Tơ̆ Buôn Ma Thuột, kaphê hlôi jing um ai joh ayŏ tơroh kon bơngai. Pơmai Phạm Thị Thanh Nga, oei tơ̆ pơlei tơm Buôn Ma Thuột tơroi, kon pơlei tơ̆ ou huch kaphê vă pơtơm kơ năr 'nao: “Hăm kon pơlei Buôn Ma Thuột 'noh kaphê jing minh tơmam kăp gĭt ưh gơh kơƀah. Huch kaphê ưh hơdrô̆ jĭ tơdrong juăt mă oei ăn kơ bơ̆n akŏm pơma dơnuh pơđăp gah tơdrong jang xa păng mă gĭt noh tơroi hăm bôl buăl đei atŭm đon tơchĕng. Kaphê hăm kơdih inh noh đak nhă juăt jue rim năr păng mưh ưh đei hăp noh ưh kơ 'lơ̆ng ôh”

Ưh hơdrô̆ jĭ tơdrong juăt, kaphê oei jĭ tơdrong kăp gĭt păng tơdrong hiôk tơdui lơ bơngai chôt vih hăm tơm a hla chă. Tơdăm Ê Đê – Y Pốt Niê, mă hlôi jăk đơ̆ng pơlei pơla kiơ̆ tơdrong jang ƀak si, mă lei tơdrong hơdơ̆r kơ hơyuh kaphê mĕ ƀă hlôi pơtrŭt sư brŏk hăm pơlei pơla, pơjing đei hơnăn kaphê Ê Đê. Iŏk yua kiơ̆ trong pơm kaphê so juăt jue kơ kon pơlei po, sư hlôi pơjing đei “Kaphê 'nhui” păr ang jơ̆p jang ưh hơdrô̆ jĭ minh kơluăi kaphê mă oei jĭ tơdrong tơroi gah joh ayŏ, gah tơpang ti hơbĕch hơbal păng tơdrong pơ-'nam đơ̆ng bơngai mĕ, pơmai tơ̆ pơlei pơla. Y Pốt Niê tơroi: “Tơroh gah joh ayŏ păng mă ƀar noh tơroi hơtŏk tơmam drăm po pơm tơlĕch truh apŭng plenh teh, nhôn hơpơi 'meh tơmam drăm ou ưh hơdrô̆ tơ̆ Việt Nam mă apŭng plenh teh oei băt truh, mă kăl 'noh hơ-'nhăk joh ayŏ hadoi hăm kaphê yak hăm dih băl noh hăp gô akŏm đei gah đon bơnôh tơguăt tơguăl nhen kơjă joh ayŏ gơh hrou hăm tơmam drăm kaphê”

Hăm Hoa hậu H’Hen Niê, kaphê jĭ minh pah kơ jơhnơr mơlôh păng tơdrong tơguăt 'nhŏng oh unh hnam. Đei rơneh tih vơ̆ tơ̆ minh pơlei hin dơnuh tơ̆ apŭng Cư M’gar, Đăk Lăk, đơ̆ng oei 'lơ̆p, sư hlôi juăt hăm tơm kaphê. Rim 'măng tơroi gah kaphê, Hoa hậu H’Hen đei jơhngơ̆m pran thoi ou: “Kiơ̆ kơ Hen pơkăp gah kaphê, 'noh kaphê jĭ tơdrong tơroh, kaphê jĭ đon hưch lăp, kaphê jĭ trong hiôk pơm jang. Tơroi gah kaphê jĭ tơdrong tơroh lơ̆m unh hnam. Hen hlôi đei huch kaphê yă ƀok, mĕ ƀă. Rim pơgê hrôih ah iĕr ŏ, đei bơngai iung pơgiơ̆ng unh pai đak păng pơm kaphê 'măn ăn unh hnam huch, păng ah mă huch kaphê thoi noh đe oei 'nhăk tơ̆ mir 'măn huch. Kaphê jĭ đon hưch ah mă Hen huch minh kơchŏk kaphê tơ̆ tơring nai, Hen ƀlŏk hơdơ̆r kơ unh hnam, pơlei pơla, ƀlŏk kơ găr kaphê"

Kiơ̆ kơ yă Niê Thanh Mai, Kơdră Jơnŭm Văn hŏk Ngê̆ thuơ̆t dêh char Đăk Lăk, joh ayŏ kaphê hlôi jĭ hơyuh jơhngơ̆m, jĭ minh pah ưh gơh kơƀah lơ̆m tơdrong hơrih kơ kon pơlei Buôn Ma Thuột: “Hăm nhôn noh kaphê jing tơdrong joh ayŏ, kaphê jing đon băt păng kaphê jĭ tơroh dơnơm. Nhôn ƀôh rim 'măng Lêh akŏm kaphê adoi đei tơdrong ang bang phara băl, hăm sơnăm ou noh nhôn ƀôh hơdah kaphê jing tơdrong tơguăt gah joh ayŏ kon pơlei pơla lơ̆m tơring kơ dêh char. Mă kăl hăp pơlan să kiơ̆ lơ trong păng tơƀôh hơdah joh ayŏ juăt jue kon pơlei kon kông hăm kaphê”

Lêh akŏm Kaphê Buôn Ma Thuột 'măng mă 9 sơnăm 2025 tơ̆ Đăk Lăk hăm hơnăn "Buôn Ma Thuột – Anih truh akŏm kơ kaphê apŭng plenh teh". Ƀok Nguyễn Hồng Phúc, bơngai pơgơ̆r dơnơm kơ tơdrong pơtơm lêh akŏm tơroi: 'nou ưh hơdrô̆ jĭ tơdrong pôk pơ-ư kaphê mă oei jĭ trong hiôk vă tơbang hơdah hloh gah joh ayŏ Tây Nguyên, tơring kaphê akŏm đei lơ kơjă tơroh dih băl: “Đei 2 anih hơdah hloh noh minh tơdrong tơm kơ kaphê tơguăt hăm joh ayŏ kơ 49 hơdrung kon pơlei kon kông, noh jĭ tơdrong tơguăt hăm kơjă mŭk drăm mă ưh kơsĭ tơring ayơ adoi đei păng lơ̆m noh bơ̆n gô pôk pơ-ư kơ dôm kơjă joh ayŏ kaphê 'lơ̆ng hơ-iă kơ kon pơlei kon kông, păng lơ̆m tơdrong akŏm adoi gô đei lơ um rŭp tơbang hơdah hloh gah kaphê lơ̆m tơdrong hơrih rim năr hăm tơdrong joh ayŏ”

Hăm tơdrong hơrih hăt hot hrei ou, rim kơtoh kaphê Buôn Ma Thuột ƀou phu tru hŭt kơ bri kông. Noh jĭ tơdrong tơroi kơ kon bơngai, kơ joh ayŏ gah tơdrong tơroh đon bơnôh 'mêm kơ-eng.