Đơ̆ng rŏng kơ lêh sơng tơmam plang ăn đe Ƀok Dơnơm păng khôi soi tơbeh juăt jue tơ̆ anih soi ƀlŏk Âu Lạc tơ̆ kông Phượng Hoàng lơ̆m Tơring tơmang chơkơi Prenn, pơlei tơm Đà Lạt, đe kơdră păng kon pơlei dêh char Lâm Đồng atŭm hăm lơ tơmoi truh tơmang hlôi soh plang nhang kơ đe Ƀok Dơnơm.

'Nguaih kơ Yôk Ƀok Dơnơm Hùng Vương sơnăm ou dêh char Lâm Đồng oei đei dôm tơdrong akŏm pơdah joh ayŏ, pơsuh pơchơt kơ tươ̆ng, teh pơchah bô̆i. akŏm kơchơ tơmam xa, akŏm hla che Việt Nam, chih thư phap păng pơdah um rŭp.

Tơ̆ Đắk Lắk, Lêh soi kơ ƀok pơtao tơm dơnơm Hùng Vương sơnăm 2025  đei pơgơ̆r tih tơ̆ Hơnih gru groa jơhnơr hơrih kơ teh đak Đình Lạc Giao, pơlei tơm Buôn Ma Thuột. Lăp đơ̆ng rŏng jơ tôn chĭng Ê Đê kơkuh chơt hơiă đơ̆ng Khŭl tôn chĭng chêng plei Ko Tam, Lêh soi kơ ƀok pơtao tơm dơnơm Hùng Vương tơ̆ Đắk Lắk đei pơgơ̆r hăm tơdrong pơm lêh joăt joe yua đơ̆ng khŭl drŏ kăn soi pơm.

Dôm bơngai tang măt hlôi soh nhang dan pơkao păng tơmam soi ‘noh jĭ dôm tơmam đơ̆ng choh jang sa, bri ‘long ‘lơ̆ng kơ tơring ming tơ̆ kơƀang soi kơ ƀok pơtao Hùng; roi tơbăt kŏng jang đei păng đŏk hla ar tơƀlŏk dơ̆ng jơhnơr hơrih nuih mơng đơ̆ng đe ƀok pơtao Hùng chăl tơiung pơjing teh đak, jơhnơr hơrih iung tơblăh iŏk rơngei hơdrĕch hơdrŭng, jơnei teh đak. Ƀok Nguyễn Tuấn Hà, Phŏ Kơdră Anih vei lăng kon pơlei dêh char Đắk Lắk tang măt khŭl kơdră, kon pơlei dôm hơdrĕch hơdrŭng dêh char Đắk Lắk roi tơbăt ăn kơ đe ƀok pơtao Hùng găh dôm jơnei mă kon pơlei dôm hơdrĕch hơdrŭng lơ̆m dêh char hlôi iŏk đei lơ̆m sơnăm âu ki.

Lơ̆m 2 năr pơdơh hơtuch giĕng păng năr Yôk kơ Ƀok dơnơm Hùng Vương (đơ̆ng năr 8 truh năr 10 khei 3 âm lĭch), kơ rơbou 'nu tơmoi hlôi rơih dêh char Kon Tum jĭ anih truh tơmang păng atŭm hăm kon pơlei tơ̆ tơring tơrĕk hăm tơm a la chă kon pơlei, iŏk yua tơdrong juăt jue 'lơ̆ng rŏ kơ kon sou Lạc kon mon Hồng. Anih sơng lơ tơmoi truh hloh tơ̆ Kon Tum lơ̆m 'măng pơdơh lêh Yôk Ƀok dơnơm Hùng Vương 'noh thĭ trâ̆n Măng Đen, apŭng Kon Plông, hăm jê̆ 20.000 'nu tơmoi truh tơmang.

Atŭm hăm chă hơlen cham char 'lơ̆ng rŏ, hơlen băt gah joh ayŏ kon kông tơ̆ tơring, lơ tơmoi hlôi akŏm jơ năr truh dôm tơring soi ƀlŏk kơ ƀok pơtao Hùng, nhen Đình Lương Khế tơ̆ pơlei tơm Kon Tum, hnam chua Tháp Kỳ Quang, apŭng Đăk Hà, vă atŭm hăm kon pơlei tơ̆ tơring soh plang nhang ƀlŏk tơbăt kơ tơm a la chă kon pơlei.