăm ou ki. Tơdrong pơdah đei pơgơ̆r đơ̆ng năr 8/4 truh đĭ năr 20/5, jĭ minh lơ̆m dôm tơdrong akŏm dơnơm vă tơbăt 50 sơnăm Năr tơblah đei jơnei tơring pơbăh, rơngei teh đak (30/4/1975 - 30/4/2025), tơgop pơtho tơdrong juăt jue kăch mang, tơdrong băt 'mêm kơ teh đak ăn kang ƀô̆, khul linh păng kon pơlei, mă kăl noh ăn đe sơnăm mơlôh, tơgop jơhngơ̆m tơ-iung pơjing teh đak jơnap 'lơ̆ng păng vei lăng kơjăp teh đak.

Lơ̆m khei năr pơgơ̆r pơdah, lơ tơdrong akŏm 'lơ̆ng hơ-iă adoi đei pơgơ̆r, nhen rơi chop kiơ̆ trong trôm pơga rơbưn, sĭt hla kơ tơblah jơnei, xa dôm tơmam xa kơ đe yu kĭch lơ̆m khei năr tơblah vang...