Hnam soi kơ ƀok Pơtao Hùng đei pơm tơ̆ groi kơjung, găh thôn 6, xăh sơlam Đắk Buk So, apŭng Tuy Đức, dêh char Đắk Nông. Hơdrol kơ năr soi tơbeh kơ ƀok yă tơm dơnơm sơ̆, kon pơlei hlôi akŏm hơmet pơrŏ hnam soi: bơngai tơsơng tơnăr, bơngai hơpuih hơmet cham hơnih, bơngai rĭ hơmet kơƀang tang dŏ tơ̆ hnam tơmoi ‘nao man. Ƀok Chử Anh Chương, bơngai jang lơ̆m Khŭl chă vei lăng kơdih hnam soi, roi tơbăt, ‘năr 10/3 âm lịch ‘noh jĭ năr chơt tih tơ̆ tơring sơlam âu hăm dôm bơngai hơtăih kơ pơlei Phú Thọ:

“Đĭ đăng rim bơngai tă hue lăng găh tơm a hơ la chă, đon băt kơdih đơ̆ng kon pơlei bơ̆n ‘noh jĭ: “Mă đơ̆ng bu năm tơ̆ yơ, oei tơ̆ yơ, ƀlŏk kơ năr soi tơbeh kơ ƀok yă tơm dơnơm sơ̆ ‘năr 10 khei 3 ‘noh brŏk ngôi”. Kon pơlei bu bu kŭm tơchĕng thoi noh. Nhôn pơm hnam soi âu vă lơ̆m năr soi tơbeh kơ ƀok yă tơm dơnơm sơ̆ 10-3 ‘noh pơm soi blŏk hơdơ̆r, oei lơ̆m dôm năr hơtuch sơnăm ‘noh pơgơ̆r tơƀơ̆p muh măt Pôm pơlei Phú Thọ, vang tơroi băl tơdrong hlôh vao jang sa, ki thuơ̆t jang mir roh, vei rong kon tơrong dăh mă tĕch mơdro tơmam.”

Hnam soi kơ ƀok Pơtao Hùng tơ̆ thôn 6, xăh Đắk Buk So đei pơm tơ̆ hơnih să vă jê̆ 2.000 mét vuông. Lơ̆m noh, hnam soi đei pơm kiơ̆ thoi hơnih soi so sơ̆ să dang 40 mét vuông. Hnam soi đei pơm tơ̆ kơnao 7 jăl, hăm cham să jum dăr. Hơnih ming kơƀang soi chhing, đei ming tang dŏ măih păng rup ƀok Pơtao Hùng. Tơ̆ ‘ngoăih hnam soi, kon pơlei kŭm ming man hơnih hnam tơmoi ‘lơ̆ng, cham pơngôi tơplŏng kơdâu, cham pơm tông, joh ayŏ kơdŏ soang...

Ƀok Nguyễn Xuân Phúc, oei tơ̆ thôn 8, xăh Đắk Buk So, apŭng Tuy Đức, roi tơbăt, iŏk đơ̆ng et hơtŏk (sơnăm 2018), hnam soi hlôi jing hơnih bơ̆jang lăng găh tơm a hơla chă, chĕp răk păng tơ ƀăk mong tơdrong joăt joe: “Mơ̆t oei tơ̆ âu hơtăih pơlei, kon pơlei nhôn pơjing Khŭl pôm pơlei Phú Thọ, đang kơ ‘noh tơra jên răt teh păng pơm hnam soi ƀlŏk hơdơ̆r kơ đe ƀok Pơtao Hùng păng jing hơnih pơgơ̆r hŏk hôp tơpôl. Nhôn vei răk tơdrong joăt joe kach mang đơ̆ng yă ƀok sơ̆, pơtho pơhrăm kon sâu athei đei đon băt kơdih lăng găh tơm a hơla chă, đei hơnăp jang hăm Teh đak, hơdrin pơjing pơlei pơla mă 2 pơdrŏng pran”.

Tơ̆ tơring sơlam Đắk Buk So, hơnih kơdrơ̆m apŭng Tuy Đức, Hnam doi ƀok Pơtao Hùng ‘noh jĭ hơnih vă tơƀơ̆p pơma dơnuh, tơklep tơpôl. Mŏ  Thị Chí (bơngai M’nông) oei tơ̆ plei Bu Ndrung, xăh Đắk Buk So roi tơbăt, mŏ kiơ̆ lui Kŏng yăo, mă lei mưh rim năr soi tơbeh kơ ƀok yă tơm dơnơm sơ̆, tă kơ truh năm soh nhang ƀlŏk hơdơ̆r kơ đe ƀok Pơtao Hùng tơ̆ hnam soi păng pơma dơnuh hăm rim bơngai: “Dôm năr lêh Têt, soi tơbeh kơ ƀok Pơtao Hùng Vương ‘noh nhôn tă kơ năm soh nhang ƀlŏk hơdơ̆r kơ đe ƀok Pơtao Hùng. Gơnang đơ̆ng ‘noh đei hnam soi tơbeh, ĭnh păng kon pơlei lơ̆m pơlei đei tơklep hơdai, đa pơgơ̆r joh ayŏ kơdŏ soang, tơplŏng kơdâu hăm kon pơlei  tơ̆ dêh char Phú Thọ mơ̆t oei tơ̆ âu pơjing tơdrong jang sa păng dôm tơring pơlei nai hai. Rim bơngai hơrih sa hơdai tôch kơ hiôk chơt”.

Ƀok Ngô Văn Thương, Kơdră Anih vei lăng kon pơlei xăh Đắk Buk So, roi tơbăt, iŏk đơ̆ng đei hnam soi, năr soi tơbeh kơ ƀok Pơtao Hùng Vương, hlôi jing năr lêh tơring sơlam: “Năr soi tơbeh kơ ƀok Pơtao Hùng Vương, lơ kon pơlei lơ̆m dêh char, apŭng, xăh păng kơdră đảng, khŭl kơdră tơring tă kơ soh nhang kơ đe ƀok Pơtao Hùng. ‘Nâu jĭ tơdrong joh ayŏ ‘lơ̆ng hơiă kơ kon pơlei tơring, mă loi ‘noh jĭ kon pơlei bơngai Phú Thọ hơrih sa lơ̆m tơring. Nhôn ‘noh jĭ xăh sơlam, đei lơ hơdrĕch hơdrŭng hơrih sa, kiơ̆ đơ̆ng âu tơgop pơjing đei tơdrong tơgoăt pôm nơ̆r ƀơ̆r đon đĭ đăng hơdrĕch hơdrŭng.”

Tơdrong pơm hnam soi kơ ƀok Pơtao Hùng đơ̆ng kon pơlei đơ̆ng pơlei groi teh tơm dơnơm tơ̆ Đắk Buk So ưh khan lăp tơgop chĕp vei tơdrong lui kơyang, mă oei hơtŏk tơdrong joăt joe kach mang, vei kơjăp tơdrong tơgoăt pôm nơ̆r ƀơ̆r đon đơ̆ng rim hơdrĕch hơdrŭng tơ̆ tơring sơlam Tây Nguyên. Hnam soi hlôi jing hơnih pơtruh tơmam ‘mêm “ nhă đak ƀlŏk kơ tu” păng tơgop vei răk, tơƀăk mong dôm kơjă kăp gĭt joh ayŏ, jơhnơr hơrih kơ hơdrĕch hơdrŭng Việt Nam kiơ̆ rim jơ hnơr.