Năr akŏm Joh ayŏ kon pơlei kon kông dêh char Gia Lai sơnăm 2025 gô vă akŏm hloh 700 ngê̆ nhơ̆n tơ̆ 17 apŭng, thĭ xah păng pơlei tơm lơ̆m dêh char. Cham char năr akŏm 'lơ̆ng hơ-iă kơ joh ayŏ hăm dôm tơdrong jang nhen pơdah dơ̆ng tơdrong hơrih pơlei pơla, pơdah hơbăn ao tanh kon kông, tơdra hơri, tơmam et xa juăt jue păng dôm tơdrong pơsuh pơchơt kră sơ̆; dôm tơmam kăp gĭt kơ tơring nhen kaphê, tơdrô ge, por prung, 'nhĕm ƀuh... tơgop tơbang gah tơdrong joh ayŏ kon pơlei kon kông lơ̆m dêh char.

Ngê̆ nhơ̆n Nay Ka tơ̆ pơlei Bon Phu Ama Nhuer 2, xah Ia Rtô thĭ xah Ayun Pa ăn tơbăt: sơnăm ou, khul ngê̆ nhơ̆n thĭ xah Ayun Pa đei 46 'nu gô năm akŏm lơ tơdrong kăp gĭt nhen pơdah tôn chĭng chêng, tanh brai, vang akŏm dôm tơdrong pơsuh pơchơt kră sơ̆.